00:00:00 IGIHE NETWORK KN KINYARWANDA EN ENGLISH FR FRANCAIS

Ndi Umunyarwanda ni ubuzima, si gahunda - Minisitiri Rosemary Mbabazi

Yanditswe na Karirima A. Ngarambe
Kuya 28 August 2022 saa 08:18
Yasuwe :

Minisitiri w’Urubyiruko n’Umuco Rosemary Mbabazi, yasabye Abanyarwanda baba mu Budage guhora bazirikana ko ari Abanyarwanda, nk’isano ikomeye bafitanye n’igihugu cyabo.

Ni ubutumwa yatanze ku wa Gatandatu mu kiganiro kuri Ndi Umunyarwanda, cyateguwe na Ambasade y’u Rwanda mu Budage hamwe n’Umuryango w’Abanyarwanda baba muri icyo gihugu. Cyabereye mu Mujyi wa Hanover.

Minisitiri Mbabazi yashimye abateguye iki gikorwa, ashima uburyo Abanyarwanda baba muri icyo gihugu bakomeza kuvuga Ikinyarwanda.

Abandi batanze ibiganiro ni Pasiteri Dr Antoine Rutayisire, Umwanditsi w’ibitabo Marie Kresbach, Umunyeshuri muri Jacobs University Bremen, Vainqueur Gabiro, Musafiri Sebiziga, hari kandi Umuhanzi Jules Sentore wafatanyije n’urundi rubyiruko gusabana biciye mu njyana y’ikinyarwanda afatanyije na Dj Chamzo.

Mu ijambo rye Min. Mbabazi yagize ati "Mu bintu turi buvuge wenda bishobora gutakaza Ubunyarwanda, nubwo umutima waba uriyo, ni ururimi, ni umuco, kandi twese dusangiye, uduhuje. Nagira ngo rero mbashimire, kandi rwose n’abatarakimenya neza nk’abavukiye hano, iyo hari ubushake, birashoboka."

Yavuze ko Ndi Umunyarwanda ishingiye ku mateka u Rwanda rwaciyemo, aho buri muntu wese afite amateka yanyuzemo, ariko bose hamwe bakaba basangiye ubunyarwanda nk’isano ikomeye.

Yabwiye abitabiriye iki kiganiro ati "Aho muri hose u Rwanda rubagendamo, aho muri hose muri mu Rwanda, ni nk’igiti n’amashami yacyo ntibijya bitandukana."

Yavuze ko u Rwanda rukolonizwa, cyari igihugu gifite abaturage babanye neza, bibona mu moko 18 gakondo.

Ariko abakoloni babivunjemo kubyitirira Abahutu, Abatwa n’Abatutsi, mu gihe byari ibyiciro by’ubuzima bw’Abanyarwanda, aho kuba ubwoko.

Ibyo ngo byanubakiweho politiki yo gucamo abantu ibice ngo babashe kubayobora, maze ubunyarwanda busenyuka ubwo!

Minisitiri Mbabazi ati "Twatangiye kwibona mu moko kurusha kwibona nk’Abanyarwanda dusangiye byose, dusangiye igihugu, dusangiye ururimi, dusangiye umuco. Turi mu bihugu bike cyane ku isi bifite ururimi rumwe rukumbi, bifite umuco umwe, noneho tuvugana tukumvikana hadakenewe umusemuzi…"

Nyamara ngo byageze aho abanyarwanda bigishwa ko atari bamwe, ndetse ko badaturuka ahantu hamwe.

Yakomeje ati "Iyo urebye muri ayo mateka, mbere ya 1994 abantu barahezwaga. Aho uturuka, akarere ukomokamo, noneho iyo wabaga uri umututsi wariswe ayo moko, wabaga uri mu cyiciro cya nyuma cyangwa icya kabiri, ariko ntiwabaga mu cyiciro cya mbere. Ariko Abanyarwanda uyu munsi bose bari mu cyiciro cya mbere."

Ayo mateka mabi yagejeje kuri Jenoside yakorewe Abatutsi mu 1994, iza guhagarikwa n’Ingabo zari iza RPF Inkotanyi.

Yahise itangira kubaka ubumwe bw’Abanyarwanda, kugira ngo bose biyumve kimwe mu gihugu cyabo.

Minisitiri Mbabazi yakomeje ati "Uyu munsi imbaraga zacu ziri mu kubaka bwa bumwe bw’Abanyarwanda, tukibona nk’abanyarwanda. Aba bose barababaza ngo ni abaki, dufite n’abana bacu baba batubwira ngo baraduhatiriza, twababwira ko turi Abanyarwanda bati oya tubwire uri umuki? Icyo gihe icyo uzitaba ni icyo uri cyo."

Yavuze ko aho gushyira imbere ubwoko, bakwiye kugira ishema ryo kuba ari Abanyarwanda.

Yakomeje ati "Turabivuga kuko tuzi ibikomere, tuzi uko kuba Umunyarwanda byatuvunnye, tuzi amacakubiri yagaragaye. Uyu munsi dushaka kubaka bwa bumwe, ni yo mpamvu duhora tubihozaho kuko turi abanyarwanda mu gitondo, ku mugoroba na nijoro."

Yavuze ko hari abanyarwanda bamaze igihe kinini batagira igihugu, benshi bahungira muri Uganda, banagira uruhare mu kubohora icyo gihugu mu 1986. Nyamara ngo nta gaciro bahabwaga muri icyo gihugu.

Minisitiri Mbabazi yakomeje ati "Ndi Umunyarwanda ni ubuzima. Twahoze tubiganira na bagenzi bacu ko atari na gahunda kuko yo igera igihe ikarangira. Ntabwo ari gahunda, Ndi Umunyarwanda, ubu mwatangije ibikorwa bihoraho, bikaba ubuzima bwa buri munsi. Ndi Umunyarwanda ni ubuzima. Ese ntabaye Umunyarwanda naba iki?"

"Ndi Umunyarwanda ni isano muzi bahoze bavuga. Ni isano twese dushoraho, na wo ugashora mu Rwanda, aho tuvuka. Ikindi, ni igihango duhana n’igihugu cyacu, tugendana aho tujya hose."

Ambasaderi w’u Rwanda mu Budage, Igor César, yashimiye abitabiriye iki kiganiro, cyabayeho ku busabe bw’urubiruko n’ababyeyi benshi.

Ati "Igikorwa cya Ndi Umunyarwanda hano, cyavukiye mu rubyiruko rwakomeje ruvuga ko rutabona umwanya wo kuganira ku bunyarwanda bwabo. Kandi ntabwo ari buri Munyarwanda wese upfa kubona amahirwe yo kuganira, kumwibutsa gakondo ye, akamenya uwo ari we, kugira ngo amenye, anagere ku byo ashaka kugeraho."

Yavuze ko iki kiganiro cya gihuriza hamwe Abanyarwanda baba abavukiye mu Budage, Abahamaze igihe kirekire n’abamaze igihe gito.

Yakomeje ati "Kuba Umunyarwanda ntabwo uba gusa Umunyarwanda, ahubwo ni n’igihango, bisobanuye ko ari ikintu tuzagendana aho turi hose. Niba ari igihango rero bivuze ko tugomba kukibungabunga. Ni cyo kintu gituma tudasa n’abandi, noneho ibindi byose bikubakirwa kuri icyo gihango."

Ambasaderi Igor César yavuze ko kenshi usanga kugira ngo bikorohere kubona ubwenegihugu bw’u Budage bisaba kwikuraho ubw’u Rwanda, ariko ngo nabyo ni ubunyarwanda buba bwagutse.

Yakomeje ati "Bivuga ko Ubunyarwanda bwanyu nibwo buzabemerera kugira Ubudage. Muragenda mugashakisha, mukirengagiza Ubunyarwanda, ariko amaherezo bukugarukaho. Ni cyo nababwiraga wa muzi w’Ubunyarwanda uzabagarukaho, arinacyo gihango mufitanye."

"Uraza hano mu budage ukiga ururimi, abana bakaruvuga, ariko wasohoka hanze bakakubaza bati ariko uri Umunyarwanda, Ubunyarwanda bukakugendaho. Ubunyarwanda ntibukubuza kuba Umudage, ariko mujye mwibuka imizi mukomokaho."

Yavuze ko guhurira hamwe muri ubu buryo ariukongera kwibukiranya Ubunyarwanda basangiye, bubasubiza ku isoko ibahuza, "ariyo u Rwanda rwa Gasabo".

Bijyanye n’ibi biganiro, habaye imikino itandukanye mu rwego rwo kwidagadura no gusabana.

Abandi batanze ibiganiro barimo Pasiteri Dr Antoine Rutayisire, Umwanditsi w’ibitabo Marie Kresbach, Umunyeshuri muri Jacobs University Bremen, Vainqueur Gabiro, Musafiri Sebiziga, umuhanzi Jules Sentore na Dj Malik.

Ambasaderi Igor César ari kumwe na Minisitiri w'Urubyiruko n'Umuco, Rosemary Mbabazi
Iyi mikino yari mu rwego rwo gusabana
Akamanzi Nadège yavuze mu izina ry'urubyiruko bagenzi be
Amb. Igor César n’umugore we Ndatirwa Jeanne, bagabiwe n’abanyarwanda mu rwego rwo kubashimira
Rev Past Antoine Rutayisire na we yari muri iki gikorwa
Lambert Bariho wari waturutse mu Rwanda, ni umwe mu batanze ikiganiro kuri Ndi Umunyarwanda
Musoni Vedaste uyubora Diaspora Nyarwanda mu Budage aha ikaze abashyitsi
Musafiri Sebiziga yari umusangiza w’amagambo
Mu buhamya Amb. Igor César yatanze nk’umunyarwanda usanzwe wakuriye mu mahanga, yagize ati "Ndi Umunyarwanda ni Igihango"
Ingabire Clinton na Samuel Nkindi, bayoboye ibiganiro nk’urubyiruko
Minisitiri w'Urubyiruko n'Umuco, Rosemary Mbabazi yibukije abari muri iki gikorwa ko Ndi Umunyarwanda ari ubuzima
Jules Sentore nk’umuhanzi watumiwe, yifatanyije n’urundi rubyiruko abicishije mu nganzo y’Ikinyarwanda
Moïse Bigoro wiga mu Budage, yasangije abandi ku nganzo y’umuvugo yahimbye
Gaetan Ndabarasa (hagati) uyobora umuryango w’abanyarwanda muri Diaspora ya Hannover
Umunyeshuri muri Jacobs University Bremen, Vainqueur Gabiro, yatanze ikiganiro yerekana uko urubyiruko rwavutse nyuma ya 1994 rwakiriye Ndi Umunyarwanda
Marie Kresbach, umwe mu rubyiruko rwarokotse Jenoside yakorewe Abatutsi atanga ikiganiro
Michel Kamanzi yasabye inzego bireba gukora ibishoboka byose kuko Ikinyarwanda mu rubyiruko ruba mu mahanga no mu gihugu kiri gukendera
Jules Sentore yabakumbuje u Rwanda
Abanyarwanda bo mu Budage bashimiye Umuryango wa Amb. Igor César, bamugabira Inka
Iki gikorwa cyabaye umwanya mwiza wo gusabana ku Banyarwanda baba mu Budage
Mu busabane habayeho gucinya akadiho
Nyuma y’ikiganiro cyihariye IGIHE yagiranye na Pasiteri Antoine Rutayisire, Amb. Igor César na Bariho Lambert

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .