00:00:00 IGIHE NETWORK KN KINYARWANDA EN ENGLISH FR FRANCAIS

Ni izihe ngamba zihari ku myuzure n’imvura ikomeje gutwara ubuzima bw’abantu?

Yanditswe na Akayezu Jean de Dieu
Kuya 25 April 2022 saa 12:50
Yasuwe :

Ubuyobozi bw’Umujyi wa Kigali, Uturere n’Ikigo cy’Igihugu cyo Kubungabunga Ibidukikije (REMA), butangaza ko hakomeje gukorwa ibarura ry’ibyangijwe n’imvura yaguye mu mpera z’icyumweru gishize aho yahitanye ubuzima bw’abaturage ikanasenya ibyabo.

Nk’imvura yaguye ku wa Gatandatu, muri Nyamasheke yishe abantu batandatu barimo abana batanu, aho bagwiriwe n’inkangu yatewe n’iyi mvura nyinshi yari yaguye mu bice hafi ya byose by’igihugu.

Ubuyobozi bwa REMA bwavuze ko hari ingamba zirimo gufatwa kugira ngo ikibazo cy’imvura ikomeje gutwara ubuzima bw’abantu kigabanuke by’umwihariko mu Mujyi wa Kigali no mu bindi bice by’igihugu.

REMA ivuga ko ibishanga bifite uruhare runini mu kurwanya ingaruka z’imihindagurikire y’ibihe.

Iti “Bifite kandi akamaro ntagereranywa ko gucumbikira urusobe rw’ibinyabuzima bitandukanye, kubika no kuyungurura amazi, kugabanya imyuka ihumanye kandi bikagira uruhare mu kugabanya imyuzure.”

REMA ibinyujije ku mbuga nkoranyambaga zayo yagize ati “Imvura yaraye iguye yateje imyuzure mu Mujyi wa Kigali yangiza imyaka yari ihinze mu bishanga bitandukanye byo muri Kigali.”

“Imvura kandi imaze iminsi yangiza bimwe mu bikorwaremezo birimo inzu n’ibiraro hirya no hino mu Rwanda.”

Ubuyobozi bwa REMA butangaza ko binyuze mu mishinga itandukanye n’abafatanyabikorwa hari gahunda yo gusana ibishanga bitanu bizaza byiyongera ku gishanga cya Nyandungu giherutse guhinduka Parike y’Ubukerarugendo ya Nyandungu. Ni igishanga kizatangirwamo serivisi zirimo kwigisha, kuruhuka no kwidagadura.

Ibindi bishanga bizavugururwa harimo icya Kibumba, Nyabugogo, Rugenge-Rwintare, Rwampara na Gikondo.

Umujyi wa Kigali na wo wakanguriye abatuye ahashobora gushyira ubuzima bwabo mu kaga kuhimuka no gutanga amakuru hakiri kare.

Ubinyujije ku mbuga nkoranyambaga wagize uti “Turabibutsa gusibura imiyoboro y’amazi, gufata amazi y’imvura no kwimuka mu nzu zenda gusenyuka.”

Umujyi wa Kigali kandi utangaza ko wakoze inyingo ku bishanga bitandatu bikunze kwibasirwa n’imyuzure birimo icya Ruguna, Gisozi-Umukindo, Rwandex, Kinyinya na Nyabisindu.

Inkuru bifitanye isano

Inkangu ni kimwe mu bihitana ubuzima bw'abantu mu bihe by'imvura nyinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .