Perezida wa JICA yashimye uburyo K-Lab ifasha urubyiruko guhanga icyerekezo cy’ubuzima

Yanditswe na Evariste Nsengimana
Kuya 19 Nyakanga 2019 saa 08:31
Yasuwe :
0 0

Perezida w’Ikigo cy’u Buyapani cy’ubutwererane mpuzamamahanga (JICA), Shinichi Kitaoka, yasuye ibikorwa by’ibigo bifasha urubyiruko kubona ubumenyi bwo kwifashisha ikorababuhanga mu guhanga udushya, avuga ko ari inzira iganisha ku gutuma ruhinduka abahanga cyangwa abaherwe mu gihe kizaza.

Perezida Kitaoka ari mu ruzinduko mu Rwanda hagati ya 17-21 Nyakanga 2019.

Nyuma yo kunamira abazize Jenoside yakorewe Abatusti baruhukiye mu rwibutso rwa Kigali kuri uyu wa 18 Nyakanga 2019, yasuye ibigo bifasha urubyiruko kwihugura mu ikoranabauhanga birimo K-Lab na Fab-Lab, ikigo ayobora gitera inkunga.

Kitaoka n’itsinda bari kumwe banagize umwanya wo kuganira na bamwe mu banyarwanda bize icyiciro cya gatatu cya Kaminuza binyuze muri gahunda u Buyapani bugenera urubyiruko rwo muri Afurika izwi nka ABE (African Business Education).

K-Lab na Fab-Lab bifasha urubyiruko guhanga ugushya mu ikoranabuhanga, gukora ubushakashatsi, guhanga no gukora imishinga na porogaramu bishobora kugira uruhare mu iterambere ryabo n’iry’igihugu.

Musafiri Ildephonse washinze ikigo HIGANEZA Ltd, gifite porogaramu ifasha guhuza no guhererekanya amakuru y’ubuhinzi, yabwiye IGIHE ko amaze imyaka ine yihugurira muri K-Lab kandi ko byamugiriye akamaro.

Ati “Ni ahantu ukorera wishimye, uhurira n’urubyiruko rufite ubumenyi ku buryo ugira ikibazo ukamwegera akagufasha nawe yakigira akakwegera ukamufasha […] K-Lab ifasha urubyiruko rufite imishinga, rufite icyerekezo bakaba babateza imbere bakabahuza n’ibigo bikeneye abakozi bashoboye.”

Perezida wa JICA, Kitaoka yashimye uburyo gahunda z’ikoranabuhanga ziterwa inkunga n’igihugu cye zifasha urubyiruko muri gahunda zitandukanye.

Ati “Mvuze kuri kuri K-Lab, ni ikintu gishimishije giha amahirwe akomeye urubyiruko yo kwihugura mu bumenyi bw’ibanze mu ikoranabuhanga bwazafasha kuba intiti no kuba abaherwe mu gihe kizaza.”

Uyu muyobozi yavuze ko u Buyapani n’u Rwanda ari ibihugu bihuriye ku kuba ari bito mu buso ariko bifite amahirwe ku babiyobora kuko kuyobora igihugu gito byoroha kurusha kuyobora ikinini.

Perezida Kitaoka yakomeje agira ati “Iki gihugu [u Rwanda] gifite icyerekezo cyiza cyahawe n’abayobozi bashoboye n’abaturage babashyigikiye.”

Uyu muyobozi asuye u Rwanda nyuma y’uruzinduko Perezida Kagame yagiriye mu Buyapani muri Mutarama 2019, bakaganira ku ngingo zitandukanye zigamije gushyigikira gahunda z’iterambere mu Rwanda ndetse bagasezerana ko na we azarusura.

Biteganyijwe ko azasura ikiraro n’umupaka bya Rusumo, ndetse akazanagirana ibiganiro na Perezida Paul Kagame.

Bari kuganira na bamwe mu banyarwanda bize icyiciro cya gatatu cya Kaminuza binyuze muri gahunda u Buyapani bugenera urubyiruko rwo muri Afurika izwi nka ABE
Perezida wa JICA Kitaoka (hagati) yashimye uburyo K-Lab ifasha urubyiruko guhanga icyerekezo cy’ubuzima
Abayobozi ba JICA bafashe ifoto y'urwibutso na bamwe mu banyeshuri bize icyiciro cya gatatu cya Kaminuza mu Buyapani

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza