Umucamanza yatesheje agaciro ikirego cy’uko Trump yibwe amajwi muri Pennsylvania

Yanditswe na Niyitanga Jean Paul
Kuya 22 Ugushyingo 2020 saa 04:35
Yasuwe :
0 0

Umucamanza wo muri Leta ya Pennsylvania yatesheje agaciro ikirego cy’abashinzwe kwamamaza Donald Trump cyasabaga ko miliyoni z’amajwi yo muri Leta ya Pennsylvania yaburizwamo kuko yabayemo ubujura.

Umucamanza witwa Matthew Brann yavuze ko icyo kirego nta shingiro gifite.

Mu matora ya Perezida wa Leta Zunze Ubumwe za Amerika yabaye ku itariki 3 Ugushyingo 2020 Trump yaratsinzwe ariko yanga kubyemera avuga ko yibwe amajwi ariko nanone ntiyabasha kwerekana ibimenyetso bifatika byemeza ko yibwe amajwi.

Ibyavuye mu matora byerekana ko Biden yagize amajwi 306 kandi yari akeneye 270 ngo atsinde amatora. Ni mu gihe Trump yagize 232 gusa.

Ubu abashinzwe kwamamaza Trump barasaba inkiko ko zasesa amajwi yo muri Leta zimwe na zimwe Biden yamutsinzemo.

Muri Leta ya Pennsylvania Joe Biden yatsinze Trump amurusha amajwi arenga ibihumbi 80 ariko Trump we arashaka ko amajwi yo muri iyi Leta asaswa kuko yabayemo ubujura.

BBC yanditse ko umucamanza Brann yavuze ko abamamaza Trump bashaka kubuza abaturage bakabakaba miliyoni zirindwi uburenganzira bwo gutora.

Ati“Urukiko rwasanze ikirego gishingiye ku bintu bivugwa gusa ariko bidafite ishingiro. Muri Leta zunze ubumwe za Amerika ibi ntibyatesha agaciro n’ijwi rimwe uretse no gusesa amajwi yose yo muri Leta zituwe cyane.”

Trump n’abamushyigikiye bavuga ko Leta ya Pennsylvania yanyuranyije n’itegeko nshinga rya Leta Zunze Ubumwe za Amerika kuko bemereye aba-démocrate gukosora amakosa mu gihe bari barimo gutora ariko ntibabyemerere aba- républicains. Umucamanza yavuze ko ibi nta bimenyetso babifitiye.

Bamwe mu ba républicains basabye Trump kwanga ibyavuye mu matora ariko nyuma y’iki cyemezo umusenateri w’umu-républicains witwa Pat Toomey yavuze ko Trump yamaze gukoresha inzira zose zemewe n’amategeko ngo arebe ko yatsinda amatora ariko bikaba byaranze bityo asaba Trump kwemera ibyavuye mu matora.

Gusa nubwo bimeze bityo, Rudy Giuliani, umunyamategeko wa Donald Trump we yavuze ko iki cyemezo urukiko rwafashe ku kirego cya Trump ari inzira nziza yo gutuma bajuririra urukiko rw’ikirenga rwa Leta zunze ubumwe za Amerika.

Uretse muri Pennsylvania, mu zindi Leta nka Georgia abamamaza Trump basabye ko amajwi yongera kubarwa bwa gatatu nyuma yo kuyabara ijwi ku rindi hakoreshejwe intoki bikemezwa ko Biden ari we watsinze.

Muri Leta ya Michigan, abamamaza Trump na ho basabye komisiyo y’Amatora kuba iretse kwemeza ibyavuye mu matora bakabanza gukora igenzura ryimbitse rizamara ibyumweru bibiri ariko ngo ibyo na byo ntibyemewe n’amategeko.

Ikirego cya Donald Trump cyo gusesa amajwi yo muri Leta ya Pennsylvania cyateshejwe agaciro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .