{Nyuma yo gushora imari mu ikipe ya basketball muri shampiyona ya NBA ya Charlotte Bobcats, kabuhariwe wakanyujijeho muri uyu mukino Michael Jordan yinjiye mu mubare w’abaherwe b’abakinnyi bacyuye igihe bafite umutungo urengeje miliyari y’Amadolari.}

Nyuma y’imyaka 10 ahagaritse gukina basketball, Michael Jordan yinjije amafaranga menshi ariko muri uyu mwaka byabaye agahebuzo kuko muri Gashyantare yari amaze kugira umutungo wa miliyoni 70 z’Amadolari ya Amerika, aho ubu ikinyamakuru Forbes cyatangaje ko uyu mugabo wamenyekanye cyane kuri numero 23 mu ikipe ya Chicago Bulls ubu afite umutungo urenze miliyari imwe z’Amadolari.

Jordan afite 89,5% by’imigabane mu ikipe ya Charlotte Bobcats (yahoze yitwa Charlotte Hornets) bivuga ko ubwayo ifite agaciro gakabakaba miliyoni 600 z’Amadolari.

Nubwo iyi kipe ifite imyenda ikabakaba miliyoni 135 z’Amadolari, umubare w’imigabane ya Jordan kongera umutungo we bwite byatumye yinjira muri iki cyiciro cy’abahoze ari abakinnyi bafite umutungo uri hejuru ya miliyari imwe y’amadolari.

Uyu mugabo usanzwe ari umushabitsi (businessman) kuri ubu akomeje kwigaragaza nk’uko yabikoze akiri umukinnyi dore ko afatwa nk’umwami wa basketball ku Isi kubera ubuhanga budasanzwe yakinanaga.