Iby’ingenzi kuri ‘Ayoba’ ya MTN ifasha mu kohereza ubutumwa, kumenya amakuru no gukina ku buntu

Yanditswe na Twarabanye Venuste
Kuya 3 Kanama 2020 saa 09:00
Yasuwe :
0 0

Sosiyete y’Itumanaho ya MTN Rwanda iherutse kuzanira abanyarwanda porogaramu yitwa ‘Ayoba’, ifasha abakoresha umuyoboro wayo kohererezanya ubutumwa bugufi, ubutumwa bw’amajwi, amashusho cyangwa inyandiko, gusoma amakuru no gukina imikino yo kuri telefoni ku buntu.

‘Ayoba’ ni ijambo rikoreshwa muri Afurika y’Epfo bashaka kuvuga ikintu ‘cyiza’ cyangwa ‘kimeze neza’. Urubuga Techpoint rutangaza ko MTN Group yarikomoye mu bukangurambaga yakoze mu 2010, bwo kwishimira igikombe cy’Isi Afurika y’Epfo yakiriye muri uwo mwaka.

Muri Werurwe 2019 nibwo byatangajwe bwa mbere ko MTN Group igiye gutangiza porogaramu Nyafurika, ndetse iza gutangizwa ku mugaragaro muri Gicurasi uwo mwaka. Imibare yerekena ko kugeza mu Ugushyingo 2019, nibura abagera kuri miliyoni imwe bayikoresha buri kwezi.

Muri Werurwe 2020 abantu miliyoni 2.5 muri Afurika bari bamaze kuyishyira muri telefoni zabo. MTN Group ifite intego ko abayikoresha bagera kuri miliyoni 16 mbere y’uko uyu mwaka urangira.

Kugeza ubu Ayoba ifatwa nka porogaramu Nyafurika kubera umwihariko wayo, harimo gukoresha indimi z’ibihugu bitandukanye bya Afurika zirimo n’Ikinyarwanda. Ni mu gihe nko muri Afurika y’Epfo ikoresha indimi umunani zikoreshwayo.

Imibare y’abakoresha Ayoba ikomeje kwiyongera kubera umwihariko irusha izindi mbuga nkoranyambaga.

Ku wa 17 Mata 2020 MTN Rwanda yatangarije abanyarwanda ko yabazaniye iyo porogaramu ku buntu, kugira ngo nabo bashobore kohererezanya ubutumwa butandukanye, basome amakuru kandi bakine imikino yo muri telefone ku buntu.

Mu Kiganiro IGIHE yagiranye n’umukozi wa MTN Rwanda mu ishami ry’iyamamazabikorwa, Christelle Sabwe Musonera, yavuze ko mu bituma iri kwitabirwa cyane harimo kuba nyuma yo kuyishyira muri telefoni, kuyikoresha ari ubuntu.

Ati “Umwihariko wayo wa mbere ni uko tuyihera abakiliya bacu ku buntu, ni ukuvuga ngo nta internet umukiliya yishyura cyangwa amafaranga ye ngo bigende. Turayiguha gusa ugacana internet, abakiliya benshi bagiye bumva ko ari ubuntu bagakuraho internet kandi iyo uyikuyeho ntabwo bishobora gukora, ariko icyo usabwa gusa ni ugushyiraho internet yawe hanyuma ugatangira gukoresha Ayoba nta mafaranga agenda, n’iyo ntabyo waba ufitemo Ayoba irakora.”

Undi mwihariko ngo ni uko bidasaba ko abantu bayikoresha hagati yabo bagomba kuba bayifite muri telefoni zabo nk’uko bigenda ku zindi. Umuntu apfa kuba akoresha Sim Card ya MTN gusa, ngo uramwandikira akagusubiza kandi atanafite telefone igezweho.

Yakomeje agira ati “Icya kabiri ni uko ubasha kwandikirana n’abantu bose ufite muri telefoni yawe, urabizi ko ku zindi applications bisaba ko mwembi muba muzifite muri telefoni kugira ngo mubashe gukora, ariko Ayoba n’iyo njyewe naba nyifite wowe utayifite, nshobora kukwandikira ukabona ubutumwa bugufi. Ni ukuvuga ngo niba ufite nimero ya MTN jyewe mfite Ayoba, ndakwandikira ubone ubutumwa bugufi unansubize, kandi nawe nusubiza ntabwo tukwishyuza iyi SMS uba wohereje.”

Mu gihe ku zindi mbuga nkoranyambaga uba ushobora kuganira n’abantu kandi ugasoma ibyo mwohererezanya cyangwa bandika bikarangirira aho, Ayoba yo ifite umwihariko wo gukiniraho imikino itandukanye ku buntu, kandi bidasabye kuyimanura (download).

Ati “Dushyiraho amashene, ujyaho ugasangaho amakuru atandukanye. Nk’ubu tuvuge hari aho ubona amakuru ya Coronavirus, ujyaho ugasanga amakuru ya siporo, ugasangaho imikino. Abantu benshi bagiye bakunda iki kintu cyane cyane urubyiruko, iyo tubabwiye ngo hariho imikino kandi nujya gukina iyo mikino nta internet uri bwishyure. Ni ukuvuga ngo ni ukujyamo ugakina kandi icyiza cyayo ntabwo bigusaba ngo uyimanure (download), uyikinira muri Ayoba ntijye muri telefoni yawe ngo imare umwanya.”

Gutangira gukoresha Ayoba muri telefoni bikoresha uburyo bubiri: ubwa mbere ni ukuba umuntu afite internet mu buryo busanzwe akajya muri Play store, kuko kugeza ubu iboneka kuri Android gusa, ubundi akayimanura akayishyira muri telefoni ye.

Gukora ibyo internet iba igenda ariko iyo birangiye, ibijyanye no kuyikoresha bisigara ari ubuntu.

Uburyo bwa kabiri, umuntu ajya aho asanzwe ashakira ibintu bitandukanye kuri internet, ni ukuvuga muri ‘Google chrome’, Mozilla, safaris, opera n’ahandi, akandikamo ‘ayoba.me’ ubundi agakanda ahanditse ‘download’ agakurikiza amabwiriza.

Gukoresha Ayoba ni ubuntu kandi ufite smartphone yandikira utayifite akabona ubutumwa bugufi, na we akabusubiza atishyujwe. Icyo bombi basabwa ni ukugira Sim Card za MTN.

Kuva ku wa 17 Mata 2020 MTN Rwanda izaniye abanyarwanda Ayoba, abagera ku bihumbi 70 bamaze kwitabira kuyikoresha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .