00:00:00 IGIHE NETWORK KN KINYARWANDA EN ENGLISH FR FRANCAIS

Rulindo: Abacukura amabuye y’agaciro nabi bashyira mu kaga ibidukikije baburiwe

Yanditswe na Claude Bazatsinda
Kuya 28 August 2022 saa 04:03
Yasuwe :

Ubuyobozi bw’Akarere ka Rulindo bufatanyije n’abakora ubucukuzi bw’amabuye y’agaciro bwatangije imirimo yo kurengera Umusozi wa Mahaza kuri hegitari 116 zari zibasiwe isuri kubera ubucukuzi bw’amabuye y’agaciro butubahirije amategeko.

Kuri uyu musozi niho hatangirijwe igikorwa cyo kurwanya isuri yibasiye imwe mu misozi yo mu Karere ka Rulindo yiganjemo ikorerwaho ubucukuzi bw’amabuye y’agaciro bikorohera isuri gutwara ubutaka.

Umuyobozi w’Akarere ka Rulindo, Mukanyirigira Judith, yasabye abaturage bose gukora ibishoboka bakarengera ubutaka bwibasiwe n’isuri by’umwihariko abakora mu bucukuzi bw’amabuye y’agaciro.

Yagize “Iyo urebye muri iki gihe turi gutakaza ubutaka bwinshi kubera isuri, turasaba buri muntu wese aho afite ubutaka kububungabunga agacukura imirwanyasuri, agahingaho ibiti bibufata haba ibivangwa n’imyaka cyangwa ishyamba ndetse no kubuteraho ubwatsi kugira ngo tuburengere kuko iyo isuri ibutwaye, itwara ubwo hejuru burumbutse ugasanga nyuma kwezi ntibigishoboka kandi yangiza n’imibande, ibibaya n’imigezi."

Yasabye abagikora ubucukuzi bw’amabuye y’agaciro butemewe kubihagarika birinda ibihano.

Ati “Usibye kuba ubwo bucukuzi butemewe bushyira ubuzima bwabo mu kaga ni n’icyaha gihanwa n’amategeko, abaturage rero bagomba kubyirinda bagakora ibyemewe bakiteza imbere."

Bamwe mu bakora mu bucukuzi bw’amabuye y’agaciro nabo bemeza ko ari bo bagomba gufata iya mbere mu kurengera ubutaka baburinda isuri kuko ariwo mutungo kamere utunze benshi.

Ryumugabe Sam, umukozi wa Trinity Metals ikora ubucukuzi bw’amabuye y’agaciro mu Turere twa Rulindo na Rwamagana yagize ati “Iyi migezi yose yiroha muri Nyabarongo ituruka mu mibande y’iyi misozi ihanamye, turi gucukura amaterasi kugira ngo azadufashe gufata ubwo butaka ndetse tunahasubiranye mu gutera ibiti. Kurwanya isuri si iby’umuntu umwe kuko ingaruka zayo yitugiraho ingaruka twese, turasaba ubufatanye bwa twese no kwirinda ubucukuzi bw’amabuye y’agaciro butemewe kuko nibyo byangiza cyane ubutaka."

Bamwe mu baturage bo mu Murenge wa Ntarabana iyo mirimo yo kurwanga isuri yakorewemo, bavuga ko nabo bazarushaho kubungabunga iyo misozi kuko ingaruka z’isuri yahacaga ari bo yageragaho vuba bakahahombere.

Furaha Jean Marie Vianney, yagize ati “Murabona kuri uyu musozi nta biti byahabaga, iyo imvura yagwaga yatwaraga ubutaka bukagenda bugataba imyaka yacu twahingaga hafi y’uriya mugezi wa Rusiga ndetse n’uriya mugezi ukuzura n’inkombe zigatwarwa n’amazi, ubu natwe tugiye kurushaho kubungabunga iyi misozi tuyirinda abantu bakora ubucukuzi bw’amabuye y’agaciro kuko nibo bari barayangije bahakora ubwo bucukuzi.”

Akarere ka Rulindo gakungahaye mu bucukuzi bw’amabuye y’agaciro akunze gucukurwa mu misozi yaho ariko haracyari hamwe usanga hakiri abacukuzi babikora mu buryo bunyiranyije n’amategeko.

Meya Mukanyirigira yifatanyije n'abatuye Ntarabana mu muganda rusange
Hagaragajwe ko ubucukuzi bugira uruhare runini mu kwangiza ibidukikije muri Rulindo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .