Ubushakashatsi bwagaragaje ko gufashisha abakene amafaranga bibagirira akamaro kurusha kubafashisha ubundi buryo

Yanditswe na Ndahayo Emmanuel
Kuya 16 Nzeri 2020 saa 07:18
Yasuwe :
0 0

Ubushakashatsi bwakozwe n’ikigega cy’Abanyamerika cyita ku iterambere mpuzamahanga, USAID, bwagaragaje ko muri rusange, uburyo bwo gufasha abakene bahabwa amafaranga bagahitamo icyo bayakoresha, butanga umusaruro mwiza wo kubakura mu bukene, kurusha uburyo bwo kubahitiramo ibyo bahabwa.

Ni ubushakashatsi bumaze imyaka ibiri bukorerwa mu Rwanda, aho byagaragaye ko abantu bahawe amafaranga yo kubafasha, bageze ku iterambere kurusha abahawe ibirimo amahugurwa, ibiribwa n’ibindi bahitiwemo.

Ubu bushakashatsi bubayeho nyuma y’imyaka myinshi hakorwa ubukangurambaga bwo guhindura uburyo bukoreshwa mu gufasha abakene, kuko ubusanzweho busa nk’ubudatanga umusaruro, dore ko hari aho ubukene bwiyongereye, ahandi bukaguma ku kigero bwariho kandi hakorera imiryango myinshi y’abagiraneza.

Ibi binajyana n’ibyagiye bigarukwaho ko iyo miryango akenshi ireba inyungu zayo, ugasanga umusaruro itanga ari mucye cyane ugereranyije n’ibyo iba yatakaje byitirirwa gufasha abakene.

USAID yahisemo gukorera ubu bushakashatsi mu Rwanda nka kimwe mu bihugu bifite gahunda zihamye zo guteza imbere abaturage ku mugabane wa Afurika.

Muri ubu bushakashatsi, igice kimwe cy’abafashwa bahawe amahugurwa yamaze muri rusange ibyumweru 30 agamije kubafasha gushaka akazi.

Nyuma y’amezi 18, byagaragaye ko iri tsinda ryateye imbere mu bijyanye no gusubiza ibibazo neza, gukora amasaha menshi ndetse no kwizigamira ariko ntiryatera imbere mu bijyanye no kubona akazi, ndetse no kwivana mu bukene muri rusange.

Ku rundi ruhande, irindi tsinda ryahawe amafaranga angana n’ayakabaye yakoreshejwe amahugurwa.

Icyaje kugaragara ni uko itsinda ryahawe amafaranga ryarushijeho kugira ubushobozi bwo kuzamura inyungu yo ku kwezi, kugura ibikoresho ndetse no guteza imbere imibereho yo mu rugo muri rusange.

Ikintu cyonyine itsinda ryakoze amahugurwa ryarushije iryahawe amafaranga ni ubumenyi ku bijyanye no gukora ubucuruzi, usibye ko kubera kutagira igishoro, bitabakundiye kubishyira mu bikorwa.

Hari kandi itsinda ryahawe amahugurwa n’amafaranga, gusa nabwo bigaragara ko abahawe amafaranga gusa bikenuye kurusha ibi byiciro byombi.

USAID ni cyo kigega cya mbere ku Isi mu gutanga inkunga ifasha abakene hirya no hino ku Isi, ku buryo kuba cyatangiye gukora ubushakashatsi nk’ubu bishobora kugira ingaruka ku mikorere yacyo, maze amamiliyoni y’abafashwa n’iki kigega akarushaho kugira ubuzima bwiza.

Ikindi gitanga icyizere muri ubu bushakashatsi ni ko bigaragara ko abahawe amafaranga babashije kwivana mu bukene koko, ibigaragaza ko abafashwa ari na bo baba bazi neza icyo bakeneye kugira ngo bivane mu bukene.

Ubushakashatsi nk’ubu buzongera kuba nyuma y’imyaka itatu, ahanini kuko umusaruro w’amahugurwa (nk’igice cy’uburezi) ushobora kuboneka nyuma y’igihe kirekire.

Ubushakashatsi bwagaragaje ko gufashisha abakene amafaranga biruta kubafashisha ubundi buryo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .