Aya marushanwa yiswe AAU Massachusetts District Championships yabaye ku Cyumweru, tariki ya 15 Ugushyingo 2026, kuri Hudson High School, mu Mujyi wa Hudson, muri Leta ya Massachusetts.

Yateguwe muri gahunda y’ihuriro ry’abakinnyi batabigize umwuga (Amateur Athletic Union–AAU), igamije guteza imbere impano z’abakiri bato mu mikino itandukanye, harimo na Karate.

Ni amarushanwa ahuza abakinnyi bo mu byiciro bitandukanye, hagendewe ku myaka, igitsina n’urwego buri wese agezeho muri Karate.

Mu bana b’Abanyarwanda bitwaye neza harimo Iris Ndizeye, wegukanye imyanya ibiri ya mbere mu byiciro bya Kata na Kumite, mu bakobwa bafite imyaka 12 na 13, bari mu rwego rw’abatangizi (Novice).

Kata ni icyiciro abakinnyi berekanamo ubuhanga mu gukora imyiyereko itandukanye ya Karate, mu gihe Kumite ari icyiciro abakinnyi bahanganamo mu mirwano.

Undi witwaye neza ni David Masudi, wegukanye umwanya wa mbere mu cyiciro cya Kumite cy’abahungu bafite imyaka 12 na 13, bari mu rwego rwo hagati (Intermediate).

David Manzi na Iain Ndizeye na bo begukanye umwanya wa gatatu, buri wese mu cyiciro cya Kumite cy’abahungu bafite imyaka 14 na 15, bari mu rwego rwa Intermediate.

Jeremiah Mukuna, uri mu cyiciro cy’abahungu bafite imyaka 10 na 11, yegukanye umwanya wa gatatu muri Kata, mu rwego rwa Beginner, rugenewe abagitangira kwiga Karate.

Muri iki cyiciro cy’imyaka kandi, Haider Mugabe yegukanye umwanya wa gatatu muri Kumite, mu rwego rwa Novice.

Muri rusange, aba bana batandatu begukanye imyanya irindwi, irimo itatu ya mbere n’ine ya gatatu.

Ibi byagaragajwe n’impamyabushobozi bahawe nyuma y’amarushanwa, zashyizwe ahagaragara binyuze ku rubuga rwa Uventex Sports Hub.

Amateur Athletic Union ni umuryango washinzwe mu 1888, ufite intego yo guteza imbere siporo muri Leta Zunze Ubumwe za Amerika, by’umwihariko mu bana n’urubyiruko.

Uyu muryango utegura amarushanwa mu mikino itandukanye, aho abakinnyi bahabwa amahirwe yo kugaragaza impano zabo no kongera ubunararibonye.

Muri Karate, AAU itegura amarushanwa ku nzego zitandukanye, zirimo ay’uturere, ay’uduce duhuriyemo uturere twinshi ndetse n’ay’igihugu.

Amarushanwa yabereye muri Massachusetts yari arimo ibyiciro bya Kata, Kumite na Kobudo, aho abakinnyi bagaragaza ubuhanga mu gukoresha intwaro gakondo zikoreshwa mu mikino njyarugamba.

Kwitwara neza kw’aba bana b’Abanyarwanda ni ikimenyetso cy’impano bafite muri Karate, ndetse n’ubushobozi bwo guhangana n’abandi bakinnyi mu marushanwa abera hanze y’u Rwanda.