00:00:00 IGIHE NETWORK KN KINYARWANDA EN ENGLISH FR FRANCAIS

Inzu yakoreragamo Urukiko rw’Umwami i Nyanza igiye kubyazwa umusaruro

Yanditswe na Prudence Kwizera
Kuya 11 July 2022 saa 10:11
Yasuwe :

Mu Murenge wa Busasamana mu Karere ka Nyanza hari inzu ifite amateka yihariye kuko yakoreyemo Urukiko rw’Umwami Mutara III Rudahigwa watwaye u Rwanda kuva mu 1931 kugeza mu 1959.

Iyo nzu uyigeraho ukinjira mu Mujyi wa Nyanza mu mudugudu wa Nyanza mu Kagari ka Nyanza. Ni inzu bigaragara ko igikomeye n’ubwo imaze imyaka myinshi. Umwami Mutara yayifashishaga igihe ari gukemura ibibazo by’abaturage.

Mu rwego rwo gukomeza gusigasira umuco n’amateka, iyo nzu yatangiye kubyazwa umusaruro kuko igiye kugirwa inzu itanga amakuru ku bukerarugendo bwo muri Nyanza ndetse hagire na bimwe biyimurikirwamo.

Umuyobozi w’Akarere ka Nyanza, Ntazinda Erasme, yavuze ko kuri ubu bageze kure bayitunganya kugira ngo itangire gukoreshwa.

Yagize ati “Inzu yakoreragamo Urukiko rw’Umwami twarayivuguruye, icyo igiye gukora niyo itanga amakuru ku bukerarugendo muri Nyanza. Niba umuntu ageze i Nyanza avuga ati ‘ngiye gusura Nyanza’ atazigera avuga ati mpagarare nyoboze, Urukari ruri hehe cyangwa se ndasura iki? Amakuru yose akaba arimo.”
Yakomeje avuga ko abasura Akarere ka Nyanza bazajya banyura muri iyo nzu berekwe ibikorwa by’ubukerarugendo bihaboneka byose noneho bahitemo ibyo bifuza.

Ikindi ni uko muri iyo nzu hazamurikirwamo ibyerekana uko Umwami yatangaga ubutabera.

Ati “Ni inzu ndangamurage icyarimwe itanga n’amakuru y’ubukerarugendo muri Nyanza.”

Ntazinda yavuze ko muri iyo nzu hazaba harimo n’ibikoresho Abakerarugendo bazakenera bitewe n’aho bagiye gusura.

Ati “Niba tuvuga ngo dufite inzira z’abanyamaguru iyo umuntu agiye kuzigendamo ashobora gukenera inkoni, ingofero na bote, ibyo byose bikaba bihari, akeneye kugenda ku igare akarihasanga.”

Ntazinda yavuze ko icyiciro cya mbere cyo gutunganya iyo nzu cyarangiye hakaba hagiye gukurikiraho icya kabiri cyo gushyiramo ibikoresho.

Ati “Icyiciro cya kabiri tugiye gutangira muri uyu mwaka ni ugushyiramo ibindi bituma abantu bahasura, niba umuntu ahageze akabanza akabona n’ikawa yo kunywa cyangwa n’ikindi kintu cyamufasha gufata gahunda neza.”

Yavuze ko abanyabukorikori nabo batekerejweho bahabwa umwanya wo kumurika ibyo bakora no kubicuruza.

Yasabye abaturage kuzitabira kuyisura kugira ngo bamenye amateka ndetse no kuyibyaza umusaruro by’umwihariko ku bakora ibikorwa by’ubukorikori.

Akarere ka Nyanza kabumbatiye amateka menshi yiganjemo ayo hambere kuko Nyanza yabaye Umurwa Mukuru w’Ubwami kuva mu 1899 kugeza mu mu 1962.

Yatuwe n’Abami bane ari bo Kigeli IV Rwabugiri wari utuye ku misozi ya Mwima na Mushirarungu; Yuhi IV Musinga watuye i Mwima na Gakenyeri; Mutara III Rudahigwa watuye mu Rukali ndetse n’Umwami Kigeli V Ndahindurwa watuye i Busasamana.

Hari ingoro y’Abami yo mu Rukari, Ingoro y’Umurage wo Kwigira ku Rwesero, Umusezero w’Abami, Ibigabiro, Inzira Gakondo z’Ubukerarugendo; haboneka Amariba ya Mutende yafukuwe ku ngoma y’Umwami Mutara III Rudahigwa, aho Inyambo ze ndetse n’inka z’abaturage ziturutse imihanda yose zashokaga.

Hari kandi Icyuzi cya Nyamagana cyafukujwe n’Umwami Mutara III Rudahigwa afatanyije n’agoronome w’Umubiligi witwaga Dubois.

By’umwihariko mu 2019 i Nyanza hatangijwe inzira eshatu z’ubukerarugendo gakondo ziswe ‘The Nyanza Cultural Trials’ uko zitandukanye ariko zuzuzanya.

Iya mbere yitwa ‘Royal Trail’ ifite kilometero 10 izenguruka Umujyi wa Nyanza igakikiza Ingoro z’Umurage ebyiri zihari ari zo Ingoro y’Abami mu Rukari n’Ingoro y’Umurage wo kwigira iherereye ku Rwesero ahahoze hatuye Umwami Mutara III Rudahigwa.

Iyo nzira kandi inyura ahari ibindi byiza biranga amateka y’u Rwanda mu Karere ka Nyanza nk’Umusezero w’Abami i Mwima hatabarijwe Umwami Mutara III Rudahigwa tariki ya 28 Nyakanga 1959; Umwami Kigeli V watabarijwe ku ya 15 Mutarama 2017 ndetse n’Umwamikazi Gicanda Rosalie wahatabarijwe tariki ya 20 Mata 1995.

Inzira ya kabiri yitwa ‘Big View’ y’ibilometero umunani ituruka mu Mujyi wa Nyanza ikagera ku musozi wa Remera. Iyo uri kuri uwo musozi wa Remera uba ushobora kureba ku ntera y’umurambararo wa kilometero 50.

Ubasha kureba imisozi itandukanye ikikije Nyanza ndetse waterera amaso kure ukaba wabona ibindi bice by’u Rwanda birimo n’ibirunga biri mu Majyaruguru y’igihugu.

Inzira ya gatatu yitwa ‘Gatagara Trail’ y’ibilomtero 12 ituruka mu Mujyi wa Nyanza ikagenda ikikiza ibishanga ikagera i Gatagara ahari ibikorwa by’ububumbyi biteye imbere ndetse n’ikigo cyita ku bafite ubumuga.

Izo nzira zose uko ari eshatu zifite umwihariko w’uko ari utuyira twa Kinyarwanda tunyura mu misozi, ibibaya aho abantu batunyuramo bagenda bareba ahantu hateye indabo, ahahinze imyaka itandukanye, ahatuwe, urutoki n’ibindi byiza bitandukanye bihaboneka.

Mbere y’uko icyorezo cya COVID-19 cyaduka, Akarere ka Nyanza kasurwaga n’abakerarugendo basaga ibihumbi 75, intego ni uko bazamuka bakagera ku bihumbi 100.

Iyi nzu yakoreragamo Urukiko rw'Umwami nyuma yo kuyivugurura hagiye gukurikiraho icyiciro cya kabiri cyo kuyishyiramo ibyangombwa
Inzu yakoreragamo Urukiko rw’Umwami i Nyanza iherereye mu Kagari ka Nyanza mu Murenge wa Busasamana
Imbere muri iyi nzu hazashyirwamo ibigaragaza uko Umwami yatangaga ubutabera, hashyirwe n'ibikoresho bitandukanye bizakenerwa mu bukerarugendo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .