Mu myaka myinshi n’ibisekuruza byinshi, amateka agenda agaragaza ko imitungo n’amafaranga byagiye biba intandaro y’amakimbirane no gutandukana kw’abantu bari babanye neza. N’ubwo amafaranga ari igikoresho cyiza cyifashishwa mu gukemura ibibazo bitandukanye, ariko amateka agaragaza ko ashobora gusenya imibanire y’inshuti magara n’abavandimwe.

Ubuzima bw’abantu ni magirirane. Kunganirana no gufashanya ubisanga mu mateka y’ikiremwamuntu kuva mu myaka ya cyera cyane. Kugurizanya amafaranga ni kimwe mu biranga ubwo bufatanye buranga abantu hirya no hino ku isi.

Mu buzima bwa buri munsi, amafaranga anyura mu ntoki za buri muntu ni menshi. Bamwe barayahabwa, abandi bakayakorera kandi biragoye ko wabona umuntu n’umwe uhumeka muri iki kinyejana udafite amafaranga amugendaho, cyane cyane mu gihugu nk’icyacu hano mu Rwanda. Ni nk’aho ubuzima bwose bushingiye ku mafaranga.