00:00:00 IGIHE NETWORK KN KINYARWANDA EN ENGLISH FR FRANCAIS

USA: Amafaranga menshi mu mateka yari yaribwe kuri Bitcoin yagarujwe

Yanditswe na Dufitumukiza Salathiel
Kuya 9 February 2022 saa 10:27
Yasuwe :

Inzego z’ubutabare muri Leta Zunze Ubumwe za Amerika zataye muri yombi babiri bakekwaho kunyereza amafaranga akoresherezwa kuri internet, afite agaciro ka miliyari 5$.

Ayo mafaranga angana na 120.000 ubaze muri Bitcoin, ifaranga rya mbere rihenze muri akoreshwa kuri internet.

Yibwe mu 2016 n’abahanga mu by’ikoranabuhanga (hackers) bayakuye ku rubuga ruvunja amafaranga yo kuri internet rwitwa Bitfinex.

Ubwo yibwaga yari afite agaciro ka miliyoni 71$ ariko ubu angana na miliyari 5$ kuko agaciro ka Bitcoin katumbagiye.

Inzego z’ubutabera muri Amerika zatangaje ko abo ba-hackers binjiye kuri Bitfinex bakahakorera ibikorwa (transactions) birenga 2.000 mu buryo bunyuranyije n’amategeko maze bakahakura amafaranga bayashyira kuri konti yanditse kuri Ilya Lichtenstein w’i New York.

Mu kirego hagaragajwe ko Lichtenstein w’imyaka 34 n’umugore we, Heather Morgan, w’imyaka 31; mu myaka itanu ishize bagiye bohereza 25.000 ya Bitcoin kuri konti zitandukanye kandi mu buryo haterekanwa aho aturutse.

Bahimbaga imyirondoro ya konti za baringa iyo babaga bashaka kuvunjisha mu yandi mafaranga yo kuri internet atari Bitcoin.

Ku wa 8 Gashyantare 2022 ni bwo abo bombi batawe muri yombi. Bakurikiranyweho ubwambuzi no guhisha inkomoko y’amafaranga. Mu gihe babihamywa, buri wese yakatirwa imyaka 25 y’igifungo.

Iperereza n’ifatwa ryabo ryagizwemo uruhare n’inzego zo muri Washington DC, New York, Chicago na Ansbach mu Budage.

Amafaranga yagarujwe yari yibiwe ku rubuga rw'ivunjisha rwa Bitfinex

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .