{Nkuko byari biteganijwe ku mugoroba wo kuwa Gatanu tariki ya 20 Ukuboza 2013, i Gikondo muri Tella Vista, habereye ibirori bidasanzwe byahuje ibyamamare mu ngeri zitandukanye n’abakunzi babo, ibirori bizwi ku izina rya Inyarwanda fans hongout.}

Ni ku nshuro ya kane ibi birori bimaze kumenyekana cyane hano mu Rwanda byari bibaye, aho byari byitabiriwe n’ibyamamare bitandukanye harimo abakinnyi b’umupira w’amaguru, abanyamuziki, abanyarwenya, abakinnyi b’amafilimi, abakinnyi b’amakinamico bazwi, n’abandi bafana b’urubuga rwa Inyarwanda bose muri rusange.

Ahagana ku isaha ya saa kumi n’ebyiri n’igice, nibwo ibirori nyir’izina byatangiye bibimburiwe n’isengesho, nyuma hakurikiraho umuhango wo kunyura ku itapi itukura ku byamamare byari byitabiriye ibi birori.

Uretse ibi byamamare, abayobozi batandukanye mu nzego za Leta biganjemo ab’inzego z’urubyiruko, ndetse na minisiteri y’umuco na Siporo, yari ihagarariwe na Lauren Makuza, umuyobozi ushinzwe umuco muri iyi minisiteri ari nawe wari umushyitsi mukuru, nabo bakaba bari baje kwifatanya n’abakunzi b’imyidagaduro mu Rwanda.

Kanda hano urebe abantu bose bari bitabiriye iki kirori

Ubusabane busesuye, gutarama no kwifotozanya hagati y’abakunzi b’imyidagaduro n’ibyamamare, nibyo byaranze ibi birori nk’uko ari kimwe mu biba bigenderewe mu gutegura ibi birori.

Mu ijambo ry’umuyobozi mukuru wa Inyarwanda ltd, ari nayo ifite inyarwanda.com, Joseph Masengesho, yagarutse ku ntego uru rubuga rwatangiranye yo gutanga umusanzu mu iterambere ry’ubuhanzi n’umuco nyarwanda, aboneraho no gushimira buri wese ugira uruhare mu gushyigikira ibikorwa by’uru rubuga.

Joseph Masengesho yagize ati: “Intego yacu ari nayo twatangiranye, ni ukuzamura inganzo nyarwanda, ndetse n’umuco nyarwanda, bikarushaho kumenyekana mu mahanga, tukaba dukomeza gushimira abakomeza kutuba hafi badushyigikira mu buryo butandukanye, byumwihariko tukaba dushimira abaje kwifatanya natwe kuri uyu mugoroba ugamije guhuza aba-star n’abafana babo.”

Makuza Lauren, uhagarariye iterambere ry’umuco muri Minisiteri y’Umuco na Siporo mu Rwanda, wari umushyitsi mukuru muri ibi birori, yashimye byimazeyo abagize igitekerezo cyo gushyiraho iyi gahunda yo guhuza ibyamamare byose mu Rwanda n’abakunzi babo, gusa akaba yashishikarije abaterankunga n’ibigo bitandukanye ko bakwiye gushyira ingufu mu gushyigikira umuziki n’imyidagaduro muri rusange mu Rwanda.

Nelly Wilson, umuyobozi w'Inyarwanda ltd ushinzwe ibikorwa(COO) yashimiye abaterankunga b’iki gikorwa, biganjemo abafatanyabikorwa ba Inyarwanda ba buri munsi, barimo; AIRTEL, Positive Production, East African Promoters, Contact FM, Radiant Insurance company, TV10 na Radio 10, The New Times, Umuryango.com, IGIHE Ltd, The Ceciliaz, Fantastic Restaurant, KONKA, Family TV, Sulfo Rwanda, PRIMUS, Tella Vista, Call Rwanda, na Ian Boutique.

Foto:
– Inyarwanda
– IGIHE