00:00:00 IGIHE NETWORK KN KINYARWANDA EN ENGLISH FR FRANCAIS

RICTA yasabye inzobere mu ikoranabuhanga mu Rwanda guhora biga kugira ngo bajyane n’igihe

Yanditswe na Manzi Angelo
Kuya 1 Ugushyingo 2022 saa 04:38
Yasuwe :

Abakozi bashinzwe ikoranabuhanga mu bigo bitandukanye bahawe amahugurwa n’Ikigo gishinzwe guteza imbere ikoranabuhanga (RICTA), yitezweho kubongerera ubumenyi mu gukoresha no guteza imbere ikoranabuhanga ryo mu Rwanda.

Ku wa Gatanu tariki 28 Ukwakira 2022 nibwo aba bahanga mu ikoranabuhanga 70 basoje amahugurwa azwi nka Rwanda network operators group, bahita bahabwa n’impamyabushobozi na RICTA Ku bufatanye n’ikigo gihugura abantu mu by’ikoranabuhanga, Network Startup Resource Center (NSRC).

Muri aya mahugurwa y’icyumweru, bahuguwe uburyo bwo kugenzura no gukoresha itumanaho, bikabafasha mu gushaka ibisubizo mu mirimo yabo ya buri munsi no guteza imbere ikoranabuhanga mu Rwanda.

Bahawe kandi ubumenyi ku buryo buzwi nka Peering & IXP Operations bwo guhererekanya amakuru atanyuze hanze y’Igihugu (Rwanda Internet Exchange Point).

Mu muhango wo gutanga impamyabushobozi ku basoje amahugurwa. Umuyobozi Mukuru wa RICTA, Ingabire Grace yabasabye kugaragaza itandukaniro kuko ubumenyi bahawe buhambaye.

Ingabire yagize ati “Ndabasaba guhora murwanira kugira ubumenyi bwisumbuye ku bwo mwahawe kuko ikoranabuhanga rihora rihinduka, rijyana no kwiga kandi ni uguhozaho. Mugire umwete. Ubu bumenyi mwahawe hari ibigo byoherezaga abakozi kwihugura hanze ariko nka RICTA twahisemo kurizana no gufasha abanjeniyeri nkamwe mu Rwanda ku buhabwa.”

Abahawe impamyabushobozi muri aya mahugurwa, bavuga ko bishimiye ubumenyi bahawe kuko bwafashije kuziba icyuho cyari gihari ku byo bazi n’ibigezweho mu ikoranabuhanga.

Tushabe Hubert ukora muri Minisiteri y’Ibikorwa remezo yagize ati “Twize ibintu byiza kuko hari imbogamizi twahuraga nazo ariko guhura n’aba bantu bafite ubunararibonye, byadufashije kumenya uburyo twakemura imbogamizi twahuraga nazo. Ubumenyi twabuhawe ku buryo itumanaho rizajya ritangwa neza ahubwo twasaba ko byazajya bihoraho.”

Umugwaneza Angel Marie Confiance yavuze ko bungutse ubundi bumenyi buzabafasha gutanga serivise nziza.

Ati "Twungutse ubundi buryo twakoresha ibikoresho mu gutanga itumanaho neza [...] hari n’ibyo mbonye bwa mbere, nizeye ko hari byo tugiye guhindura cyangwa kunoza mu mikorere yacu ya buri munsi.”

Kugeza ubu ikigo RICTA kimaze gutanga amahugurwa kuri bakora mu ikoranabuhanga bagera kuri 570, ikaba ifite intego yo gutanga amahugurwa ku bantu 1000 mu myaka itanu iri imbere.

Umuyobozi Mukuru wa RICTA, Ingabire Grace yavuze ko ikoranabuhanga rihora rihinduka, bityo bisaba kwihugura buri gihe
Umuyobozi Mukuru wa RICTA, Ingabire Grace yabasabye kugaragaza itandukaniro kuko ubumenyi bahawe buhambaye
Aya mahugurwa yitabiriwe n'abakozi 70 baturutse mu bigo bitandukanye
Abahuguwe basabwe kubyaza umusaruro ubumenyi bahawe
RICTA yiteze impinduka muri serivisi aba bakozi batangaga mu by'ikoranabuhanga
Umuyobozi wa Ricta yashimiye abarimu bahuguye aba bakozi
Tushabe Hubert ukora muri Minisiteri y’Ibikorwa remezo yashimye ubumenyi bahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .