Umukuru w’Igihugu afatanyije iyi nshingano n’Umuyobozi Mukuru w’ikigo cy’ikoranabuhanga cya Salesforce, Marc Benioff, Umunyamabanga Mukuru w’ishami rya Loni rishinzwe ikoranabuhanga n’itumanaho (ITU), Doreen Bogdan-Martin, akaba Umuyobozi wungirije.

Intego nyamukuru y’ishingwa ry’iyi komisiyo ni uguharanira ko AI igira uruhare rukomeye mu kugabanya ubusumbane bw’ibihugu mu rwego rw’ikoranabuhanga, rigahuza kurushaho ibikize n’ibiri mu nzira y’iterambere.

Iyi komisiyo ishyigikiwe na ITU n’ishami ry’Umuryango w’Abibumbye rishinzwe guteza imbere uburezi, siyansi n’umuco (UNESCO). Imirimo yayo izubakira ku byagezweho na Komisiyo ya Loni yari ishinzwe kugeza internet hirya no hino ku Isi kuva mu 2010 kugeza mu 2025.

Aho gushyiraho amategeko akakaye, iyi komisiyo izashyira imbaraga mu kuyobora ibiganiro ku mikoreshereze ya AI, ishyireho amahame ngenderwaho mu bya tekiniki, ifashe ibihugu kwiyubakira ubushobozi mu by’iri koranabuhanga.

Iyi komisiyo itangiranye imbaraga kuko ihuza abayobozi barenga 40 bo mu nzego zitandukanye. Abayigize barimo abayobozi b’ibigo by’ikoranabuhanga bikomeye ku Isi nka Jensen Huang wo muri Nvidia, Andy Jassy wa Amazon, Brad Smith wa Microsoft n’abahanze AI nka Anthropic na Cohere.

Irimo kandi abayobozi bo mu bigo nka Accenture na Reliance Industries hamwe na Perezida wa Estonie n’uwa Iceland, abaminisitiri bo muri guverinoma zo muri Singapore na Nigeria, abayobozi bo mu ishami rya Loni rishinzwe ubucuruzi n’umuryango wa Afurika Yunze Ubumwe.

Mu myaka irenga 20 Perezida Kagame amaze ayobora u Rwanda, yaruhinduye igicumbi cy’ikoranabuhanga muri Afurika. Afite ubunararibonye bw’igihe kirekire mu guteza imbere ikoranabuhanga kuko yayoboye Komisiyo ya Loni yari ishinzwe gukwirakwiza internet.

Mu Rwanda, ubwenge buhangano bwifashishwa mu buvuzi, uburezi, mu nzego z’ubutabera, ubuhinzi, mu bucuruzi, mu nzego z’umutekano no mu zindi nzego nyinshi zigize ubuzima bw’igihugu.

Tariki ya 8 Kamena 2026, inama y’abaminisitiri mu Rwanda yafashe icyemezo cyo gushyiraho ikigo cy’igihugu gishinzwe AI, kizafasha mu kwihutisha iterambere, guhanga ibishya, gushyira mu bikorwa ishoramari no kunoza imiyoborere.

Icyo Perezida Kagame azibandaho ni uguharanira ko ibihugu biri mu nzira y’iterambere bitazasigara inyuma muri iri koranabuhanga. Afite intego yo guhindura imishinga ya AI ishoramari rifatika, ikazifashishwa mu guhanga ibishya.

Marc Benioff uri mu bashinze Saleforce, azwi cyane ku rwego mpuzamahanga nk’umuyobozi uharanira kugeza ikoranabuhanga hirya no hino ku Isi. Agaragaza ko ikibazo kiri mu mikoreshereze ya AI icyo gusigasira icyizere kiri hagati y’abantu.

Uyu mushoramari ufatanya akazi n’ibikorwa by’ubugiraneza agaragaza ko inyungu ziva muri AI ntacyo zaba zimaze mu gihe iri koranabuhanga ritaba ritekanye ku barikoresha, bityo ko ibibazo birishamikiyeho bigomba gukumirwa.

Perezida Kagame azafatanya na Marc Benioff kuyobora 'AI for Good Global Commission'