Serivisi zirimo Teams, Outlook ndetse na porogaramu y'ubwenge buhangano (artificial intelligence software) ya Microsoft yitwa Copilot zagizweho ingaruka n'ibibazo byo kubura umuyoboro w'itumanaho (connectivity problems). 

Iki kibazo cyagize ingaruka no ku zindi porogaramu ziri muri Microsoft 365, ikaba ari serivisi ikunzwe gukoreshwa kuri murandasi mu bigo by'ubucuruzi ituma bibasha kugera kuri porogaramu nka OneDrive.

Ku wa Kane Saa Kumi n'Ebyiri z'umugoroba ku isaha mpuzamahanga (18:00 GMT) nibwo hagaragajwe ibibazo inshuro zirenga ibihumbi 140 ko Outlook itari gukora neza, nk'uko byatangajwe n'urubuga rukurikirana imikorere ya murandasi rwa Downdetector. 

Koherezanya ubutumwa n'inama zibera kuri murandasi byo byakomeje gukora mu buryo busanzwe.

Microsoft yatangaje ku rubuga rwa X ko iki kibazo cyatewe n'umubare w'imashini nini zibika amakuru kuri murandasi (servers) zabuze mu buryo butunguranye, bigatuma izindi zisigaye ziremererwa. 

Ikinyamakuru BBC cyagaragaje ko nta kimenyetso kigaragaza ko iki kibazo cyatewe n'igitero cy'ikoranabuhanga (cyber-attack).

Iki kibazo cyagize ingaruka no ku bindi bigo, birimo Anthropic na OpenAI, bikorana na sisitemu za Microsoft. Ikigo cya OpenAI cyakoze ChatGPT cyatangaje ko kirimo gukora iperereza kuri iki kibazo cyatumye zimwe muri serivisi zayo zidakora nk'uko byari byitezwe.

Microsoft yatangaje ko iri kugera ku musaruro mwiza mu bikorwa byacyo byo gusubiza serivisi ku murongo kandi ko kirimo kwihutira gukemura iki kibazo burundu.