Abanyarwanda baba muri Canada batanze miliyoni 20 Frw zo gufasha abagizweho ingaruka na Coronavirus

Yanditswe na Twarabanye Venuste
Kuya 7 Gicurasi 2020 saa 04:12
Yasuwe :
0 0

Umuryango w’Abanyarwanda baba muri Canada watanze inkunga y’amadolari ya Amerika 21.529, ni ukuvuga asaga miliyoni 20 Frw, yo gufasha abagizweho ingaruka na Coronavirus mu Rwanda.

Umuyobozi w’Umuryango w’Abanyarwanda baba muri Canada, Joachim Mutezintare, yabwiye IGIHE ko nubwo batuye muri Canada, umutima wabo uterera mu Rwanda ibyo bikabatera guhora bakurikiranira hafi ibihabera.

Yavuze ko bafashe icyemezo cyo kwishakamo inkunga bagenera Abanyarwanda bari imbere mu gihugu, nyuma yo kubona ko hari abagizweho ingaruka no kubahiriza ingamba zo kwirinda ikwirakwira rya Covid-19.

Ati “Kubera iki cyorezo cya Covid-19 n’ingaruka za Guma mu rugo, twatekereje Abanyarwanda ubusanzwe babonaga ikibatunga ari uko basohotse, nka ba nyakabyizi. Ni ho igitekerezo cyo kubashakira inkunga cyavuye, tukifatanya n’abandi banyarwanda, tugahuza imbaraga zo kurwanya ingaruka za Coronavirus ku batishoboye.”

Nyuma yo kugira icyo gitekerezo, abanyarwanda baba muri icyo gihugu bakoresheje urubuga rwa "Gofundme", umuntu agatanga uko abishoboye, bakusanya $ 21.519 mu byumweru bibiri.

Guverinoma y’u Rwanda iheruka gufata icyemezo ko ibikorwa bimwe na bimwe bifungurwa, gusa hari imirimo imwe n’imwe nk’abari basanzwe ari abamotari igifunzwe, hakiyongeraho abatakaje imirimo yabo ubu bakeneye gufashwa.

Guverinoma yashimiye Abanyarwanda baba muri Canada ku bwo kuzirikana abanyarwanda bari imbere mu gihugu.

Mu ibaruwa Umunyamabanga wa Leta muri Minisiteri y’Imari n’Igenamigambi ushinzwe imari ya Leta, Tusabe Richard, yabandikiye ku wa 5 Gicurasi, yagize, ati “Mu izina rya Guverinoma y’u Rwanda ndabashimira nanabamenyesha ko twakiriye inkunga yanyu ingana na $21.519 igamije gufasha mu guhangana n’ingaruka za Covid-19 binyuze mu gufasha abatishoboye.”

Mu buzima busanzwe, Mutezintare yavuze ko nta kibazo cyihariye Abanyarwanda baba muri Canada bafite, uretse ibyo basangiye n’abanya-Canada muri ibi bihe. Muri rusange abadashobora gukora kubera ibikorwa byahagaritswe, Leta ibaha Amafaranga yo kubatunga.

Mu kwezi gushize banahuriye hamwe mu bikorwa byo Kwibuka ku nshuro ya 26 Jenoside yakrewe Abatutsi, ibikorwa byabaye hifashishijwe ikoranabuhanga.

Abanyarwanda bakomeje guhuza imbaraga zo kunganira abatishoboye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .