00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Bahawe ibiti 27,000 byitezweho kurwanya imirire mibi no kubungabunga ibidukikije

Yanditswe na Nsanzimana Erneste
Kuya 3 April 2022 saa 03:22
Yasuwe :

Abaturage bo mu murenge wa Gihango mu karere ka Rutsiro bavuze ko ibiti by’imbuto n’ibivangwa n’imyaka bahawe bazabibungabunga kugira ngo bizabafashe kurwanya imirire mibi n’isuri ibatwarira ubutaka ikabujyana mu kiyaga cya Kivu.

Babitangaje nyuma y’uko abo mu tugari dutatu twegereye ikiyaga cya Kivu bahawe ibi biti birimo amatunda, ibinyomoro na avoka ndetse n’imirama y’imboga zitandukanye.

Muhawenimana Marcelline wo mu kagari ka Shyembe yabwiye IGIHE ko ibiti by’imbuto n’ingemwe z’imboga bahawe bizabafasha kurwanya imirire mibi.

Ati "Ibi biti n’izi ngemwe z’imboga tugiye kubitera, imbuto n’imboga nibyera tuzajya tuzigaburira abana bave mu bugwingire, imirire mibi icike kuko imbuto n’imboga ari byiza mu buzima".

Nzitonda Victor w’imyaka 52, yashimye umuryango ARCOS wabahaye ibi biti, avuga ko bizabafasha kurwanya isuri kandi iby’imbuto n’imboga bikazabagirira akamaro gakomeye.

Ati " Mu gihe bizaba bikuze bizadufasha kwihaza mu biribwa. Dusanzwe dufite abana bagwingiye kubera kudahabwa indyo yuzuye. Ubwo tubonye imbuto n’imboga nta mwana wacu uzongera kugwingira bibaho".

Ibi biti byatanzwe mu rwego rwo gushyira mu bikorwa umushinga ugamije guteza imbere isano iri hagati y’amazi, ingufu, kwihaza mu biribwa, n’ibidukikije mu nkengero z’ikiyaga cya Kivu by’umwihariko ku mugezi wa Koko mu Rwanda, no ku umugezi wa Lwiro muri DRC.

Uyu mushinga ushyirwa mu bikorwa n’umuryango wa Albertin Rift Conservation Society (ARCOS), ku bufatanye n’ Akarere ka Rutsiro, ikigo Autorité du bassin du lac Kivu et de la rivière Ruzizi/Rusizi (ABAKIR), Ikigo cy’Igihugu Gishinzwe Umutungo Kamere w’Amazi (RWB), ku nkunga y’Umuryango w’Ibihugu by’Ubumwe bw’Uburaya (EU) binyuze mu kigo cy’Iterambere cy’Abadage (GIZ).

Kubwimana Jean Paul, umukozi wa ARCOS uyoboye uyu mushinga, yavuze ko ibi biti babyitezeho kurwanya imirire mibi, kurwanya isuri no guha abaturage amafaranga binyuze mu kugurisha imbuto bazaba bejeje.

Ati "Ibi biti by’imbuto bisaga ibihumbi 9 bije byiyongera ku biti ibihumbi 17 abaturage bateye ku miringoti bacukuye tubahemba ndetse banateye ibiti ku mugezi wa Nyakibanda n’uwa Koko yamanukanaga isuri ikayijyana mu Kiyaga cya Kivu".

Yongeyeho ko mu rwego rwo kubungabunga ibi biti ndetse n’ibindi bikorwa by’umushinga, hashyizeho komite ishinzwe kubibungabunga kandi ko kugeza ubu ikora neza.

Abatuye uyu murenge bafashijwe gucukura imirwanyasuri, gutera ibiti 17,000 bivangwa n’imyaka ku mirwanyasuri no ku nkengero z’umugezi wa Koko n’utugezi tuyishamikiyeho ahareshya n’ibilometero 5,5

Uretse ibi biti ibihumbi 27, abatuye muri aka gace batoranyijwemo imiryango 100 yahawe ku ikubitiro imbabura zirondereza ibicanwa ku kigero cya 32.9%, ndetse ikagabanya n’imyuka mibi ihumanya ikirere.

Bamwe mu baturage bahawe imbabura zitangiza ibidukikije
Abaturage bishimiye umusanzu wabo mu kurengera ibidukikije batera ibiti
Mu biti byatanzwe harimo iby'imbuto nabyo byitezweho kurwanya imirire mibi
Abaturage bavuga ko mbere isura yajyaga ibatwarira ubutaka ikabujyana mu kiyaga ya Kivu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .