00:00:00 IGIHE NETWORK KN KINYARWANDA EN ENGLISH FR FRANCAIS

Ubu bari he? Ibyo wamenya ku banyamakuru bumvikanye kuri Radio Salus igitangira

Yanditswe na Prudence Kwizera
Kuya 19 September 2022 saa 07:50
Yasuwe :

Radio Salus ifatwa nk’umusingi w’impinduramatwara mu itangazamakuru rya Radio mu Rwanda kuko kuva yatangira gusakaza amajwi bwa mbere tariki ya 18 Ugushyingo 2005, yakanguye benshi ndetse itanga umurongo ugenderwaho na radio nyinshi muri iki gihe.

Ni Radio yatangijwe na Kaminuza Nkuru y’u Rwanda ifite intego nyamukuru yo gufasha abanyeshuri biga itangazamakuru n’itumanaho kwimenyereza umwuga.

Ku munsi wa mbere isakaza amajwi n’indi minsi mike yakurikiyeho, hari abanyamakuru bayumvikanyeho mu biganiro byuje ubuhanga n’amajwi meza ku buryo benshi mu bayikurikiye banogewe nabyo.

Kuri ubu abo banyamakuru ntibakibarizwa kuri radio Salus kuko abenshi berekeje mu mirimo itandukanye hirya no hino mu gihugu ndetse no mu mahanga.

IGIHE yashakishije aho bari n’ibyo bakora kugira ngo ibibutse abakunze ibiganiro byabo.

Emma Claudine Ntirenganya

Umuntu wa mbere wafunguye indangururamajwi (micro) za Radio Salus igishingwa ni Emma Claudine Ntirenganya. Yatangiranye nayo ayikorera igihe kirekire mu biganiro bitandukanye byakunzwe.

Yabwiye IGIHE ko ari umwe mu batekereje gahunda zayo bahereye ku busa.

Ati “Nagize umugisha wo kuba umwe mu batekereje gahunda yayo duhereye ku busa, ikintu cyanejeje kurusha ibindi ni ukuba twarayitangije mu bihe hatari hakabayeho andi maradiyo yigenga menshi. Ikinshimisha ni uko yabaye radio yamenyekanye cyane igakundwa cyane ikaba intangarugero kubera ibiganiro bidasanzwe yakoraga.”

Akomeza avuga ko Radio Salus igishingwa yatangiranye ibiganiro byakunzwe na benshi, atanga urugero ku cyo yakoraga cyitwa ‘Imenye nawe’.

Ati “Urugero sinjya nibagirwa umubyeyi wanyandikiye anshimira ubwo nari namaze gukora ku kibazo cy’udusabo tw’intanga tw’umwana w’umuhungu, umwana we yari yaravukanye icyo kibazo, hanyuma yumvise ikiganiro kuri Radio Salus ajya kuvuza umwana we kandi birakosoka.”

Nyuma yaho yavuye kuri Radio Salus yerekeza mu Kinyamakuru Ni Nyampinga akomereza mu Kigo cy’Abanyamerika gishinzwe iterambere mpuzamahanga (USAID) aho yari akuriye itumanaho.

Kuri ubu ni umusesenguzi mu by’itumanaho mu biro by’Umuvugizi wa Guverinoma y’u Rwanda, umwanya yahawe tariki ya 14 Ukuboza 2021.

Aldo Havugimana

Ku munsi wa mbere Radio Salus isakaza amajwi, Aldo Havugimana ni we wagejeje amakuru ku bayikurikiye. Yakomeje kuba umunyamakuru w’iyi radio yamenyekanye mu gukora inkuru z’umwimerere, izicukumbuye, iz’ubuvugizi ndetse n’izigisha abaturage.

Nyuma yaho yaje no kuyibera umuyobozi imyaka itari mike akazi yafatanyaga no kwigisha muri Kaminuza Nkuru y’u Rwanda mu ishami ry’Itangazamakuru n’Itumanaho.

Mu 2013 yavuye kuri Radio Salus akomereza kuri Radio Isango Star, kuri ubu ni we muyobozi wa Radio y’igihugu, Radio Rwanda.

Terence Muhirwa

Ubwo Radio Salus yasakazaga amajwi ku munsi wa mbere undi wayikozeho mu makuru ni Muhirwa Terence. Uyu mugabo wamenyekanye cyane mu biganiro by’amateka y’u Rwanda kuri iyi radio yayikozeho n’indi mirimo itandukanye.

Yayibereye umunyamakuru, yabaye umuyobozi w’ibiganiro kugeza mu 2019.

Yakoze mu biganiro byakunzwe n’ubu bigikunzwe kuri iyi radio ya kaminuza y’u Rwanda birimo icya Karatunyuze cyibutsa abantu imibereho n’ibyaranze ubuzima bwabo mu myaka yo hambere; Hambere mu Rwanda kigaruka ku mateka yaranze igihugu kuva ku ngoma ya Cyami; mu gihe cy’ubukoloni na nyuma yaho.

Kuri ubu Muhirwa ni umukozi wa Komisiyo y’Igihugu y’Amatora umwanya yagiyeho kuva mu 2019.

Muhirwa yabwiye IGIHE ko kamwe mu dushya twayiranze igitangira ari izina ryayo.

Ati “Agashya ka mbere Radio Salus yazanye ni izina ‘Salus’ ubwaryo kuko tugitangaza izina ryayo abantu babaye nk’abatungurwa, bamwe bikabananira no kubivuga noneho dufata n’umwanya wo kujya tubasobanurira icyo bivuze. Ako kazina ni ko gashya ka mbere kabaye mu baturage kuko bari bamenyereye radio Rwanda gusa.”

Akomeza avuga ko ikindi cyabaye agashya ku bantu ari ‘ba nyiri radio ubwabo’ kuko abaturage babaye nk’abatungurwa bumvise ko Abanyeshuri bo muri kaminuza aribo ba nyirayo.

Ati “Abaturage batunguwe no kumva kaminuza ishinze radio kandi ivugirwaho n’abantu b’abahanga b’abanyebwenge. Ibyo rero byahise byongera icyizere n’ukuri kw’ibyo dukora bituma tugira abadukirikira benshi kuko bari badufitiye icyizere.”

Muhirwa avuga ko akandi gashya radio Salus yatangiranye ari uko ari yo yazanye uburyo bwo kwakira ibitekerezo by’abaturage kuri telefone bakavugira kuri radio by’ako kanya ndetse no kubaha umwanya wo gutanga ibitekerezo bakoresheje ubutumwa bugufi (SMS).

Ati “Ku buryo umuturage wabonaga bimutangaje kuba yahamagara agahita yiyumva kuri radio cyangwa se yakohereza ubutumwa bugufi akumva duhise tubusoma ako kanya bituma Radio Salus ikundwa cyane.”

Jado Castar

Umunyamakuru Bagirishya Jean de Dieu uzwi nka Jado Castar na we ari mu bavugiye kuri Radio Salus mu minsi yayo ya mbere mu kiganiro cya Siporo cyitwa ‘Salus Sports’.

Uyu mugabo uzwiho gusesengura amakuru avugwa muri Siporo mu ijwi rye ribyibushye, yakoreye Radio Salus igihe kirekire.

Ikiganiro yakoragamo cyazanye umwihariko mu kuvuga amakuru kuko nibwo hatangiye gahunda y’ubusesenguzi, bitandukanye na mbere aho wasangaga kuvuga amakipe yakinnye n’uko yatsindanye biba bihagije.

Iyi mikorere yabo yashinze imizi ikundwa na benshi ndetse n’andi maradiyo yashinzwe nyuma afatiraho urugero rwiza kugeza na n’ubu.

Avuye kuri Radio Salus, Jado Castar yerekeje kuri radio 10 na TV10 mu makuru ya siporo ndetse aba n’umuyobozi muri icyo gisata. Yabaye Visi Perezida wa Kabiri ushinzwe Amarushanwa mu Ishyirahamwe Nyarwanda ry’Umukino wa Volleyball (FRVB). Kuri ubu ni umuyobozi wa Radio B&B Umwezi FM aho akora n’ikiganiro cya siporo.

Jean Claude Ndengeyingoma

Ndengeyingoma Jean Claude yumvikanye mu biganiro bya Sports kuri radio Salus mu minsi yayo ya mbere aho yafatanyaga na Jado Castar mu kuvuga amakuru y’imikino no kuyasesengura.

Uyu munyamakuru wagaragaje ubuhanga yakomereje umwuga kuri Radio Rwanda aho yamaze igihe kitari gito mu makuru y’imikino no kogeza imipira.

Nyuma yaho yerekeje mu gihugu cya Australia ari naho kuri ubu atuye.

Kwizera Richard

Abazi Radio Salus igitangira ndetse bakunze no kuyikurikira bazi ikiganiro cyuje ubuhanga cyakozwe na Kwizera Richard cyitwa ‘Salus Quiz’ cyibazwamo ibibazo bikomeye byungura ubumenyi.

Muri icyo kiganiro n’abaturage bahabwaga ijambo bagahamagara kuri radio cyangwa bakohereza ubutumwa bakabaza ibyo bifuza gusobanukirwa.

Iki kiganiro cyarakunzwe cyane n’ubu kandi kiracyari mu biganiro bikurikirwa na benshi kuri Radio Salus.

Kibamo n’umwanya wo kubaza abaturage ibibazo abasubije neza bagahabwa ibihembo.

Kwizera yavuye kuri radio Salus akomereza ahandi harimo kuri televiziyo y’u Rwanda. Kuri ubu ni umunyamakuru wa KT Radio ufite umwihariko wo gufata amashusho n’amafoto kinyamwuga.

Barada Clementine

Abumvise Radio Salus mu minsi yayo ya mbere igitangira gusakaza amajwi ntibapfa kwibagirwa ijwi rya Barada Clementine wakoraga ikiganiro cyayo cyakunzwe cyitwa ‘Ambiance Love’ kigaruka ku rukundo.

Barada niwe watangije icyo kiganiro cyagize abagikurukira benshi bitewe n’ibitekerezo byagiye bitangwa muri cyo.

Benshi bibandaga ku gusaba ubujyanama bitewe n’ibikomere bagiriye mu rukundo, abandi bagatanga ibitekerezo ku byo babona byakorwa kugira ngo urukundo rw’umuhungu n’umukobwa cyangwa abashakanye rurambe.

Nyuma yo kuva kuri Radio Salus, Barada yakomereje mu kinyamakuru Ni Nyampinga ari naho yasubikiye umwuga w’itangazamakuru. Kuri ubu yikorera ku giti cye.

Germain Uwahiriwe

Ikiganiro Salus Relax kiri mu byakunzwe cyane kandi bigikurikirwa na benshi kuri Radio Salus bitewe n’uburyo amakuru y’imyidagaduro n’ibyamamare agisesengurirwamo.

Iki kiganiro cyatangijwe n’abarimo Germain Uwahiriwe cyagaragaje umwihariko kuko cyabwiraga abayikurukira amakuru y’ibyamamare bitandukanye ku buryo hari n’abakunze imyidagaduro kubera cyo.

Uwahiriwe yakoze n’ibiganiro byuje ubuhanga birimo ‘Menya n’ibi’ kigaruka ku bintu byabayeho mu Isi byiganjemo ikoranabuhanga; n’ikindi cyitwa ‘Hambere hanze’ kivuga amateka yo hanze y’u Rwanda.

Nyuma yaho yerekeje mu gihugu cya Canada aho yakoze muri kampani y’ubwishingizi. Kuri ubu atuye muri icyo gihugu.

Tuyishime Jado Fils

Tuyishime Jean de Dieu wamamaye nka Tuyishime Jado Fils yumvikanye mu gitaramo cya Radio Salus mu minsi ya mbere yayo cyizwi nk’Inkera Nyarwanda.

Ni ikiganiro cyakunzwe na benshi biganjemo abageze mu zabukuru kuko kiri mu muco nyarwanda.

Muri icyo gihe Radio Salus yari ikunzwe cyane bitewe n’uko yari radio ikorwaho n’abahanga b’abanyeshuri ba Kaminuza Nkuru y’u Rwanda bigatuma n’abayikurikira baba benshi.

Usibye Inkera Nyarwanda, Tuyishime yakoze mu bindi biganiro birimo Seka Gororoka [ubu cyitwa Nyereka Inyinya]; Umuco mu Gicumbi; Intashyo n’ibindi.

Yavuye kuri Radio Salus mu Ugushyingo 2007 yerekeza kuri Radio Isango Star kugeze mu 2009 ubwo yajyaga gukorera muri Orinfor (ubu yabaye RBA). Kuva mu 2009 kugeza ubu ni umunyamakuru wa RBA.

Prudent Nsengiyumva

Umunyamakuru Prudent Nsengiyumva na we ari mu bumvikanye kuri Radio Salus nyuma y’igihe itangiye gusakaza amajwi.

Yakoze mu gice cy’amakuru igihe kirekire mu nkuru ziganjemo ubuvugizi no guha ijambo abaturage bakavuga ibyifuzo byabo n’ibitekerezo.

Kuri ubu ni umunyamakuru wa radio mpuzamahanga y’Abongereza, BBC aho akunze kumvikana mu makuru mu rurimi rw’Ikinyarwanda.

Usibye aba hari n’abandi banyuzeho nyuma gato barimo Amb Uwihanganye Jean de Dieu wamenyekanye nka Henri Jado Uwihanganye mu kiganiro Salus Relax. Yabaye Umunyamabanga wa Leta muri Minisiteri y’Ibikorwa Remezo, kuri ubu ni Ambasaderi w’u Rwanda muri Singapore.

Hari kandi Rukizangabo Shami Aloys wakoze Ibiganiro birimo Inkera Nyarwanda, Umuco mu Gicumbi, Karatunyuze n’ibindi kuva mu 2006 kugeza mu 2010. Yahavuye ajya kuri Orinfor akomeza gukorana nayo imaze kuba RBA, ahava ajya kuri radio 10 na TV10. Kuri ubu ni umuyobozi w’ishyirahamwe ry’abanyamakuru bashinzwe ururimi n’umuco nyarwanda.

Hari n’abandi barimo Karangwa Mike na Ally Soudy bakoraga myidagaduro; Isheja Sandrine usigaye akora kuri Kiss FM; Oswald Mutuyeyezu uzwi nka Oswakim ukora kuri Radio&TV 10 n’abandi.

Rukizangabo Shami Aloys yamenyekanye mu Nkera Nyarwanda kuri Radio Salus
Ifoto ya Aldo Havugimana avuga amakuru muri studio ya Radio Salus ku munsi wa mbere isakaza amajwi
Hamza Raphaël ni we wafashije gutuma amajwi ya Radio Salus asakara ku munsi wa mbere nk’umutekinisiye. Kuri ubu aracyari umutekinisiye wayo
Icyicaro cya Radio Salus mu Karere ka Huye. Iyi foto yafotowe ku munsi wa mbere ubwo yatangiraga gusakaza amajwi mu 2005

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .