Uko Dr Sherti wafungiwe kuba icyitso yavuye mu gipadiri cyari cyuzuyemo ivangura

Yanditswe na Karirima A. Ngarambe
Kuya 19 Ukwakira 2020 saa 08:32
Yasuwe :
0 0

Dr Epimaque Sherti yamaze imyaka 12 irenga ari Umusaserodoti, yahawe Ubupadiri ku wa 2 Kanama 1987 aza gufata icyemezo cyo kubuvamo tariki 30 Ugushyingo 1999, bitewe n’ivangura yahuraga naryo no gutereranwa n’abari abayobozi be.

Kuri ubu Dr Epimaque Sherti aba mu Bubiligi aho afite umugore n’abana babiri.

Mu kiganiro uyu mugabo yagiranye na IGIHE, yagarutse mu bihe by’ivangura yanyuzemo ubwo yari akiri mu Rwanda.

Yagize ati "Twabaye mu Rwanda ariko tubaho dusa naho tutari Abanyarwanda nk’abandi ahubwo twari abaturage baza nyuma y’abandi, wajya mu ipiganwa ry’akazi bati ufite imiziro.’’

Sherti akomeza avuga ko iri vangura no mu gipadiri ryabagamo. Ati "Ndetse no mu bihaye Imana byabagamo; hari nka Padiri Muvara banyaze asigaje icyumweru kimwe ngo abe Musenyeri, nta kindi cyabiteye ni uko yaziraga uko yavutse.’’

Ubwo ingabo zahoze ari iza RPA zafataga icyemezo cyo kubohora igihugu, Dr Sherti avuga ko aribwo bamwe mu Banyarwanda b’imbere batangiye gufatwa bagafungwa ndetse bagatotezwa bazira kuba ibyitso.

Uyu mugabo iki gihe wari umupadiri muri Paruwasi ya Kamonyi na we ngo yaje gufatwa arafungwa.

Ati "Njye bamfashe aho nari Padiri muri Paruwasi ya Kamonyi, tariki ya 2 Ukwakira 1990, banjyana kuri burigade ya Gikondo aho nahuriye n’abandi benshi, bukeye tariki ya 3 Ukwakira 1990 batujyana muri Gereza ya Ruhengeri aho twasanze ari ibicika kuko ho byagaragaraga ko tugiye kwicwa rwose.’’

Nyuma yo kugera muri Gereza ya Ruhengeri ngo batangiye kuzajya bakorwaho iperereza n’abantu baturutse muri Perezidansi ari nako bahohoterwa.

Ati "Ubwo turi mu Ruhengeri, abashinzwe iperereza muri Perezidansi no mu bigo bya gisirikare na gendarmerie bazaga kureba bamwe muri twe bakabahata ibibazo bakabakubita, bagakorerwa iyicarubozo.’’

Mu bo bafunganywe muri iyi gereza yibuka ngo harimo Munyambaraga Narcisse, Munyampundu François, Mukurarinda Karori, Rugema Donatien, Mbaguta Jean Marie Vianney, Major Rutambuka Gaspard wari BM wakoranaga na Bagosora hakaba na Nsabakunzi François Xavier nabo bari badufunganye abo rero maze kuvuga nibo basanze babagize intere bakubiswe cyane.

Iri yicarubozo ngo ryaje kumera nk’iricururutse ubwo imiryango mpuzamahanga na za Ambasade nyinshi zashyiragaho itsinda rigenda rireba abafunzwe n’uko bafashwe muri gereza.

Ibi ngo byatumye Leta ya Habyarimana igira ubwoba ihagarika kongera gukora iyicarubozo, itangira kujya ibahata ibibazo gusa.

Nyuma y‘amezi abiri Dr Sherti ngo yaje kwisanga mu bantu 15 bagombaga kujyanwa i Kigali bagafungirwa muri Gereza ya 1930. Ngo bagejejwe muri iyi gereza ku wa 6 Ukuboza 1990, ubundi bakomeza guhatwa ibibazo.

Ati "Bakomeza kuduhata ibibazo bidafashije aho njye rwose bambazaga ko mfite bene wacu mu mahanga, nti ndabafite, ese murandikirana mukanasurana, nti yego, noneho rero baza kundega ko ngo iwanjye hari habitse imbunda n‘amasasu y‘Inkotanyi.’’

Ngo abasirikare ba Habyarimana bagiye iwe gusakayo iyi mbunda ariko barayibura. Nyuma yo kumara igihe afunze uyu mugabo ngo yaje kurekurwa ku wa 6 Mata 1991.

Ivangura ryatumye ava mu gipadiri

Nyuma yo gufungurwa Dr Sherti ngo yaje kumenya amakuru ko Padiri Boniface Kanyoni wari umwarimu mu Iseminari Nkuru ya Rutongo yagiye kureba Musenyeri Nsengiyumva Vincent amusaba ko yamufunguza.

Iki cyemezo ngo Musenyeri Nsengiyumva yagitesheje agaciro ahubwo avuga ko ’adashobora kumufunguza kuko atarengana kubyo yashinjwaga byo kuba icyitso cy’Inkotanyi.’

We ubwe ngo na nyuma yo gufungurwa yaje gutumirwa na Musenyeri Nsengiyumva, ubundi amusaba kudatenguha Leta ya Habyarimana imugiriye imbabazi.

Ati "Njye ubwanjye mfunguwe yantumyeho turanasangira ku meza, arambwira ati rero Perezida Habyarimana abagiriye ubuntu kandi mwarakoreye nabi igihugu none ntimuzongere, rwose bo bari bararangije kudushinja.’’

Muri ibi bihe, Dr Sherti yari yaramaze kubona ko hari ikintu kibi kiri gututumba gusa ngo yaje kugirirwa amahirwe yo kujya kwiga mu Bubiligi mbere gato y’uko Jenoside yakorewe Abatutsi mu 1994 iba.

Bitewe n’uko yari yarasize ibintu bimeze mu gihugu ngo yahise afata umwanzuro wo kudasubira mu Rwanda.

Yakomeje ati "Ni bihe byerekanaga ko Jenoside irimo gututumba rwose, naje kugira amahirwe yo kuza kwiga mu Bubiligi, nkurikije uko nasize ibintu bimeze muri 1991 ntabwo nasubiye mu Rwanda.’’

Mu 1999 ashingiye ku ivangura yari yaraboneye mu gipadiri yahise afata umwanzuro wo kukivamo akomeza ubuzima busanzwe.

Dr Epimaque Sherti aherutse kwandika igitabo yise "Génocide et reconstruction de la paix au Rwanda.

Dr Epimaque Sherti yafashe umwanzuro wo kuva mu gipadiri kubera ivangura yabonagamo no gutereranwa n'abari abayobozi be
Sherti ubwo yari mu kiganiro na Karirima wa IGIHE
Dr Epimaque Sherti aherutse kwandika igitabo yise "Génocide et reconstruction de la paix au Rwanda

Reba ikiganiro kirambuye unyuze hano

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .