Virus nshya ya Covid-19 yatumye u Bwongereza buhagarika ingendo ziva muri Afurika y’Epfo

Yanditswe na Muhonzire Sylvine
Kuya 24 Ukuboza 2020 saa 09:42
Yasuwe :
0 0

U Bwongereza bwahagaritse ingendo ziva muri Afurika y’Epfo nyuma y’uko mu mujyi wa Londres no mu Majyaruguru y’Uburengerazuba bw’u Bwongereza hagaragaye abanduye iyi virus nshya yabonetse muri Afurika y’Epfo mu gihe kandi muri icyo gihugu bahanganye n’indi virus nshya ya Covid-19 itandukanye n’iyo muri Afurika y’Epfo.

Ibi byatangajwe na Guverinoma y’u Bwongereza aho mu itangazo ryashyizwe ahagaragara, ryavugaga ko nta ndege yo muri Afurika y’Epfo yemerewe gukandagira ku butaka bw’u Bwongereza.

Ikindi kandi ni uko umuntu wese wavuye muri Afurika y’Epfo ndetse n’uwaba yarahanyuze mu minsi 10 ishize atemerewe kwinjira mu Bwongereza, gusa umuturage w’u Bwongereza n’uwemerewe kuhatura (ufite Visa) waba waravuye muri Afurika y’Epfo mu minsi 10 ishize yemerewe kwinjira, gusa we n’abo babana bagomba kubanza kwishyira mu kato k’indi minsi icumi.

Iki gihugu kandi cyasabye umuturage wacyo wese waba waragiriye ingendo muri Afurika y’Epfo cyangwa yarahuye n’uwavuyeyo mu byumweru bibiri bishize, ko hamwe n’abo babana bagomba kwishyira mu kato k’iminsi 10.

Izi ngamba zifashwe nyuma y’uko u Bwongereza bwongereye umubare w’abaturage bagomba kujya mu kato kihariye ku itariki 26 Ukuboza, bangana na miliyoni esheshatu batuye mu turere tune twegereye Umujyi wa Londres ahakomeje kugaragara iyi virus nshya.

Uyu mubare watumye umubare w’abaturage bose bari gukurikiza ingamba zihariye uba miliyoni 24 hafi 43% by’abaturage b’u Bwongereza, kubera ubwiyongere bukabije bw’ubwandu bushya bwa Covid-19 bwiswe VUI-202012/01.

Ku munsi w’ejo mu Bwongereza hagaragaye abantu 39237 Coronavirus, umubare munini utarigeze ubaho kuva yagaragara muri iki gihugu, ndetse habayeho impfu 744 mu minsi 28 ishize iyi virus ibonetse mu Bwongereza.

Virus nshya ya Covid-19 yo muri Afurika y’Epfo yo yagaragaye bwa mbere mu Bwongereza ku wa kabiri w’iki cyumweru, byatumye buhita bufata ingamba zikomeye zo guhagarika ingendo ziva muri Afurika y’Epfo.

U Bwongereza bwahagaritse ingendo ziva muri Afurika y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .