00:00:00 IGIHE NETWORK KN KINYARWANDA EN ENGLISH FR FRANCAIS

Pologne: Itorero Icyeza ryataramiye Abanyarwanda n’inshuti zabo

Yanditswe na Karirima A. Ngarambe
Kuya 19 March 2024 saa 06:38
Yasuwe :

Abanyarwanda aho bari hose bahuriye ku ntero imwe igira iti “Umuco wacu ni wo uduhuza.” Icyo nicyo gituma n’iyo bageze i mahanga batawutatira ahubwo baharanira kuwusigasira no kuwuratira abandi.

Abanyarwanda bari hirya no hino mu bihugu bitandukanye, aho batuye, bakorera cyangwa biga usanga bagira gahunda zitandukanye zibahuza, muri izo hakabamo no gutarama Kinyarwanda kugira ngo biyibutse umuco w’iwabo banereke inshuti zabo z’iyo ko bafite umuco mwiza.

Ni muri urwo rwego bamwe mu Banyarwanda batuye mu gihugu cya Pologne bishyize hamwe bagashinga itorero ribyina imbyino gakondo ryitwa Icyeza, rigamije gufasha Abanyarwanda baba muri icyo gihugu kuguma ku ndangagaciro z’umuco nyarwanda.

Ku wa 16 Werurwe 2024 ahitwa i Dom Kultury Kadr mu mujyi wa Varsovie muri Pologne, iryo torero ryataramiye Abanyarwanda n’inshuti zabo ku nshuro ya mbere kuva ryashingwa.

Ambasaderi w’u Rwanda muri Pologne, Prof. Shyaka Anastase, wari witabiriye icyo gitaramo, yashimiye cyane Itorero Icyeza ku bwo gukomeza guteza imbere umuco nyarwanda.

Ati “Ni bumwe mu buryo bwiza cyane bwo gukora ubuvugizi bwiza ku gihugu muvukamo kandi no gushyigikira gahunda za Leta zo guha umwanya Ikinyarwanda nk’ururimi no gutoza umuco abakiri bato n’abandi bose, kuko ururimi n’umuco ntibigira umupaka.”

Yabahaye umukoro wo gukomeza iri torero no kuba indashyikirwa mu kubyina neza no guhora baharanira kwesa uwo muhigo.

Uhagarariye Itorero Icyeza, Bwami Arnaud, yashimiye ababateye ingabo mu bitugu bose bakitabira igitaramo cyabo ndetse anashimira na Ambasade y’u Rwanda muri Pologne mu kubaherekeza mu rugendo rwo kubaka iryo torero.

Prof. Shayaka Anastase, Amabasaderi w’u Rwanda muri Pologne yashimye abagize igitekerezo cyo gutangiza Ballet Icyeza
Bwami Arnaud uhagarariye Icyeza Ballet, yashimiye ababateye ingabo mu bitugu bose
Byari ibyishimo muri iki gitaramo cyo gutangiza Ballet Icyeza muri Pologne, hagamijwe gusigasira umuco
Intore z’umugara mwiza mu ngamba zashimishije abitabiriye
Abakobwa bagize Ballet Icyeza ubwo bashagiriraga
Imbyino za Kinyarwanda ni kimwe mu birango by'umuco nyarwanda
Umukaraza akoma umurishyo muri iki gitaramo kidasanzwe
Abakuru n'abato bishimiye uyu mugoroba

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .