00:00:00 IGIHE NETWORK KN KINYARWANDA EN ENGLISH FR FRANCAIS

Imikorere ya Hence Technologies, sosiyete yiyemeje guhindura Kigali ’Silicon Valley’ ya Afurika (Video)

Yanditswe na Israel Ishimwe
Kuya 19 September 2022 saa 07:16
Yasuwe :

U Rwanda rufite intumbero yo guteza imbere ikoranabuhanga ndetse mu cyerekezo cyarwo rwifuza kuba igicumbi cyaryo muri Afurika n’Isi yose muri rusange.

Igitekerezo cyo kuba igicumbi cy’ikoranabuhanga cyaje muri Gicurasi 2016 mu Nama ya World Economic Forum yabereye i Kigali.

Ubu nyuma y’imyaka itandatu, hafi ya serivisi zose mu gihugu ziboneka hifashishijwe ikoranabuhanga. Izi zirimo kwishyura ingendo, kwivuza, kwiga, ubukerarugendo, serivisi zo mu nzego z’ubuyobozi n’ibindi.

Ibi ni byo byatumye Hence Technologies, Ikigo cy’Ikoranabuhanga gikomoka mu Bwongereza cyinjira mu Rwanda kubera intumbero zarwo zo guteza imbere ikoranabuhanga na serivisi zirishamikiyeho.

Hence Technologies itanga ubujyanama mu by’amategeko aho yifashisha ikoranabuhanga rigamije guhuza ibigo n’abashobora kubifasha mu buryo bw’amategeko mu gihe hari ibibazo.

Iki kigo gifite icyicaro ku Kimihurura mu Mujyi wa Kigali aho gitangira serivisi zacyo zitandukanye.

Umuyobozi uri mu bashinze Hence Technologies, Arun Shanmuganathan, yabwiye IGIHE ko bahisemo kwinjirira mu Rwanda kugira ngo bagukire ahandi muri Afurika.

Yagize ati “Twubaka ikoranabuhanga rifasha ibigo bitandukanye gufata ibyemezo ku banyamategeko bikwiye gukorana na bo ku buryo byazigama amafaranga ndetse bigakora amahitamo akwiye.’’

Binyuze muri iri koranabuhanga, Hence Technologies ifasha ibigo bikorana kugera ku makuru bishobora kwifashisha umunsi ku wundi.

Ati “Iryo koranabuhanga rifasha mu kunyura mu makuru yose ukeneye kandi mu buryo bworoshye.’’

Umuyobozi ushinzwe Ibikorwa by’Ubucuruzi [Business Development Manager] muri Hence Technologies, Nancy Ndekwe, yavuze ko batekereje gufasha ibigo kubona abanyamategeko mu gukuraho icyuho cyariho.

Yagize ati “Umwanya uhabwa ibijyanye n’amategeko twasanze udashyirwamo imbaraga. Twifuje kubaka igisubizo kitari ikireba gusa umugabane ahubwo gishobora no kugira ingaruka ku bukungu bw’Isi.’’

“Ibijyanye n’amategeko ni byo twifuje kurebaho muri iki gihe cya none. Ubu biragenda neza. Turi gukoresha ubwenge bw’ubukorano mu kubigeraho.’’

Mu kubaka iri koranabuhanga, Hence Technologies yaganiriye n’abayobozi b’ibigo bikomeye ku Isi, ariko iza gusanga benshi batakaza miliyoni z’amadolari mu kwishyura serivisi zijyanye n’amategeko.

Arun Shanmuganathan yakomeje ati “Twahisemo ko twashaka uburyo bukwiye bwafasha mu gutanga umuti kuri icyo kibazo.’’

Nancy yavuze ko ku isoko ry’u Rwanda basanze abantu benshi bakeneye kumenya abanyamategeko bihariye bakoresha bigendanye na serivisi zabo.

Ati “Ku isoko ry’u Rwanda n’irya Afurika, ntabwo biratera imbere kandi turifuza kugira uruhare mu kubizamura.’’

Hence Technologies yahisemo kwinjirira mu Rwanda kuko yanyuzwe n’icyerekezo cyarwo mu guteza imbere ikoranabuhanga.

Nancy yagize ati “Twahisemo u Rwanda kuko ruri mu cyerekezo cyo kuba igicumbi cy’ikoranabuhanga. Uko abantu bazakomeza gukoresha internet, uko bazakoresha ubwenge bw’ubukorano ndetse n’abanyempano barubonekamo.’’

“Ntukeneye kuba muri Silicon Valley ngo uhange igisubizo kizahakora. Turi kubaka uburyo nk’ubwo hano buzafasha gutanga igisubizo ku rwego mpuzamahanga.”

Ikibaya cya Silicon Valley giherereye muri Leta Zunze Ubumwe za Amerika gifatwa nk’umurwa mukuru wa sosiyete z’ikoranabuhanga zikomeye ku Isi.

Impuguke zigaragaza ko mu bigo bikomeye ku Isi mu by’ikoranabuhanga nibura 2% ari bo bahanga iterambere ryabyo riba rishingiyeho, ari na bo bategura imishinga y’ibitangaza nyuma y’iminsi igakwira Isi.

Umuyobozi uri mu bashinze Hence Technologies, Arun Shanmuganathan, yavuze ko u Rwanda barubonyemo nk’ahantu hazabinjiza neza mu ntego zabo.

Ati “U Rwanda ni igicumbi, aho gukorera ishoramari kuko abantu benshi bava ku mugabane bashaka kuba hano. Abashoramari bishimiye kuza hano, kuko hatekanye, nta kibazo. U Rwanda ni ahantu heza ho gutangirira, intego zacu ni izo kugera ku rwego mpuzamahanga. Tekereza rero kuzana abanyempano batandukanye hano mu gihugu.’’

Kuva yagera mu Rwanda, Hence Technologies yishimiye kubona abanyempano bafite ishyaka ryo guhanga ikoranabuhanga rizakemura ibibazo Isi ifite.

Arun Shanmuganathan yakomeje ati “Aha turavuga buri wese uri mu bijyanye n’ikoranabuhanga, ba rwiyemezamirimo, abashoramari, ababyeyi, abarezi n’abandi babona ko abantu bo mu Rwanda bari gutanga ibisubizo.’’

Yavuze ko imbogamizi bakibona zijyanye no kuba ibigo bimwe na bimwe bikoresha abanyamategeko biboneye bose.

Ku rwego rw’Isi, Hence Technologies ikorana n’ibigo bikomeye mu gihe mu Rwanda yibanda ku bijyanye n’ibikora muri serivisi z’uburezi.

Hence Technologies ikoresha abakozi batandukanye bagera kuri 25 baturuka mu bihugu 11 bitandukanye.

Umuyobozi uri mu bashinze Hence Technologies, Arun Shanmuganathan, aganira n'Umuyobozi ushinzwe Ibikorwa by’Ubucuruzi, Nancy Ndekwe
Mu bakozi ba Hence Technlogies harimo n'abanyamahanga
Hence Technologies ikoresha abakozi bagera kuri 25 baturuka mu bihugu 11 bitandukanye
Hence Technologies ifite icyicaro ku Kimihurura mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .