RDC: Ambasaderi Karega yaganiriye na mugenzi we w’u Burundi ku mubano w’ibihugu byombi

Yanditswe na Twarabanye Venuste
Kuya 29 Nyakanga 2020 saa 12:00
Yasuwe :
0 0

Ambasaderi w’u Rwanda muri Repubulika Iharanira Demokarasi ya Congo (RDC), Vincent Karega yaganiriye na mugenzi we w’u Burundi muri icyo gihugu, Ambasaderi Jean Baptiste Biherengende, ku bintu bitandukanye birimo n’uruhare rwabo mu kuzahura umubano hagati y’ibihugu byombi.

U Burundi n’u Rwanda bimaze imyaka itanu bitabanye neza ahanini biturutse ku bibazo birimo ibyo u Rwanda rushinja icyo gihugu byo gucumbikira bamwe mu bashaka guhungabanya umutekano warwo.

Icyo gihugu nacyo kikavuga ko u Rwanda rucumbikira abashaka guhirika ubutegetsi bw’uwari Perezida Pierre Nkurunziza, nubwo u Rwanda rwakunze kugaragaza ko ibyo birego nta shingiro bifite.

Mu kiganiro Perezida Kagame yagiranye n’urubyiruko rwiganjemo urukoresha imbuga nkoranyambaga, ku wa 10 Nyakanga 2020, rukamubaza icyo u Rwanda rwiteze mu kuzahura umubano w’ibihugu byombi, yavuze ko ku ruhande rw’u Rwanda biteguye.

Yashimangiye ko niba ubuyobozi burangajwe imbere na Perezida Gen Evariste Ndayishimiye bwifuza ko ibintu bigenda neza, u Rwanda rutazagorana.

Ni mu gihe na none mu minsi mike ishize ubwo Perezida Kagame yagiranaga ikiganiro n’Umunyamakuru François Soudan wa Jeune Afrique, yavuze ko yizeye ko itorwa rya Ndayishimiye rishobora guharurira amayira umubano mushya hagati y’ibihugu byombi.

Ambasaderi w’u Rwanda muri RDC, Vincent Karega yavuze ko kuri uyu wa 28 Nyakanga 2020 yasuye mugenzi we w’u Burundi bakagira umwanya wo kuganira bakamenyana ndetse bakaganira ku ruhare rwabo mu kuzahura umubano hagati y’ibihugu byombi.

Mu butumwa yanyujije kuri Twitter yagize ati “Nashimishijwe no gusura Ambasaderi w’u Burundi i Kinshasa, Biherengende. Wabaye umwanya mwiza wo kumenyana no kuganira ku ruhare rwacu mu kuzahura umubano mu bya politiki n’ubuvandimwe.”

Ku rundi ruhande ariko hari ibigiteye urujijo ku cyerekezo cy’umubano w’u Rwanda n’u Burundi, harimo ko mu mpera za Kamena 2020 abagizi ba nabi bitwaje intwaro bagerageza guhungabanya umutekano w’u Rwanda baturutse mu Burundi.

Ingabo z’u Rwanda (RDF) zemeje ko abantu bagera ku 100 bitwaje intwaro zirimo n’inini baturutse mu Burundi, bateye ku birindiro byazo mu Murenge wa Ruheru mu Karere ka Nyaruguru, zibicamo benshi zinabatesha ibikoresho birimo intwaro, mu gihe abasirikare batatu bakomeretse byoroheje.

Hari kandi kuba Perezida Evariste Ndayishimiye yarashimiye abasirikare barashe ku Rwanda ubwo u Burundi bwizihizaga imyaka 58 bubonye ubwigenge.

Ambasaderi w’u Rwanda muri Repubulika Iharanira Demokarasi ya Congo (RDC), Vincent Karega yaganiriye na mugenzi we w’u Burundi muri icyo gihugu, Ambasaderi Jean Baptiste Biherengende ku kunoza umubano w’ibihugu byombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .