Ibintu bishobora guhindura isura muri Uganda: Museveni na Bobi Wine baciye amarenga

Yanditswe na Musangwa Arthur
Kuya 14 Mutarama 2021 saa 11:01
Yasuwe :
0 0

Amaso yose ahanzwe Uganda guhera kuri uyu wa Kane aho miliyoni 18 z’abatuye icyo gihugu zazindukiye mu matora yo kumenya uzabayobora mu myaka itanu iri imbere.

Ni amatora ibyayavuyemo bitegerezanyijwe amatsiko kubera ihatana rikomeye riri hagati y’abakandida babiri bahabwa amahirwe, Perezida Yoweri Museveni w’imyaka 76 na Bobi Wine w’imyaka 38 wari ufite imyaka itatu ubwo Museveni yafataga ubutegetsi mu 1986.

Havuzwe byinshi mbere y’amatora ariko ibikomeye ni ibyavuzwe n’abo bakandida ubwabo ku musaruro w’ibizava mu matora. Bombi amagambo bavuze ateye impungenge kuko arimo gushidikanya kwinshi ku kwemera ibizayavamo.

Perezida Yoweri Museveni ushaka manda ya gatanu, aherutse kubwira umunyamakuru wa CNN, Christiane Amanpour, ko natsindwa mu buryo bwiza aribwo azava ku butegetsi.

Yagize ati “Uganda ntabwo ari inzu yanjye. Nintsindwa amatora nzajya mu rugo rwanjye nkore ibyanjye, niba abanya-Uganda badashaka ko mbafasha gukemura ibibazo byabo, nzagenda nishimye rwose”

Icyakora Museveni yongeyeho ko azemera ko yatsinzwe mu gihe cyose amatora azaba yakozwe ‘mu mucyo’.

Ni imvugo yateye urujijo benshi, kuvuga ko azava ku butegetsi ari uko yatsinzwe amatora yakozwe mu mucyo, mu gihe abatavuga rumwe na we bavuga ko ahubwo ari we uri gukora ibishoboka byose ngo ataba mu mucyo.

Ku rundi ruhande, Robert Kyagulanyi uzwi nka Bobi Wine na we yatangaje ko amatora nabamo uburiganya atazemera ibizayavamo.

Yagize ati “Ishyaka nyoboye rizubaha ibyavuye mu matora naba yagenze neza, yakozwe mu mucyo, ibyayavuyemo bikabarwa neza.”

Icyakora, uyu mugabo wahoze ari umuhanzi yaciye amarenga ko batizeye ibizava mu matora nyuma y’abayoboke be bagiye bafungwa n’inzego z’umutekano batarafungurwa n’uburyo bagiye babuzwa kenshi kwiyamamaza.

Bobi Wine amaze igihe yinubira uburyo inzego z’umutekano zimubuza kwiyamamaza, zikamusohora kuri radiyo yaba iyigenga cyangwa iya Leta, zikamubuza kugera aho yabaga yateganyije kwiyamamariza n’ibindi.

Hashize iminsi Bobi Wine ahungishirije umuryango we muri Leta Zunze Ubumwe za Amerika, nyuma yo kuvuga ko hari umugambi wo kuwushimuta. Mu bikorwa bye byo kwiyamamaza, yagiye agaragara yambaye ikote ridapfumurwa n’amasasu, avuga ko hari benshi boherejwe na Leta ngo bamuhigire hasi kubura hejuru.

Amatora yo kuri uyu wa Kane yabaye Internet mu gihugu hose yafunzwe, ibintu abatavuga rumwe na Leta bemeza ko bigamije gukingira abakora amanyanga mu matora kugira ngo badatamazwa.

Ku nyubako zose ndende mu Mujyi wa Kampala hashyizwe abashinzwe umutekano, Leta ikavuga ko bagamije gukumira ibikorwa bibi by’abatavuga rumwe na Leta bagiye bayobora imyigaragambyo mu minsi ishize bahagaze hejuru y’inzu ndende.

Ikindi giteye impungenge, ni ikumirwa ry’indorerezi mpuzamahanga mu matora ya Uganda. Ambasade ya Amerika muri Uganda kuri uyu wa Gatatu yatangaje ko indorerezi zayo zitakigaragaye mu matora kuko zimwe uburenganzira na Komisiyo y’Amatora. Ni ko bimeze ku miryango imwe n’imwe mpuzamahanga yagiye isaba ubwo burenganzira.

Abantu basaga 40 nibo baguye mu myigaragambyo yadutse mu Ugushyingo umwaka ushize, ubwo abatavuga rumwe na Leta basakiranaga n’inzego z’umutekano ubwo Bobi Wine yatabwaga muri yombi.

Abakandida 11 nibo bahataniye intebe y’Umukuru w’Igihugu muri Uganda, gusa abahabwa amahirwe ni Museveni na Bobi Wine.

Imwe mu modoka za Bobi Wine yarashwe n'abashinzwe umutekano ubwo yari agiye kwiyamamaza
Imvururu zabanjirije amatora muri Uganda zaguyemo abasaga 40
Ibikorwa byo kwiyamamaza muri Uganda byaranzwe n'imvururu, abatavuga rumwe na Leta bataka kwibasirwa
Bobi Wine aherutse guhungisha umuryango we avuga ko ushobora kugirirwa nabi
Inzego z'umutekano zagiye zivugwa kenshi mu bikorwa byo kubangamira abakandida batavuga rumwe n'Ubutegetsi
Bobi Wine yerekana aho isasu ry'abashinzwe umutekano ryatoboye imodoka ye
Ibyapa byamamaza Perezida Museveni byari bimanitse henshi mu mujyi wa Kampala

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .