Nari nziko umugore utakubiswe atakubaka urugo: Ubuhamya bwa Uwiramiye wazinutswe guhohotera umugore we

Yanditswe na Evariste Nsengimana
Kuya 22 Ugushyingo 2019 saa 07:37
Yasuwe :
0 0

Uwiramiye Vital na Mukanyandwi Séraphine, abaturage bo mu Murenge wa Shogwe mu Karere ka Muhanga bavuga ko bamaze igihe kinini bashaririwe no kubana nk’umugabo n’umugore kubera amakimbirane bahoragamo ariko uyu munsi bakaba babanye mu mahoro.

Ni ubuhamya aba bombi batanga bashize amanga, bavuga ko ari umuti abantu babanye mu makimbirane bashobora gusomaho bagasubira mu kinyotera cy’urukundo.

Uwiramiye avuga ko yakuze aziko umugore udakubiswe adashobora kubaka urugo ngo rukomere ndetse na we atangira kubishyira mu bikorwa agishakana na Mukanyandwi.

Ati “Nkimara kubaka urugo nari nziko umugore utakubiswe atabasha kubaka urugo kuko nagendaga mbyumva ndetse atagomba kugira uburenganzira ku mutungo, atagomba kugira uburenganzira ku byerekeye imibonano mpuzabitsina, nari nziko igihe cyose mbishakiye ngomba kubikora.”

Ibyo ngo byamuhaga imbaraga zo gusesagurira umutungo mu kabari, akiyibagiza inshingano z’urugo ahubwo akarugezwamo no kurwana no guteza umutekano muke mu baturanyi.

Ati “Nkamubuza kujya aho abandi bagore bakorera cyangwa ahabereye inama kugira ngo atahakura amakuru yo kuba yagira icyo yakora ngo ave mu cyiciro namushyizemo.”

Mu gihe uyu mugabo yumvuga ko umugore adakwiye kugira uburenganzira na buke, Mukanyandwi we avuga ko kera yabonaga ababyeyi be bicara hamwe bakajya inama yo guteza imbere urugo.

Ati “Nageze mu rugo rwanjye nkabona ibyo ntibihaba, bigatuma nitekerezaho nibaza niba nta kintu umugore ajya atekereza ngo kigire umumaro.”

Byabaye ihurizo rikomeye kuri Mukanyandwi ariko umugabo we nta bushake na mba afite bwo kurishakira igisubizo, ahubwo agaharanira no gusiba inzira abaturage banyuramo bashaka kumugira inama.

Mukanyandwi yaje guhura n’umugore w’umuturanyi, amugira inama yo kujya mu itsinda ryo kwizigama. Umugambi barawunogeje ariko abikora mu ibanga umugabo we atabizi, n’aho abimenyeye ajya kwihaniza umugore wihaye ibyo kumugira inama.

Mukanyandwi ati “Nabonye ninguma mu rugo icyo nkeneye cyose ngisaba umugabo kandi ntakimpe, numva ko iryo tsinda ari iryo guteza imbere abagore, ndavuga nti ‘nanjye ngiyemo hari icyo nakwigezamo, ndyinjiramo nkajya nditangamo ayo nasigaje’.”

Yarimazemo iminsi bagera igihe cyo kurasa ku ntego ariko ku bw’amahirwe make umugabo arabimenya, ayo yahakuye ayamwaka yose nta n’umwenda yiguriyemo, ajya kuyanywera inzoga.

Amakimbirane yari amaze gufata indi ntera kugera ubwo abana b’uyu muryango bumvaga se atashye bagahunga bose kuko babaga biteguye ko agiye kurwana na nyina.

Uyu muryango waje kumenya amakuru ko hari amahugurwa atangwa n’Umuryango w’abagabo uharanira guteza imbere Ihame ry’Uburinganire no kurwanya Ihohoterwa rishingiye ku gitsina (RWAMREC), umugore amusaba ko bayitabira abitera utwatsi.

Nyuma yaje kumutega amatwi arayitabira ariko agiye guhinyuza ngo yumve ibyo bavuga, atangira gukurikirana amasomo gahoro gahoro aninjira mu itsinda ryo kwizigama na we.

Nyuma yo kwifatanya muri iryo tsinda, bagabanye amafaranga bizigamye bahita bayaguramo inka batangira kwiteza imbere buhoro buhoro.

Mukanyandwi ati “Nkimara kujya muri RWAMREC natangiye gufunguka umutwe numva ko hari agaciro mfite nk’umugore n’umugabo mbona atangiye kubyumva aranshyigikira tugenda twiteza imbere. Batwigishije uburinganire n’ubwuzuzanye, numva ko hari icyo namarira urugo.”

Uwiramiye avuga ko amasomo yahakuye yamuhinduye imyumvire, uyu munsi akaba yicara hamwe n’umufasha we bakajya inama ku cyateza imbere urugo rw’abo ndetse bashobora kugira abandi inama y’uburyo bakwikura mu makimbirane.

Ubushakashatsi bwakozwe ku mpamvu abantu babona zitera ihohotera rishingiye ku gitsina (KAP 2019) bwerekenya ko ubusinzi bubigiramo uruhare rungana na 52.2%, ubujiji 38.4%, abagore basuzugura abagabo 32.1% naho abagabo basuzugura abagore bikagira uruhare rwa 43.3%.

Uwiramiye Vital na Mukanyandwi Séraphine babanye mu mahoro nyuma y'igihe cy'amahari yaranze urugo rwabo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza