Batangiye kubona agahenge nyuma yo kuyobora amazi ava mu birunga

Yanditswe na N.Kubwimana Janvière
Kuya 17 Mutarama 2021 saa 03:03
Yasuwe :
0 0

Hashize imyaka itari mike abaturiye agace k’ibirunga batakambira leta ngo ibakize amazi y’imvura ava mu birunga akunda kubibasira, akangiza imyaka yabo, inzu, ibyo batunze adasize n’ubuzima bwabo.

Mu birunga hakunze kugwa imvura nyinshi cyane, ku buryo iminsi isiba kugwa ari mike cyane, bigatuma abaturage bahaturiye cyane abo mu Turere twa Musanze, Burera, Nyabihu na Rubavu bakunda kwibasirwa n’ibiza by’amazi avamo.

Muri Gicurasi 2019 ubwo Perezida Paul Kagame yasuraga uturere twa Musanze na Burera, abaturage bamugejejeho iki kibazo cy’amazi ava mu birunga abangamiye, abemerera ko hagiye gukorwa ibishoboka bigakemuka.

Mu mpera za 2019 nibwo hatangiye kwigwa umushinga wo gufata no gukumira aya mazi ava mu birunga, aho byateganyijwe ko hazakoreshwa ingengo y’imari ingana na miliyari 35 Frw harimo kwimura abaturage aho bigaragara ko hadakwiye guturwa, kubaka inzira z’amazi ndetse no kubungabunga iki cyogogo.

Muri ruhurura [imyuzi] 22 ziteganyijwe kubakwa igamije gufata aya mazi, kugeza ubu hamaze kubakwa imyuzi igera kuri itanu igeze ku kigereranyo cya 93%, byagaragaraga ko ariyo iteza ibibazo kurusha ahandi.

Mu Karere ka Burera hubatswe itatu harimo umwuzi wa Muhabura, Mbandana na Nyarubande ifite ibirometero bibiri na metero 800, naho mu Karere ka Musanze hubakwa ibiri ya Muhe na Susa ifite ibirometero bine na metero 200 aho iyi myuzi izasiga uyu mushinga ku kigero cya 50%, hakaba haragiye hacukurwa n’ibizenga binini bifata aya mazi bikagabanya umuvuduko wayo.

Biteganyijwe kandi ko iyi myuzi nimara kuzura neza, muri Mutarama 2021, hazatangira kubakwa indi myuzi ibiri mu Karere ka Musanze harimo umwuzi wa Cyuve n’uwa Cyabirego nayo bigaragara ko iteza ibibazo by’amazi menshi ava mu birunga.

Umuyobozi mu kigo gishinzwe umutungo kamere n’amazi, uhagarariye agashami gashinzwe gukumira amazi y’imyuzure no kubungabunga amazi Bugingo Devis, yabwiye IGIHE ko zimwe mpamvu ziri ku isonga mu kwiyongera kw’amazi ava mu birunga, harimo imihindagurikire y’ikirere, aho ibihe byo kugwa kw’imvura byagiye byiyongera, ubutaka bworoshye cyane bitewe no kubuhinga kenshi ndetse bukanaturwa cyane.

Ibiti bya kimeza byari bitewe ku misozi byatemwe, nabyo ni indi ntandaro yo kwiyongera kw’amazi ava mu birunga.

Bugingo yagize ati “Ni umushinga witezweho guca burundu ikibazo cy’amazi ava mu birunga akangiza ibikorwa by’abaturage adasize n’ubuzima bwabo, ibikorwa remezo n’ibindi".

Yakomeje avuga ko nyuma yo kubaka imyuzi ya mbere, bimaze gutanga umusaruro ugaragara kuko nta biza byongeye kwibasira abaturage nk’uko byagendaga mbere.

Yagize ati "Ahantu hajyaga hibasirwa n’amazi ubu nta kibazo kihagaragara, abaturage barahinze barimo gusarura kandi mbere ntibyabagaho, ikigo Nderabuzima cya Rugarama n’umurenge waho imvura yaragwaga amazi akahuzura ibintu bikangirika, ubu nta kibazo cyahagaragaye"

"Ntibivuze ko ikibazo cyakemutse kuko ntitwari twarangiza, ahubwo twahereye ahateye ibibazo kurusha ahandi. Turacyakomeje ibikorwa, gusa dufite icyizere ko niturangiza uyu mushinga, uzakemura burundu ikibazo cy’aya mazi ava mu birunga agateza ibibazo, cyane ko ariyo ntego y’umushinga"

Bamwe mu baturage bo mu Turere twa Musanze na Burera ahamaze kubakwa imyuzi ifata amazi ava mu birunga, bavuze ko ubu basigaye baryama bagasinzira ndetse bakaba barahinze bagasarura.

Nyirabisabo Domitille utuye mu Murenge wa Rugarama yagize ati “Aya mazi yari yaratuzengereje, adusenyera amazu, ntawahingaga ngo asarure, imvura yaragwaga tukikorera ibyo mu nzu tukarara ku misozi kubera ubwoba twari twarahungabanye, ariko kuva batangira kubaka iyi myuzi turasinzira, ubu twarahinze birera ibintu twafashe nk’igitangaza.”

Bazirakwiha Damien wo mu Murenge wa Gahunga mu Karere ka Burera na we avuga ko bafite umutekano ku mpande zose, kuko usibye kuba batagiterwa n’amazi yo mu birunga ngo banabonye akazi kabafashije kwiteza imbere.

Ati " Ubu tumeze nk’abari muri paradizo, igihunga cyo kwicwa n’amazi yo mu birunga cyararangiye. Abantu barapfaga, amazu agasenyuka, ibyo twahinze bikagenda tubireba, ikindi aho batangiriye ibikorwa byo kubaka iyi myuzi twabonye akazi, ubu mutuelle twarazishyuye, amatungo magufi turayoroye, abafite abana bajya ku mashuri bariga nta kibazo.”

Iki kibazo cy’amazi yo mu birunga cyageraga no ku baturage bo mu Mirenge ya Kinigi na Shingiro mu Karere ka Musanze nk’uko bikorimana Fabien abisobanura, gusa akemeza ko hari icyahindutse kuva batangira gukumira amazi ava mu birunga.

Ati " Amazi yarazaga agahumba imyaka yacu, amazu, abandi bafapfa, ni ibintu bizwi. Twatakambiye Leta ngo idutabare iyadukize, none baratwumvise batangiye kuyakumira kandi byatanze icyizere ku buryo mu mvura imaze iminsi igwa nta kibazo kidasanzwe cyatubayeho ugereranyije no mu bihe byashize"

Guverineri w’Intara y’Amajyaruguru Gatabazi Jean Marie Vianney, yavuze ko ibikorwa byo kubaka imyuzi isigaye bikomeje kugeza ubwo ikibazo kizakumirwa burundu.

Ati"Ibikorwa biracyakomeje ariko abaturage barasabwa kubungabunga ibibakorerwa. Ibiti bikikijwe kuri iriya myuzi birinde kubisarura biteze, ubwatsi bwahatewe nabwo bakirinda kubwangiza, ahagaragaye ikibazo bashobora kwikemurira bakabikora kugira ngo birusheho kuba ibintu birambye".

Biteganyijwe ko Umushinga wo gufata amazi ava mu birunga uzarangira mu 2024. Kuva uyu mushinga watangira gukorwa wahaye abaturage 8000 akazi, ukazarangira hatanzwe akazi ku bagera ku 20,000.

Amazi ava mu birunga yuzuraga ku Murenge wa Rugarama no ku Kigo Nderabuzima akangiza byinshi
Bumwe mu buryo burimo gukoreshwa mu gufata amazi yo mu birunga, harimo kubakwa ibizenga
Hubatswe n'ibiraro bifite ubushobozi bwo kuyobora amazi ava mu birunga, ntiyuzure ngo ajye mu baturage
Hataratangizwa umushinga wo gufata amazi ava mu birunga, yangizaga byinshi birimo imyaka y'abaturage
Imyuzi yubatswe yatangiye kugabanya umuvuduko w'amazi ava mu birunga, ku buryo atakibangamira abaturage
Kubaka ibizenga bifata amazi byatumye umuvuduko w'amazi ava mu birunga yinjira mu myuzi yagabanyije umuvuduko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .