Iyi pariki kandi ifite umwihariko wo kubonekamo inyamaswa nk’impundu, isisi n’inkomo ziboneka mu bihugu bike ku Isi.

Nubwo biri uko, urusobe rw’ibinyabuzima biboneka muri iyi pariki ruracyabangamiwe n’ibibazo birimo ubushimusi bw’inyamaswa, ubucukuzi bw’amabuye y’agaciro, n’abatwika ishyamba ku mpamvu zinyuranye nubwo bigenda bigabanyuka.

Umuyobozi w’Ikigo Nyungwe Management Company (NMC) gishinzwe kubungabunga Pariki y’Igihugu ya Nyungwe, Protais Niyigaba, yavuze ko mu myaka itanu ishize bamaze gukura muri iyi pariki imitego 43.699.

Ati “Nubwo hari intambwe igenda iterwa haracyari intambwe yo gutera mu kugabanya ibibangamiye Pariki ya Nyungwe. Mu mwaka ushize twashoboye gukura muri pariki imitego yica inyamaswa irenga 6.000. Twishimira ko yagabanyutse ikava ku bihumbi 11 mu mwaka wa 2022.”

Mu mitego 43.000 yakuwe muri Pariki ya Nyungwe mu myaka itanu ishize harimo 6.640 yabonetse mu 2021, imitego 10.431 iboneka mu 2022, imitego 11.259 iboneka mu 2023, imitego 6.831 iboneka mu 2024, mu 2025 haboneka imitego 6.767. Mu mezi atandatu ya 2026 hamaze kuboneka imitego 1.771.

Iboneka n’igabanyuka ry’imitego yica inyamaswa muri Pariki ya Nyungwe ni umusaruro wa miliyoni 20$ zimaze gushorwa mu bikorwa byo kuyibungabunga mu myaka itanu ishize.

Kugeza ubu iyi pariki yihagije ku ngengo y’imari ku kigero cya 48% ivuye kuri 4% mu 2014. Intego ni uko iyi pariki imaze kwinjiza miliyoni 7$ mu myaka itanu, igomba kuzaba yihagije ku ngengo y’imari bitarenze mu 2030.

Ubuyobozi bwa Pariki ya Nyungwe buvuga ko mu byabufashije kugabanya umubare w’imitego muri iyi harimo kuba bwarafashe abantu 140 bari barushimusi bukabagira abashinzwe kuri pariki.

Abo nibo bagenda bagaragaza amayeri akoreshwa mu gutega inyamaswa no mu gutahura iyo mitego. Iyo ubonye umutego umwe muri pariki biba byoroshye gutahura indi kuko rushimusi agenda inzira igororotse atega imitego kugira ngo bizamworohere kugaruka muri iyo nzira areba inyamaswa zafashwe.

Pariki ya Nyungwe ikora mu mirenge 23 yo mu turere dutanu turimo Nyaruguru, Nyamagabe, Nyamasheke, Rusizi, na Karongi.

Imitego irenga 43.000 yakuwe muri Nyungwe mu myaka itanu ishize