00:00:00 IGIHE NETWORK KN KINYARWANDA EN ENGLISH FR FRANCAIS

Amasomo y’ikoranabuhanga mu burezi bw’ibanze agiye guhabwa umwihariko

Yanditswe na Ntabareshya Jean de Dieu
Kuya 8 June 2022 saa 05:07
Yasuwe :

Umuyobozi Mukuru w’Ikigo gishinzwe guteza imbere uburezi bw’Ibanze mu Rwanda REB, Dr Nelson Mbarushimana yatangaje ko guha umwanya ikoranabuhanga mu mashuri bigiye kongerwa mu rwego rwo kuriteza imbere bahereye mu bakiri bato.

Ibi yabigarutseho ubwo REB yahembaga abanyeshuri 60 bo mu turere twose tw’igihugu bahize abandi mu ikoranabuhanga mu marushanwa yari yateguwe ku ikoreshwa rya Porogaramu ya ‘Scratch’ iri kwigishwa mu mashuri.

‘Scratch Programming’ yatangiye kwigishwa mu mashuri abanza n’ayisumbuye mu Rwanda igamije gushishikariza abanyeshuri gukunda ikoranabuhanga cyane ko yorohera uyikoresha.

Iyi ni porogaramu ifasha abanyeshuri gukora nk’inkuru mbarankuru ariko zishushanyije hakoreshejwe uburyo butandukanye burimo guhuza amashusho n’amajwi, imikino itandukanye, ubugeni n’ubundi buvumbuzi butandukanye.

Ifasha abana kandi kwiga neza byisumbuyeho cyane ko iborohereza gukunda ikoranabuhanga bijyanye n’urwego rwabo bagakoresha ubumenyi bafite mu kugaragaza ibintu no kwishakamo ibisubizo.

Umuyobozi Mukuru wa REB, Dr Nelson Mbarushimana yavuze ko bahisemo gutangiza iyi porogaramu mu mashuri kuko babonaga ikenewe kandi ifite agaciro mu gushishikariza abana kwiga ikoranabuhanga.

Ati “Muri gahunda ya NST1 biragaraga ko mu by’ukuri aba bana bagomba kwiga ikoranabuhanga, bakarikoresha kugira ngo bazabashe gukemura ibibazo, kwihutisha itarambere kugira ngo ikoranabuhanga rizabashe gutuma uburezi bugenda neza.”

Nubwo bimeze bityo hari abarimu bagaragaza ko usanga bimwe mu bigo bitandukanye bidaha agaciro amasomo arebana n’ikoranabuhanga aho usanga nta mwarimu waryize uhari, ibikoresho by’ibanze ndetse no guhitamo kwiga ibindi mu gihe cya ICT.

Umwe mu barimu bigisha ikoranabuhanga yanagaragaje ko nko mu bigo by’amashuri yisumbuye, usanga ryigishwa amasaha abiri ku cyumweru bityo ko ari make ugereranyije n’ibyo abana bakwiye kwigishwa.

Dr Mbarushimana yasobanuye ko mu nteganyanyigisho y’umwaka utaha ikoranabuhanga rizahabwa umwanya ukwiye kuko bimaze kugaragara ko ariho ubukungu buzaba bushingiye mu myaka iri imbere.

Ati “Nk’uburezi bw’ibanze, dufite gahunda yo kubakira uburezi bwacu ku ikoranabuhanga, kuko murabibona ko abana bo mu mwaka wa kane w’amashuri abanza bashobora gukora porogaramu y’ikoranabuhanga kandi igaragaza ubutumwa no gukemura ikibazo gihari.”

Yakomeje agira ati “Ikigomba gukorwa ni ugukomeza gufasha mu gukoresha amasaha ahari kugira ngo akoreshwe neza. Ikindi ni uko mu mpinduka twakoze mu nteganyanyigisho zacu n’amasaha yarongerewe.”

Abahize abandi bashimiwe

Aya marushanwa yateguwe n’Urwego rw’Igihugu rushinzwe uburezi bw’Ibanze mu Rwanda ku bufatanye n’umufatanyabikorwa mu burezi bw’u Rwanda VVOB.

Ni amarushanwa yatangiriye ku rwego rw’ibigo by’amashuri agenda azamuka mu byiciro kugera ku rwego rw’Igihugu.

Abahatanye ku rwego rw’igihugu ni abanyeshuri 30 ba mbere muri buri karere mu mashuri abanza ndetse na 30 bo mu yisumbuye.

Kuri uyu wa Kabiri tariki ya 7 Kamena 2022 nibwo ayo marushanwa yasojwe hahembwa abana bahize abandi muri abo bose uko ari 60.

Nubwo aba banyeshuri bose bageze ku rwego rw’igihugu bashimiwe ariko batatu ba mbere muri buri cyiciro bahembwe by’umwihariko kuko bahawe igikombe, mudasobwa n’ibikoresho by’ishuri.

Mu mashuri abanza abahembwe ni Gihozo Yvan Bruno, wo mu Karere ka Ngoma mu Murenge wa Sake wabaye uwa mbere aho yakoze umushinga ugaruka ku kamaro k’inama ya CHOGM itegerejwe mu Rwanda, Niyogisubizo Bellami wabaye uwa kabiri na Iranzi Zache wo mu Mujyi wa Kigali wabaye uwa gatatu.

Gihozo Yvan w’imyaka 11, kuri ubu yiga mu mwaka wa Gatanu mu Ishuri ribanza rya Gafunzo. Yabwiye IGIHE ko nubwo yiga ku kigo bigoye kubona umwanya uhagije wo gukoresha ikoranabuhanga, afatanyijwe n’abarimu ndetse n’ababyeyi akomeza guhangana mu ikoranabuhanga kuko ari inzozi ze.

Yavuze ko ibihembo yahawe bishobora kuzamufasha mu kwihugura mu ikoranabuhanga ndetse no kugera ku nzozi ze zo kuba intyoza mu birebana n’ikoranabuhanga.

Ku ruhande rw’abanyeshuri biga mu mashuri yisumbuye naho hahembwe abanyeshuri batatu bahize abandi aho uwa mbere yahawe igikombe. Abo ni Nahimana Moise wo mu Karere ka Rulindo, Kwizera Emmanuel na Gashagaza André wabaye uwa gatatu.

Umwe mu barimu bigisha ikoranabuhanga, Umukiza Jean Paul, yavuze ko nubwo ikoranabuhanga rigenda ritera imbere bagikunze guhura n’imbogamizi zirimo amahugurwa make, ibikoresho bike birimo internet mu mashuri, amashuri atarabona mudasobwa, icyumba cy’ikoranabuhanga kiri mu bigo bimwe na bimwe ndetse no kudaha agaciro ICT.

Aba banyeshuri basabwe kugira uruhare mu kurushaho guteza imbere ikoranabuhanga
Guteza imbere ikoranabuhanga bizahera no mu bato
Nahimana Moise wo mu Karere ka Rulindo niwe wahize abandi mu mashuri yisumbuye
Umuyobozi wa REB, Dr Nelson Mbarushimana yagaragaje ko ikoranabuhanga rigiye kongererwa amasaha mu mashuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .