00:00:00 IGIHE NETWORK KN KINYARWANDA EN ENGLISH FR FRANCAIS

Weekend ya Bamporiki: Imbabazi yasabiye kuri Twitter zateje ururondogoro

Yanditswe na Israel Ishimwe
Kuya 7 May 2022 saa 11:31
Yasuwe :

Bamporiki Edouard ni izina rimaze gushinga imizi! Ryumvikana cyane mu matwi y’abaturarwanda ndetse amaso yabo amubona inshuro nyinshi. Bitandukanye n’ibihe bisanzwe, kuva mu minsi ibiri ishize, ryongeye kugarukwaho bidasanzwe.

Ku wa 5 Gicurasi 2022 ahagana saa Kumi n’imwe, ni bwo Bamporiki Edouard, yahagaritswe ku mirimo ye nk’Umunyamabanga wa Leta muri Minisiteri y’Urubyiruko n’Umuco, kubera ibyo agomba kubazwa akurikiranyweho.

Nyuma y’amasaha make ahagaritswe, Urwego rw’Igihugu rw’Ubugenzacyaha, RIB, rwatangaje ko rwatangiye kumukoraho iperereza aho akurikiranyweho icyaha cya ruswa n’ibyaha bifitanye isano na yo.

Izi nkuru zombi zatumye izina rye ryiharira paji z’imbere mu bitangazamakuru bitandukanye birimo ibivuga n’ibyandikira kuri internet ndetse abakoresha imbuga nkoranyambaga cyane cyane Twitter bazitaramiraho.

Umugoroba wo ku wa 6 Gicurasi 2022, wabaye rurangiza kuko Bamporiki uri gukurikiranwa, yemeye ko yakiriye indonke ndetse anabisabira imbabazi Umukuru w’Igihugu n’Abanyarwanda bose.

Abinyujije ku rukuta rwe rwa Twitter, yavuze ko yahemutse ndetse umutima we wanze kumuha amahwemo kubera ibyo yakoze.

Yakomeje ati “Bavandimwe, Nshuti zanjye, namwe abankurikira kuri uru rubuga, Nakoze icyaha cyo kwakira indonke. Nkaba ntafite irindi jambo navuga usibye Kubasaba mwese imbabazi. Ndatakambye."

Ubu butumwa bwashyizwe hanze mu gihe cyo kwitegura kwinjira muri Weekend, ni bwo bwahererekanywaga hose ku mbuga nkoranyambaga.

Mu masaha asaga 15 gusa amaze abutangaje, ubutumwa bwa Bamporiki busaba imbabazi bumaze gutangwaho ibitekerezo bigera ku 2000 mu gihe abasaga 1300 babusangije abandi [retweet], na ho abarenga 5300 barabukunda.

Abatanze ibitekerezo bagushije ku bitekerezo bitandukanye birimo ibishima ubutwari Bamporiki yagaragaje bwo gusaba imbabazi n’abandi bagaragaje ko icyo yakoze ari icyaha kandi akwiye kugihanirwa.

Muri bo uwagumye mu ntekerezo za benshi ni uwitwa Yumva Jean Paul. Yanditse ati “Imbabazi z’Uwiteka n’abo yahaye ubutware zikubeho, kandi ntukongere gukora ibisa bityo ukundi!”

Perezida Kagame yahise asubiza ku butumwa bwe, avuga ko no guhana na byo ari ibintu bifasha.

Yagize ati “Ibyo uvuga wowe bifite ishingiro. Kutongera gukora ibisa nk’ibyo yakoze bibi. Bitari uguhora mu bibi ugahora usaba kubabarirwa! Ibya Bamporiki ni ko bimeze. Hari n’abandi bameze gutyo. Umuntu wese yakora icyaha ariko no kucyirinda birashoboka. Guhanwa nabyo birafasha!!!”

  Bamporiki yatakambye, benshi bamufasha gusaba imbabazi

Akimara gutanga ubutumwa busaba imbabazi, bamwe mu bakoresha imbuga nkoranyambaga batangiye kwerekana ko bashyigikiye intambwe Bamporiki yateye yo kwemera icyaha no gusaba imbabazi.

Uwitwa Rudahigwa yanditse yifashishije hashtag agaragaza ko ‘benshi’ bagikunda Bamporiki.

Ati “Turacyakunda Bamporiki. Muhererekanye ubu butumwa [retweet] kugera bugeze kuri Perezida @PaulKagame.’’

Nyarwaya Yago we yasabiye Bamporiki imbabazi, anashima ko yabaye intwari akemera guca bugufi no kwemera icyaha.
Yagize ati “Njyewe ndakumva cyane kandi rwose gusaba imbabazi ni ubutwari kandi ni ubwenge mu bundi...nanjye nkusabiye imbabazi rwose. Umubyeyi na we nzi neza ko ashyira mu gaciro bitari uyu munsi cyangwa ejo ndumva niteguye kumva inkuru nziza y’imbabazi.’’

Umunyamakuru Luckman Nzeyimana ukorera Urwego rw’Igihugu rw’Itangazamakuru, RBA, yavuze ko yizera ko imbabazi yasabye yazihawe kuko n’Imana yamubabariye.

Ati “Ndakubaha, ndagukunda, nakwigiyeho byinshi harimo no gukunda igihugu. Sinzigera nkwanga kubera ko umuntu aremwe mu gukosa ndetse no kwibagirwa. Nk’Umuyisilamu nemera ko iyo ukosheje ugasaba imbabazi abo wakoshereje n’Imana ikubabarira! Imana Ikurinde!’’

Ni na yo ntero yatewe na Ruvuzananga, wifashishije inkuru yo muri Bibiliya y’umwana w’ikirara wagarutse kwa se nyuma y’igihe yaratorongeye, akaza guhabwa imbabazi.

Yanditse ati “No muri Bibiliya umwana w’ikirara yemeye amakosa maze umubyeyi arongera aramwakira amushyira mu bandi bana. Na we bakubabarire ujye mu bandi bana. Umubyeyi wese agirira impuhwe abana.’’

Kuri iki gitekerezo, uwitwa Umwiru mukuru yahise amwibutsa ko hari abameze batyo benshi bacumbikiwe muri Gereza ya Nyarugenge iri i Mageragere.

Yamubwiye ati “Uzi abana b’ibirara bari i Mageragere muvandi [bro].’’

  Hari abasabiye Bamporiki guhanwa

Mu bitekerezo byatanzwe, harimo n’iby’abanditse basaba ko mu gihe Bamporiki yahamwa n’icyaha akurikiranyweho yahanwa kuko ibyo yakoze bigize icyaha.

Niyonzima Patrick wa Rusizi yanditse ko umuyobozi nka Bamporiki akwiye kubera abandi urugero.

Ati “Gusaba imbabazi n’intambwe ya mbere noneho no guhanwa bikabera abandi intangarugero nabyo birafasha ejo hatazagira n’undi ubikora akaza asaba imbabazi kandi yakabanje gutanga urugero rwiza. Rero muvandimwe sinkwanga ahubwo tanga urugero rwiza ube intore bandebereho. Murakoze cyane.’’

Bahati na we yanditse asa n’uwerekana ko amakosa akorwa n’abari ku rwego rwo hejuru, ari nka wa mubyeyi wiba uwo ahetse mu mugongo amureba.

Ati “Ibi ni byo twanze, ubwo se minisitiri ariye ruswa mudugudu yakora iki? U Rwanda rwaba ruganahe?”

Biseruka Jean d’Amour we yavuze ko niba koko Bamporiki yarafatiwe mu cyuho akwiriye guhanwa ngo n’abandi babibone batazakinisha kumwigana bizewe kuzababarirwa.

Ati “Abantu benshi berekana ko batera imbere bakavuga ko urubyiruko rudashaka gukora kandi ari ruswa ibafasha gutera imbere, baguhane.’’

Ellen Kampire we yanditse agaragaza ko ruswa ari icyaha gihanirwa n’amategeko atari ikosa ndetse ko “igihugu cyacu kigendera ku mategeko kandi ntawe uri hejuru yayo.’’

Ni na bwo butumwa bwatanzwe n’uwitwa Mahirwe Peter wibukije ko icyaha cya ruswa kimunga ubukungu bw’igihugu.

We yagize ati “Bwana @Bamporikie gusaba imbabazi ni ubutwari ariko ntibikuraho guhanwa. Umuntu uri ku rwego nk’urwawe ukwiriye kubera urugero urubyiruko, icyaha cya ruswa kimunga ubukungu bw’igihugu kandi nawe ubwawe urabizi.’’

Bamporiki yagizwe Umunyamabanga wa Leta muri Minisiteri y’Urubyiruko n’Umuco mu mpinduka zakozwe n’Umukuru w’Igihugu ku wa 4 Ugushyingo 2019.

Kugeza ubu, RIB iri gukora iperereza ku cyaha Bamporiki akurikiranyweho. Amakuru ataremezwa n’urwego rubifitiye ububasha ni uko yafatiwe mu cyuho yakira ruswa.

Uyu munyapolitiki w’imyaka 39 we yiyemeye ko yakoze icyaha cyo kwakira indonke. Aramutse agihamijwe n’inkiko yahanishwa igifungo kiri hejuru y’imyaka itanu ariko kitarenze irindwi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.

Bamporiki Edouard wari Umunyamabanga wa Leta muri Minisiteri y’Urubyiruko n’Umuco yemeye ko yakiriye indonke, asaba imbabazi Umukuru w’Igihugu n'Abanyarwanda bose. Ubutumwa bwe bwasembuye amarangamutima ya benshi by’umwihariko mu bakoresha Twitter

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .