00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa: Ibikorwa by’Inteko byahagaritswe igitaraganya kubera imvugo y’umudepite yuje ivanguraruhu

Yanditswe na Bukuru JC
Kuya 4 Ugushyingo 2022 saa 11:29
Yasuwe :

Perezida w’Inteko Ishinga Amategeko y’u Bufaransa, Yaël Braun-Pivet, yahagaritse imirimo yo kubaza ibibazo abagize guverinoma kuri uyu wa Kane nyuma y’amagambo y’ivangura rishingiye ku ruhu yavuzwe mu bitabiriye iki gikorwa akazamura uburakari mu badepite.

Mu gihe umudepite w’umwirabura wo mu ishyaka La France Insoumise (LFI), Carlos Martens Bilongo yatangaga ibitekerezo ku bibazo by’abimukira binjira mu buryo butemewe n’amategeko, undi mudepite yateye hejuru avuga ko “bagomba gusubira muri Afurika.”

Nyuma y’iminota mike mu gihirahiro, Perezida w’inteko yahisemo guhagarika igikorwa cyaberaga mu nteko bitewe n’ubukana bw’ibyahaberaga n’amarangamutima ya benshi yari yamaze kuzamuka. Umudepite wo mu ishyaka National Rally, Grégoire de Fournas ni we washinjwe iyo mvugo.

Uhagarariye abadepite bo mu ishyaka LFI, Mathilde Panot yagize ati “Uyu munsi abo muri ‘Extrême droite’ bigaragaje uko bari. Tugiye gusaba igihano kirmereye kuruta ibindi, cyo guhagarika mu gihe cy’amezi menshi uyu mudepite.”

Carlos Martens Bilongo yavuze ko bibabaje cyane. Ati “Biteye isoni kwirukana umuntu azizwa ibara ry’uruhu rwe muri iki gihe.”

Minisitiri w’Intebe, Elizabeth Borne yagize ati “ Ivanguraruhu nta mwanya rifite muri demokarasi yacu.” Yasabye ko Inteko Ishinga Amategeko ikwiye gushyiraho ibihano.

Abo mu ishyaka rya Renaissance bavuze ko batazongera kwitabira ibikorwa byo mu Nteko mu gihe cyose umudepite wakoresheje imvugo yuje ivanguraruhu yaba atarahanwa by’intangarugero. Ibi byatangajwe na visi perezida w’iryo tsinda, Sylvain Maillard.

Carlos Martens Bilongo wo mu ishyaka LFI ubwo yatangaga ibitekerezo yarogowe n'undi mudepite wateraga hejuru avuga ko abimukira bagomba gusubizwa muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .