00:00:00 IGIHE NETWORK KN KINYARWANDA EN ENGLISH FR FRANCAIS

Uganda: Kizza Besigye utavuga rumwe na leta yatangiye kwiyamamariza kuba perezida

Yanditswe na

Mukaneza M.Ange

Kuya 5 Ugushyingo 2015 saa 08:19
Yasuwe :

Kizza Besigye utavuga rumwe na leta ya Uganda yatangiye kwiyamamariza kuba perezida ku itariki ya 4 Ugushyingo, aho ahagarariye ishyaka riharanira impinduka muri demokarasi, Forum For Democratic Change(FDC).

Besigye ugiye guhagararira FDC mu matora y’umukuru w’igihugu muri Uganda ku nshuro ya Kane, atangiye ibikorwa byo kwiyamamaza nyuma ya Perezida Museveni uhagarariye ishyaka riri ku butegetsi rya NRM ndetse na Amama Mbabazi wiyamamaza ku giti cye.

Ubwo yakirwaga nabo mu ishyaka rye ku kibuga cya Nakivubo mu mujyi wa Kampala, Besigye yababwiye ko inshingano bafite ari iyo kwibohora no kongera gushyira igihugu ku murongo.

Ati” Inshingano ya mbere ni ukwibohora, kwishyira ukizana mu gihugu cyacu. Tugomba gufata igihugu mu biganza byacu, ubutegetsi bugomba gusubira mu maboko y’abaturage. Inshingano ya kabiri n’ukongera gushyira ku murongo igihugu cyacu. Ibi nibyo nshaka gusezeranya abantu.”

Abarwanashyaka ba FDC bari baje kumushyigikira n’indabo mu biganza basubiragamo intero igira iti “Umuturage umwe, Uganda imwe (One people, One Uganda ).”
Abashyigikiye Besigye bashinja Perezida Museveni gutonesha abo mu ishyaka rye gusa, umwe muri bo witwa Lawrence ufite icyiciro cya gatatu cya Kaminuza yatanze urugero rw’ukuntu yagiye gukora ikizamini cy’akazi nyuma yasubirayo agasanga kamaze guhabwa uwo mu ishyaka rya NRM.

Kasosi wo mu ishyaka rya FDC yavuze ko impamvu yahisemo gushyigikira iri shyaka aruko yifuza impinduka muri Uganda.

Ati ”Turambiwe ubu butegetsi bushaje. Imyaka 30 ku butegetsi . imyaka 30 none arashaka indi itanu y’inyongera. N’iki se yahindura mu myaka itanu atigeze akora mu myaka 30”.

Ku itariki ya 4 Ugushyingo niwo wari umunsi wa nyuma wo gutanga impapuro zo guhatanira umwanya w’umukuru w’igihugu, abakandinda umunani akaba aribo bemerewe kwiyamamaza kuzahatanira uyu mwanya mu matora azaba muri Gashyantare 2016.

Uretse Museveni uri ku butegetsi kuva mu 1986 na Besigye bamaze guhanganira uyu mwanya inshuro eshatu, Mbabazi nawe wigeze kuba Minisitiri w’Intebe ni umwe mu bitezweho kuzana impinduka muri aya matora.

Justin Willis umuhanga mu bijyanye n’amatora muri Afurika y’Uburasirazuba avuga Museveni umaze kuyobora imyaka 30, aho mu 2001, 2006 na 2011 yagiye ahangana na Besigye ariwe ufite amahirwe yo kongera gutsinda amatora bitewe n’umutungo afite ndetse no kuba yakwifashisha leta ayoboye.

Willis asanga kugira ngo Mbabazi na Besigye babashe gukura u butegetsi Museveni wagize amajwi 68% mu 2011, Besigye asabwa kugumana byibura amajwi 26% yagize mu matora aherutse Mbabazi nawe akagerageza kwigarura amajwi y’abitandukanyije na Museveni ndetse bombi bagafatanya abifashe ntibatore banganaga na 40% mu 2011 kubashyigikira.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .