00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya kuri Ayman al-Zawahiri wari umuyobozi wa al-Qaeda n’uko yishwe

Yanditswe na Muyisenge Jean Felix
Kuya 2 August 2022 saa 09:43
Yasuwe :

Mu rukerera rwo kuri uyu wa Kabiri, nibwo Perezida wa Leta Zunze Ubumwe za Amerika, Joe Biden, yatangaje ko bagabye igitero cya drone cyahitanye umuyobozi mukuru wa Al-Qaeda, Ayman al-Zawahiri.

Uyu mugabo w’imyaka 71 yatangiye kuyobora Al-Qaeda mu 2011, asimbuye Osama Bin Laden wari umaze kwicwa na Leta Zunze Ubumwe za Amerika.

Ari mu bateguye ibitero by’iterabwoba byagabwe kuri Amerika tariki 11 Nzeri 2001, kuri World Trade Center na Pentagon, bihitana abantu hafi 3000.

Zawahiri yavutse mu 1951, akurira mu gace gatuwe n’abifite i Cairo mu Misiri. Se yari umuganga ukomeye, mu gihe sekuru Rabia’a al-Zawahiri yari Imam akanigisha ubuvuzi muri kaminuza ya al-Azhar i Cairo.

Zawahiri yishwe n'igisasu yarashweho na drone

Umuvandimwe wa sekuru we, Abdel Rahman Azzam we yabaye umunyamabanga wa mbere w’Umuryango w’Ubumwe bw’Abarabu.

Ku myaka 15 y’amavuko, al-Zawahri yaje gutabwa muri yombi akurikiranweho kwinjira mu mutwe wa Muslim Brotherhood warwanyaga ubutegetsi.

Bamwe mu bantu biganye muri Kaminuza ya Cairo, ishami ry’ubuganga, mu myaka 1970, bamuvugaga nk’umuntu wakundaga kujya kureba filime, umuziki no gutebya n’incuti ze.

Nyuma yaje gufatanya n’abandi mu gutangiza umutwe urwanya ubutegetsi, Islamic Jihad, utangira kwinjirira igisirikare, ndetse hari n’igihe ivuriro rye ry’akoreshwaga nk’ububiko bw’intwaro.

Al-Zawahiri yatangiye kumenyekana mu 1981, ubwo yagezwaga mu rukiko akurikiranyweho kugira uruhare mu iyicwa ry’uwari Perezida wa Misiri mu 1981.

Yafuzwe imyaka itatu nyuma yo guhamwa n’icyaha cyo gutunga intwaro ku buryo butemewe n’amategeko, gusa ahanagurwaho ibyaha by’ubwicanyi.

Ubwo yari mu buroko, bitangazwa ko yakorewe iyicarubozo, ikaba ari imwe mu mpamvu zatumye arushaho kugira imyumvire y’ubuhezanguni n’ubugome bukabije.

Afunguwe, uyu mugabo wari umuganga wahuguriwe no kubaga, yaje kwerekeza muri Pakistan gukorana n’umuryango wa Croissant Rouge mu kuvura ingabo za Mujahideen zari zihanganye n’aba Soviet.

Aha niho yaje guhurira na Osama Bin Laden wari umaze kwiyunga ku baharaniraga ukwishyira ukizana muri Afghanistan.

Mu 1993, Zawahiri yabaye umuyobozi mukuru wa Islamic Jihad mu Misiri, yatangije ibikorwa byo gukuraho guverinoma ya Misiri mu myaka ya 1990, bigateza impfu z’abarenga 1200.

Mu 1999, Urukiko rwamukatiye igihano cy’urupfu adahari. Icyo gihe yari arimo gufasha Bin Laden gutangiza al-Qaeda, hafi y’umupaka wa Pakistan na Afghanistan.

Muri 2001 ubwo ingabo za Amerika zajyaga muri Afghanistan zigashegesha ibirindiro zikanica bamwe mu bayobozi ba al-Qaeda, al-Zawahri ni we watumye uyu mutwe utazima burundu, yongera kubaka ubuyobozi bwawo, yinjizamo bamwe mu bagize imitwe bafatanyaga.

Yanakomeje kuba ishusho y’uyu mutwe mu maso ya rubanda, cyane ko ari we wakundaga kugaragara mu mashusho yakwirakwizwaga n’uyu mutwe, ubwo Bin Laden yamaraga igihe kinini yihishe.

Bamwe mu bagize al-Qaeda bagendaga batangaza ko batishimira uburyo uyu mugabo yitwara, cyane ko yagiraga igitsure agakunda no kwikubira amabanga, no gucamo ibice abarwanyi.

al-Zawahri yanayoboye ishyirwaho ry’amashami ya al-Qaeda mu bindi bice nka Iraq, Arabia Saudite, Yemen, Afurika ya Ruguru, Somalia na Aziya.

Mu myaka 10 yakurikiye nyuma y’ibitero byo ku ya 11 Nzeri 2001, al-Qaeda yagiye igira uruhare ku buryo buziguye mu bitero by’iterabwoba byagabwe ahandi hantu hatandukanye nk’u Burayi, Pakistan, Turikiya, icyagabwe kuri gariyamoshi i Madrid muri 2004, n’ibitero byagabwe i Londres muri 2005.

Nyuma y’amezi habaye urupfu rwa Bin Laden, al-Zawahri yagizwe umuyobozi mukuru wa al-Qaeda, arahira ko azakomeza kugaba ibitero ku bihugu byo m‘Uburengerazuza.

Misile zidaturika zo mu bwoko bwa Hellfire R9X nizo zamuhitanye

Igitero cyo guhitana al-Zawahiri cyakozwe hifashishijwe indenge za drone, yarashe misile zo mu bwoko bwa Hellfire R9X ku nyubako y’ibanga iherereye mu gace ka Sherpur i Kabur mu murwa mukuru wa Afghanistan, al-Zawahiri yari yihishemo.

Aka gace gasanzwe gatuwemo n’abayobozi bakuru b’aba-Taliban.

Izi misile zamusanze aho yari ahagaze ku ibaraza ry’iyo nzu maze ziramuhitana, nk’uko amakuru aturuka mu butasi butandukanye abihamya.

Nk’uko bigaragara mu mafoto, nta guturika kwigeze kubaho, uretse idirishya rimwe ry’inzu ryangiritse, ndetse ubuyozi bwa Amerika bwatangaje ko nta wundi muntu wapfuye cyangwa ngo akomerekere muri iki gitero.

Inzu ya Zawahiri nubwo yarashwe, ntabwo yaturitse nk'uko bisanzwe

Hellfire R9X ni misile zidaturika, kuko zigizwe n’inzembe esheshatu z’ubugi butyaye. Iyo zirashwe zishobora gukatagura igipimo, ariko ntihabeho guturika.

Zatangiwe gukoreshwa na Amerika mu 2017 ubwo yagabaga igitero ku mudoka yari itwaye umwe mu bayobozi bakuru ba Al-Qaeda, Abu al-Khayr al-Masri muri Syria, bikarangira yishwe.

Ibi bisasu byo muri ubu bwoko ni byo Amerika yifashisha mu kwivugana ibyihebe mu buryo butagira ingaruka ku basivili, nk’uko ibitero bya mbere byagiye bisiga hari inzirakarengane zibigendeyemo.

Zawahiri yari umuntu wa hafi wa Osama bin Laden

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .