Amwe mu magambo yuje ubuhanga yavuzwe na George H.W. Bush

Yanditswe na Mukaneza M.Ange
Kuya 4 Ukuboza 2018 saa 11:57
Yasuwe :
0 0

Ku wa Gatanu w’icyumweru gishize nibwo inkuru y’incamugongo yasakaye ku Isi ko George Hubert Walker Bush, wabaye Perezida wa 41 wa Leta Zunze Ubumwe za Amerika yitabye Imana.

Uyu mukambwe w’imyaka 94 yaguye mu rugo rwe i Houston muri Leta ya Texas, akikijwe n’umuryango we. Yayoboye Amerika kuva mu 1989-1993.

Ni se wa George Walker Bush wabaye Perezida wa 43 wa Amerika.

Uretse ibigwi afite nk’umuntu wayoboye igihugu cy’igihangange ku Isi ndetse akakirwanirira ubwo yari afite imyaka 18 gusa y’amavuko, anazwiho kuba yaragiye avuga amagambo yuje ubuhanga.

Urubuga Inc rwagerageje gukusanya amwe mu magambo yavuzwe na George Bush Sr, ashobora guhindura ubuzima bwawe, ukagera ku ntsinzi n’umunezero.

1. “Mfite ibitekerezo byanjye bwite, ibitekerezo bikomeye ariko iteka siko nemeranya nabyo.”

Aya magambo ya Bush agaragaza ko nubwo yari umuntu ukomeye kandi ufite ibitekerezo byumvwa na benshi, yari azi neza ko nk’umuntu iteka ibyo atekereza bidasobanuye ko ari ukuri.

Yashatse kwerekana ko ari byiza guhora uharanira kutishyira hejuru ahubwo ukagaragaza ibyo utekereza mu kinyabupfura kandi ukiyoroshya, igihe hari undi ufite igitekerezo kiruta icyawe ukagishima.

2. “Tekereza ku bibazo byose dufite, imbogamizi zose duhura nazo. Igisubizo cya buri kimwe gihera mu burezi.”

Aha Bush yashakaga kugaragaza ko buri rugendo rwose umuntu agiye gutangira, intwaro nyayo ari ubumenyi. Kwihugura ku isoko ugiye kujyamo, ku mahirwe ubonye cyangwa igisubizo wifuza kuzana, nibyo bishobora gutuma ufata imyanzuro ishobora gushyirwa mu bikorwa koko.

3. “Nahawe akazi na data wacu muri Wall Street, ariko nifuzaga kuhava. Nifuzaga gutangira ibikorwa byanjye bwite.”

Ufatiye urugero kuri Bush Sr wabaye umumiliyoneri afite imyaka 40 gusa, ni byiza kwihangira inzira yawe bwite, ugashaka ikintu wikorera, kuko nubwo cyaba ari gito gute kigaragaza intsinzi bwite.

4. “Ntekereza ko imitekerereze ya Amerika, Umunyamerika umwe wifuza guhindura ubuzima bw’undi Munyamerika cyangwa ubushake bwacu bwo kubona ibihugu birushaho gutera imbere, cyangwa abaturage bo mu bindi bihugu babayeho neza bivuye muri iyi gahunda y’ubukorerabushake, ari ingenzi cyane by’umwihariko ku mibereho y’imbere mu mutima.”

Inc ivuga ko nubwo waba wishimira kuba mu bikorwa biharanira inyungu cyangwa bitayiharanira, icy’ingenzi ari ukugira indangagaciro zigamije guhindura ubuzima bw’abari hafi yawe.

Shyira imbere ibikorwa bigamije guhindura umuryango w’aho utuye byaba binyuze mu gukoresha amaboko, cyangwa ubumenyi wakuye mu byo wowe umaze kugeraho.

5. “Inzozi za Amerika zisobanuye kwitanga wese, gukora ibyo ushoboye kugira ngo ugere ku kintu runaka, nakongeraho ariko ko ukwiye no kwibuka gushimira uzamura abandi. Nta gisobanuro cyo kugera ku ntsinzi mu buzima kitarangwamo gufasha cyangwa gukorera abandi.”

Iyi mvugo ya Bush Sr igaragaza ko yari asobanukiwe neza ko intsinzi nyayo ari igihe umuntu yabashije kugera ku bikorwa bifatika, bitahinduye ubuzima bwe gusa, ahubwo bizatuma n’igihe atakiriho abantu bazahora bazirikana impinduka ibyo yakoze byazanye.

Biteganyijwe ko Bush azashyingurwa ku wa Kane mu Isomero ryamwitiriwe riri muri leta ya Texas ari naho umugore we Barbara n’umwana we Robin bashyinguye.

George H.W.Bush (wicaye) n'abaperezida bayoboye nyuma ye barimo umuhungu we George W.Bush n'abafasha babo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza