Sobanukirwa imvano y’imyigaragambyo imaze igihe yugarije Belarus

Yanditswe na Uwimana Abraham
Kuya 30 Nzeri 2020 saa 05:41
Yasuwe :
0 0

Tariki ya 9 Kanama 2020, Alexander Lukashenko yongeye gutorerwa kuyobora Belarus ahigitse Svetlana Tikhanovskaya bari bahanganye mu matora ataravuzweho rumwe.

Abaturage babarirwa mu bihumbi bacyumva inkuru y’intsinzi ya Lukashenko bagiye mu mihanda bayamaganira kure bavuga ko itanyuze mu mucyo ahubwo ko hakozwe amanyanga mu matora.

Kuva ubwo nta cyumweru cy’ubusa gishira Belarus itagarutse mu nkuru nyamukuru mu bitangazamakuru mpuzamahanga, bitewe n’iyo myigaragambyo igenda irushaho gukaza umurego.

Alexander Grigoryevich Lukashenko ayobora Belarus kuva muri Nyakanga 1994, ubwo iki gihugu cyabonaga ubwigenge.

Ubutegetsi bwe ntibwakunze kuvugwaho rumwe n’abantu batandukanye, abenshi higanjemo n’ibindi bihugu byo mu Burayi bamufata nk’umunyagitugu.

Kuva yajya ku butegetsi, yatangiye guhindura amategeko, ashyiraho amuha ububasha budasanzwe ndetse yahise anahindura Itegeko Nshinga akuramo ingingo yashyiriragaho Perezida manda ntarengwa yemerewe kwiyamamariza.

Perezida Alexander Grigoryevich w’imyaka 66 yakunze kwigaragaza nk’umunyagihugu ukomeye, ufite imico myiza, urinda igihugu cye ngo kidahungabanywa n’amahanga ndetse wizeza umutuzo usesuye abaturage be.

Abatavuga rumwe n’ubutegetsi bwe babunenga cyane ubwiyongere bwa ruswa, ubukene, ubushomeri n’imishahara iciriritse, igikomeye muri byo ngo ni uko yananiwe gufata ingamba zihamye zo guhangana na Coronavirus.

Ibi byose biri mu bituma bifuza impinduka, bakaba batishimiye ko yongera kubayobora muri iyi manda, ari yo mpamvu benshi bakomeje imyigaragambyo yo kumwamagana.

-  Ishusho y’imyigaragambyo

Kuva ubwo hatangazwaga intsinzi ya Alexander Lukashenko, ku wa 9 Kanama 2020, abarenga 200,000 bahise baburira mu Murwa Mukuru Minsk rwagati bigaragambya bahamagarira Lukashenko kurekura ubutegetsi. Ibi kandi babikora buri cyumweru kuva ibyavuye mu matora byatangazwa.

Leta ya Lukashenko ifatanyije n’igipolisi bakomeza guhangana n’abigaragambya bashaka uburyo bwo guhosha iyo myigaragambyo ariko bikaba iby’ubusa.

Abantu barenga 12 000 bamaze gutabwa muri yombi n’inzego z’umutekano bazira kwigaragambya, Polisi yagiye ikubita bikomeye ndetse inatera imyuka iryana mu maso abigaragambya.

Ibi byatumye bamwe bacika intege gusa abandi barushaho gukaza umurego bashinja polisi gukoresha ingufu z’umurengera no kugirira nabi abaturage.

Mu bataranyuzwe n’iyi ntsinzi ya Lukashenko, ku isonga hari uwo bari bahanganye Svetlana Tikhanovskaya, utaremeye ibyavuye mu matora akavuga ko ari we wagombaga gutsinda.

Impamvu ahamya ko habaye uburiganya mu matora ni uko na mbere yayo bamwe mu banyapolitiki batavuga rumwe n’ubutegetsi bagiye bafungwa, barimo n’umugabo we Sergei Tikhanovsky wahabwaga amahirwe mu bari guhangana na Lukashenko.

Tikhanovskaya yahisemo kwiyamamaza nyuma y’uko umugabo we Sergei afunzwe kandi ari we byari biteganyijwe ko aziyamamaza.

Nawe yari asanzwe ari impirimbanyi nk’umugabo we ariko umugabo we niwe wari uri ku ruhembe.

Uyu mugore wahise uhungira muri Lithuania nyuma y’amatora we n’abana be, avuga ko abizi neza yatsinze amatora ku majwi 60% ndetse ko yiteguye kuyobora Belarus.

Aho ari muri Lithuania yagiye akora amavidewo menshi arimo asaba Umuryango w’Abibumbye ko wakwinjira muri iki kibazo ugasaba Lukashenko kuva ku butegetsi no kugarura demokarasi muri Belarus.

Lukashenko we yakomeje kwanga kuva ku izima ndetse abatemera iyi ntsinzi ye bose, barimo abasaba ko habaho imishyikirano bagiye bafungwa abandi bagahatwa ibibazo.

Mu mwanya w’ibiganiro bishobora guhosha imyigaragambyo, Leta ya Lukashenko ikomeje gushinjwa gukoresha ingufu z’umurengera mu guhohotera abigaragambya. Benshi mu bahohotewe berekanye amafoto yabo bakomerekejwe barangiza bakanafungwa ntibahabwe ubufasha bwo kuvurwa.

Ku wa 23 Nzeri nibwo Alexander Lukashenko yarahiriye kuba Umukuru w’Igihugu, mu bwiru bukomeye kuko nta matangazo yasohotse nk’uko byari bisanzwe, amenyesha abantu ko hazaba uyu muhango usanzwe ufatwa nk’ukomeye.

Ni umuhango utaranyujijwe mu gitangazamakuru na kimwe ahubwo ushinzwe itangazamakuru muri Leta yasohoye itangazo rivuga ko Alexander Lukashenko yarahiriye indi manda igikorwa ngo kikaba cyabereye mu Ngoro y’Ubwigenge.

Lukashenko umaze imyaka 26 ku butegetsi yashimangiye mu magambo ye ko nta gahunda afite yo kuburekura aho yavuze ati “sinshobora. Nta burenganzira mfite bwo gutererana Abanya-Belarus.”

Nyuma y’iminsi impirimbanyi za politiki muri Belarus zitunga agatoki Perezida Lukashenko, ibihugu bitandukanye birimo Canada n’u Bwongereza byafatiye ibihano uyu Mukuru w’Igihugu n’umuryango we.

U Bwongereza bwafatiye ibihano Alexander Lukashenko, umuhungu we n’abandi bayobozi bakuru muri Guverinoma kubera uruhare rwabo mu bujura bw’amatora no mu mvururu zayakurikiye. Mu gihe cy’amatora, abayobozi muri Belarus babujije indorerezi za Ambasade y’Abongereza kureba uko agenda.

Abaturage babarirwa mu bihumbi bacyumva inkuru y’intsinzi ya Lukashenko bagiye mu mihanda bayamaganira kure
Abigaragambya baba bahanganye n'inzego z'umutekano! Mu kubatatanya polisi ikoresha imyuka iryana mu maso
Imyigaragambyo ikomeye muri Belarus yatewe n'ibyavuye mu matora
Perezida Aleksandr Lukashenko yafatiwe ibihano n'ibihugu birimo u Bwongereza. Iyi foto yafashwe ku wa 23 Nzeri 2020 ubwo yarahiraga
Svetlana Tikhanovskaya ari mu batavuga rumwe na Leta, avuga ko yibwe amajwi kuko ariwe watsinze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .