Inama y’Abaminisitiri yateranye ku wa 18 Nzeri 2026 muri Village Urugwiro iyobowe na Perezida Kagame, yemeje amasezerano y’ishoramari hagati ya Guverinoma y’u Rwanda na Chery Holding Rwanda Ltd.

Ashingiye kuri gahunda yo kubaka uruganda ruteranya imodoka zikoresha amashanyarazi mu Rwanda binyuze mu mushinga w’ikigo cya Chery Holding Group cy’Abashinwa.

Ni intambwe idasanzwe mu rwego rw'inganda mu Rwanda, kuko yafunguye amarembo yo kubaka uruganda rwihariye ruteranya imodoka z'amashanyarazi i Kigali, umujyi ukomeje kwimakaza iterambere ritangiza ku muvuduko uri hejuru.

Biteganyijwe ko iki gikorwa kizahindura u Rwanda igicumbi cy’ikorwa ry’izi modoka zirengera ibidukikije mu bihugu bigize Umuryango wa Afurika y'Iburasirazuba [EAC] ndetse no ku Isoko Rusange rya Afurika [AfCFTA].

Uyu mushinga unashimangira intambwe ikomeye igihugu kimaze gutera mu rwego rw'inganda zikora imodoka kuva uruganda rwa Volkswagen rwagera mu Rwanda mu 2018, n’izindi.

Chery si agafu k’imvugwarimwe, ni ikigo gikomeye kizwi ku Isi. Yashinzwe ku wa 8 Mutarama 1997, itangirira mu kibanza cy'igishanga mu Mujyi wa Wuhu mu Ntara ya Anhui, umujyi utari usanzwe ufite amateka na make mu gukora imodoka.

Iki kigo cyashinzwe mbere cyitwa Anhui Auto Parts Company Limited, mu gihe imikoranire n'ibigo by'abanyamahanga ari yo yari yihaririye isoko ry'imbere mu Bushinwa muri icyo gihe.

Chery yamaze imyaka icumi ya mbere yubaka ubushobozi bwayo, aho muri icyo gihe yakoze imodoka zayo za mbere zigera kuri miliyoni. Uyu munsi, ibi byabaye amateka, Chery ifata ikibanza gihoraho mu bijyanye no gukora imodoka.

Ikigo cya Chery Holding Group, cyaje ku mwanya wa 385 ku rutonde rw'ibigo 500 bikomeye ku Isi mu 2024 [Fortune Global 500] ndetse kiza ku mwanya wa 233 mu 2025.

Cyagutse kiba ihuriro ry'ibigo bikora ibintu bitandukanye, aho ubu gifite amashami arenga 500 kandi gikorera mu bihugu birenga 80.

Ku rwego rw'ikigo gikuru, inyungu ya Chery yagiye itumbagira mu buryo bugaragara. Amafaranga yinjizwa n'ikigo yarenze miliyari 300 z’Ama-Yuan (arenga miliyari ibihumbi 65,7 Frw) ku nshuro ya mbere mu 2023, agera kuri miliyari 315,1 ’Ama-Yuan (arenga miliyari 69 Frw), bikaba byari izamuka rya 50% ugereranyije n'umwaka wabanje.

Mu 2024, amafaranga ikigo cyinjije yageze kuri miliyari 480 z’Ama-Yuan (arenga miliyari ibihumbi 100 Frw) , biba akandi gahigo.

Mu 2025, ishami ry'iki kigo riri ku isoko ry'imigabane ryitwa Chery Automobile Co., Ltd., ryatangaje ko ryinjije miliyari 300,29 z’Ama-Yuan (arenga miliyari ibihumbi 65 Frw) bigaragaza izamuka rya 11,3% ugereranyije n’umwaka wabanje.

Amafaranga yinjiye aturutse mu mahanga yageze kuri miliyari 157,42 z’Ama-Yuan (miliyari ibihumbi 34 Frw) aruta ayavuye mu Bushinwa ku nshuro ya mbere kuko yari miliyari 142,87 z’Ama-Yuan (arenga miliyari ibihumbi 31 Frw). Inyungu y'iki kigo yazamutseho 36,1% igera kuri miliyari 19,51 z’Ama-Yuan (arenga miliyari 4.200 Frw) mu 2025.

Ubwo iki kigo cyashyiraga imigabane yacyo ku isoko rya Hong Kong ku nshuro ya mbere muri Nzeri 2025, byakozwe ku rwego rwa Chery Automobile Co., Ltd., ari rwo rwego rukora imodoka, aho kuba ikigo gikuru.

Iki gikorwa cyabyaye miliyari 9,145 z’Amadolari ya Hong Kong [angana na miliyari 1,18 z’Amadolari ya Amerika], aho umugabane umwe wagurishijwe Amadorari ya Hong Kong 30,75, iki kikaba cyari igiciro cyo hejuru cyane bari bateganyije, ibyatumye kiba igikorwa cyagutse cyane cyo gushyira imigabane ku isoko ku nshuro ya mbere mu rwego rw'imodoka muri Hong Kong muri uwo mwaka.

Agaciro k’imigabane kazamutseho 11,2% ku munsi wa mbere.

Mu myaka 23 yikurikiranya, Chery yagumye ku ntebe y'ikigo cya mbere mu Bushinwa cyohereza mu mahanga imodoka zitwara abantu.

Mu 2025 gusa, iki kigo cyagurishije imodoka zirenga miliyoni 2,8 ku Isi hose, aho izoherejwe mu mahanga zingana na hafi 48% by'imodoka zose zagurishijwe [imodoka zirenga miliyoni 1,34].

Mu Ukuboza 2025, Chery yabaye uruganda rukora imodoka rwa mbere mu mateka y'u Bushinwa rwohereje mu mahanga imodoka zirenga ibihumbi 140 mu kwezi kumwe.

Kugeza ubu, umubare w'imodoka zose bamaze kohereza mu mahanga wageze kuri miliyoni 5,85, bivuze ko imwe mu modoka eshanu zikorerwa mu Bushinwa zoherezwa ahantu aho ari ho hose ku Isi iba ari iya Chery.

Chery igendera kuri gahunda yo kugira amoko menshi atandukanye y’imodoka kugira ngo igere ku byiciro bitandukanye by'abaguzi ku Isi.

Ubwoko bw'ibanze mu modoka za Chery bufatwa nk'ishingiro ry'isoko ryayo rwagutse, ni imodoka zikunzwe cyane zo mu cyiciro cya SUV za Tiggo 7 na Tiggo 8, aho hagurishijwe izirenga miliyoni 1,7 mu 2025. Izi zigereranywa n’iza Toyota cyangwa Hyundai.

Amoko y'imodoka akunze koherezwa ku masoko yo mu mahanga nka Omoda Jaecoo, aba ahanini agenewe abaguzi bakiri bato bo mu mijyi ndetse n'abakunda imodoka zubakiwe guhangara imihanda mibi [off-road enthusiasts], aho zose hamwe zigize 37% by’izagurishijwe mu mahanga.

Hagati aho, ubwoko bwa Exeed bubarwa nk’imodoka zihenze z'iki kigo. Hari n’izo mu bwoko bwa Luxeed, zikorwa binyuze mu mikoranire na Huawei mu rwego rw'ikoranabuhanga ryo ku rwego rwo hejuru [Harmony Intelligent Mobility Alliance].

Mu gukora izi modoka za Luxeed, hiyambazwa ubumenyi bwa Chery mu gukora imodoka na porogaramu ziteye imbere, ibyumba by'imbere mu modoka ndetse n'ikoranabuhanga rituma imodoka yitwara ubwayo bya Huawei.

Muri Nyakanga 2026, Chery yaguze uruganda rwahoze ari urwa Nissan rwitwa Rosslyn ruri hafi ya Pretoria muri Afurika y'Epfo, ihashyira icyicaro cyayo gikuru kuri uyu mugabane gishinzwe gukora imodoka ndetse n'ubushakashatsi.

Ibi bigaragaza ko kubaka uruganda rushya i Kigali biri mu ngamba zidasanzwe zo kwagurira ibikorwa byayo muri Afurika.

Afurika y'Epfo izakora nk'icyicaro gikuru cy'inganda zagutse za Chery muri Afurika, mu gihe u Rwanda rwo ruzakora nk'gicumbi cyo guteranya imodoka z'amashanyarazi mu Karere k'Afurika y'Iburasirazuba n’ahandi ku mugabane.

Uyu mushinga mu urw’imisozi igihumbi washinze imizi nyuma y’amasezerano y'ubwumvikane yasinywe muri Mata 2025 n'Urwego rw'Igihugu Rushinzwe Iterambere, RDB, na Chery Holding Group.

Nyuma Muri Mata 2026, Perezida Kagame yakiriye Xu Hui, Visi Perezida wa Chery Holding Group akaba n’Umuyobozi Mukuru wa Rich Resource International Investment, aho ibiganiro byabo byibanze ku mahirwe y’ishoramari arimo no guteranyiriza imodoka mu Rwanda.

Uyu mushinga kandi ujyanye neza na politiki y'ubukungu n'iyo kurengera ibidukikije mu Rwanda, nk’itegeko ryo muri Mata 2026 risaba inzego za leta kugira 30% by’imodoka zazo izikoresha amashanyarazi gusa.

Kubaka uruganda ruteranya imodoka i Kigali, bivuze ko Chery na yo izungukira muri zimwe mu ngamba zafashwe na Leta y’u Rwanda mu rwego rwo gukurura ishoramari muri uru rwego, zirimo ubusonerwe bw'imisoro ku modoka z'amashanyarazi n’ibindi bikoresho bijyana na zo, ndetse no koroherezwa kugura ibikoresho byifashishwa mu kubaka sitasiyo z’izi modoka no kugenerwa aho zubakwa.

Nubwo Inama y’Abaminisitiri yemeje aya masezerano, amakuru arambuye ku gaciro k’ishoramari, aho uruganda ruzubakwa, ubushobozi ruzaba rufite bwo guteranya imodoka, igihe imirimo yo kurwubaka izatangirira n’igihe ruzatangirira gukora ntabwo aratangazwa.

Gusa inyandiko z'ishoramari z'Urwego rw'Igihugu Rushinzwe Iterambere zigaragaza ko byibuze hakenerwa ikigero cy'ishoramari [indicative investment requirement] cya miliyoni 39,25 z'Amadolari ya Amerika n'amahirwe yo gutanga imirimo ihoraho igera ku 2000 ku mushinga rusange w’uruganda rwo guteranya imodoka z'amashanyarazi.

Gusa ariko iyi imibare ntiremezwa neza ko ariyo izagenderwaho n’uruganda rwa Chery.