U Bwongereza bwakuye u Bufaransa kuri lisiti y’ibihugu nyabagendwa

Yanditswe na Nkurunziza Ferdinand
Kuya 14 Kanama 2020 saa 10:51
Yasuwe :
0 0

U Bwongereza bwafashe umwanzuro wo gushyira mu kato k’iminsi 14 abagenzi bose baturutse mu Bufaransa nyuma y’aho iki gihugu cyongeye kugira umubare munini w’ubwandu bushya bw’icyorezo cya COVID-19.

Kuva kuri uyu wa Gatandatu, tariki ya 15 Kanama 2020, saa Kumi za mu gitondo ku isaha ngengamasaha ya GMT, buri mugenzi wese ugeze mu Bwongereza aturutse mu Bufaransa azajya yishyira mu kato k’ibyumweru bibiri. Abazarenga kuri aya mabwiriza bazajya bacibwa amande agera ku madorali 1200.

Iki cyemezo cyafashwe nyuma y’aho inzego z’ubuzima mu Bufaransa zitangaje ko zabaruye abandi bantu 2 669 banduye COVID-19 ku munsi umwe.

Mu kiganiro Umunyamabanga wa Leta Ushinzwe Ubwikorezi mu Bwongereza, Grant Shapps, yagiranye na BBC, yavuze ko igihugu cye cyakoze ibishoboka byose mu kugabanya imibare y’abandura COVID-19 bityo ko icya nyuma bagomba gukora ari ukwita ku bagaruka mu gihugu bafite ubwandu mu rwego rwo kurinda buri muturage.

Shapps avuga ko iki cyemezo kizanagira ingaruka ku Bongereza bagera ku 160 000 bakiri mu biruhuko mu Bufaransa.

Abasesenguzi bavuga ko umubare munini w’Abongereza bakiri mu Bufaransa, bari bugerageze gutaha mbere y’uko isaha yo gushyira mu bikorwa iki cyemezo igera.

Iki cyemezo cyari cyatangajwe na Minisitiri w’Intebe w’u Bwongereza, Borris Johnson, mu ijoro ryo kuri uyu wa Kane, mu gihe abantu benshi bari bakomeje kubihwihwisa kubera ubwiyongere bw’ubwandu bwa COVID-19 mu Bufaransa.

Umunyamabanga wa Leta ushinzwe Ibikorwa by’Umuryango w’Ubumwe bw’u Burayi mu Bufaransa, Clement Beaune, abinyujije kuri Twitter, yatangaje ko babajwe n’iki cyemezo cy’u Bwongereza […] ku buryo gishobora gutuma nabo bafata icyemezo cyo gushyira mu kato abagenzi baturutse mu Bwongereza, ariko ko bizeye ko ibintu bishobora gusubira uko byahoze mu gihe cya vuba.

Ibindi bihugu byakuwe ku rutonde rw’ibyo ababiturukamo bemerewe kwinjira mu Bwongereza badashyizwe mu kato birimo u Buholandi, Malta, Monaco, Ibirwa bya Turks na Caicos na Aruba.

Hagati aho abagenzi baturuka mu Bwongereza babarirwa mu bihumbi bari bibereye mu biruhuko muri Espagne, ubwo iki gihugu cyakurwaga ku rutonde rw’ibifite abaturage bemerewe kwinjira mu Bwongereza badashyizwe mu kato mu mpera za Nyakanga uyu mwaka nyuma y’aho Espagne yongeye kugira umubare munini w’abandura COVID-19.

U Bwongereza bwakuye u Bufaransa kuri lisiti y'ibihugu nyabagendwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .