Iyi drone yamurikiwe mu Karere ka Musanze, kuri uyu wa Gatatu, tariki ya 7 Ukuboza 2016,biteganyijwe ko izafasha abahinzi bagera ku 2000, bibumbiye mu makoperative 20 ahinga ibirayi, bahuriye mu Rugaga Imbaraga, rukorera mu Turere twa Nyabihu, Burera na Musanze.

Iri koranabuhanga rishingiye ku gukoresha drone mu buhinzi bw’ibirayi ku nshuro ya mbere, byitezwe ko rizatanga amakuru afatika ku mikurire y’ibirayi ndetse rikanagaragaza uburwayi bishobora kuba bifite.

Izajya yifashishwa mu buryo bw’ikusanyamakuru arebana n’uko ubuso bw’ubutaka buhinzweho bumeze, indwara mu bihingwa, ingano y’ifumbire abahinzi bakoresha ibereye ubuso buhinzweho n’andi makuru agaragaza ingano y’umusaruro witezwe kuri ubwo buso.

USAID ibinyujije mu mushinga wayo PSDAG (Private Sector Driven Agricultural Growth) ugamije kongera umusaruro w'ubuhinzi mu bikorera, ku bufatanye n’IKompanyi Nyarwanda ya AgriLift, itanga amakuru y’ikoranabuhanga, mu rwego rwo kugenzura mu buryo bwimbitse imikurire y’ibihingwa mu mirima.

Intego ya AgriLift yubakiye ku gukoresha izi ndege mu rwego rwo guha abahinzi ndetse na koperative zikorera imbere mu gihugu amakuru yihuse ku bihingwa byabo azabafasha gufata ingamba zifatika mu kubibungabunga.

Abahinzi b’ibirayi bo mu Karere ka Musanze batangaza ko ikoranabuhanga rishingiye ku gukoresha Drone mu buhinzi bw’ibirayi, rizatuma umusaruro wabo urushaho kwiyongera kuko zizajya zitanga amakuru yose akenewe mu buhinzi.

Nsekeramariya Perpétue yagize ati “Twahingaga ibirayi tugafumbira ariko rimwe na rimwe bigapfa tugasarura bike kubera kutamenya icyo ibihingwa bikeneye cyangwa uburwayi byahuye nabwo. Utu tudege tuzajya tuduha amakuru yose ajyanye n’ibyo igihingwa n’umurima bikeneye bityo umusaruro wiyongere.”

Gafaranga Joseph, umuhinzi na we yashimangiye ko iri koranabuhanga rizatuma umusaruro wiyongera.

Ati “Ubu natwe tugiye kujya dukora ubuhinzi bw’umwuga kuko tuzamenya umusaruro ushobora kuboneka bityo tugirane amasezerano n’abaguzi cyangwa amabanki umuhinzi atere imbere.”

Bamwe muri aba bahinzi bavuga ko umusaruro ukunze kuboneka ari muke bitewe no kuba nta makuru ahagije baba bafite.

Ikigo cy’Igihugu cy’Ubuhinzi n’Ubworozi, RAB, cyemeza ko ikoreshwa rya drone rizatuma intego yitezwe mu kuzamura umusaruro w’ubuhinzi igerwaho uko bikwiye nk’uko bivugwa n’Umuyobozi wacyo mu Ntara y’Amajyaruguru, Izamuhaye Jean Claude.

Ati “Amakuru yose azajya akusanywa n’utu tudege azajya agezwa ku bahinzi ku gihe hashakwe ibisubizo byihuse igihe hagaragaye ikibazo ari na byo bizadufasha kuzamura umusaruro w’ubuhinzi bw’ibirayi.”

Iki gikorwa cyatangirijwe mu masite atatu abarizwa mu Mirenge ya Cyuve na Nyange yo mu Karere ka Musanze kikazakorerwa no mu turere twa Burera, Nyabihu na Rubavu.

Kuri ubu abahinzi 1350 bibumbiye muri koperative nibo bagejejweho iyi gahunda, bakaba barahuje ubutaka, biteganyijwe ko uyu mubare ushobora kugera ku 2000.

[email protected]