Israel: Benjamin Netanyahu yasabye ubudahangarwa kubera ibyaha ashinjwa

Yanditswe na Nkurunziza Ferdinand
Kuya 2 Mutarama 2020 saa 03:25
Yasuwe :
0 0

Minisitiri w’intebe wa Israel, Benjamin Netanyahu, ushinjwa ibyaha bya ruswa, yahisemo gusaba Inteko Ishinga Amategeko y’igihugu cye kumuha ubudahangarwa, bumwemerera kudakomeza gukurikiranwa n’ubushinjacyaha ku byaha akekwaho.

Icyifuzo cya Netanyahu kiramutse cyubahirijwe, cyakereza urubanza yarezwemo n’ubushinjacyaha, rukaba rwakwimurirwa nyuma y’amatora ateganyijwe muri Werurwe uyu mwaka.

Mu Ugushyingo 2019, umushinjacyaha mukuru muri Israel yashinjije Benjamin Netanyahu ibyaha birimo ruswa, kurigisa umutungo, no kutubahiriza inshingano ashinzwe mu birego bitatu bitandukanye.

Netanyahu wahakanye ibyo aregwa byose, akeneye gushyigikirwa n’abagize Inteko Ishinga Amategeko barenga kimwe cya kabiri cyabo, kugira ngo yemererwe ubwo budahangarwa.

Uyu Netanyahu umaze igihe kirekire ku butegetsi ugereranyije n’abamubanjirije, aregwa kuba yarakiriye impano z’abaherwe bakomeye, akazikoresha hagamijwe kugira ngo itangazamakuru rirusheho kumuvuga neza.

Netanyahu yasabiye ubudahangarwa mu kiganiro cyatambutse kuri televiziyo, habura amasaha ane gusa ngo igihe yari yahawe cyo kugira icyo asaba kirangire.

Yagize ati “Byakabaye mu murongo w’amategeko…ndetse n’intego yo gukomeza kubakorera, kubw’ahazaza ha Israel.”

Mu kwezi kwa gatatu uyu mwaka, Netanyahu azaba ahanganiye n’andi mashyaka mu matora ku nshuro ya gatatu mu gihe kitarenze umwaka umwe.

Urubanza ruregwamo Netanyahu rushobora kutaba mu gihe yaba ahawe ubudahangarwa, ariko na none Inteko Ishinga Amategeko ya Israel iherutse guseswa, isa naho idashobora kugira icyo ikora ku busabe bwa Minisitiri w’intebe mbere y’amatora.

Netanyahu naramuka ahamwe n’ibyaha aregwa, asabwa kuzahita ava ku butegetsi. Amatora aheruka kuba mu kwezi kwa kane n’ukwa cyenda 2019, yasize ishyaka rya Netanyahu Likud n’iryo bahanganye, Blue and White nta na rimwe ribonye amajwi aryemerera gushyiraho guverinoma nshya.

Benny Gantz, uyobora ishyaka, Blue and White ritavuga rumwe n’ubutegetsi, unashaka kwiyamamaza ku mwanya wa Minisitiri w’intebe , yavuze ko we n’ishyaka rye bazakora ibishoboka byose bakaburizamo umugambi wo guha ubudahangarwa Netanyahu.

Ati “Sinigeze ntekereza na rimwe ko dushobora kuzabona umunsi Minisitiri w’intebe wa Israel azarwanya kujya imbere y’amategeko n’ubutabera.”

Avigdor Lieberman, uyobora ishyaka, Yisrael Beiteinu, kuri uyu wa Gatatu yavuze ko ishyaka rye rizatora rirwanya ubusabe bw’ubudahangarwa bwa Netanyahu.

Perezida w’inteko Ishinga Amategeko ya Israel, Yuli Edelstein, unabarizwa mu ishyaka ‘Likud’ rya Netanyahu, yavuze ko iki kibazo bazakiganiraho mu cyumweru gitaha.

Netanyahu yasabye Inteko Ishinga Amategeko kumuha ubudahangarwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .