00:00:00 IGIHE NETWORK KN KINYARWANDA EN ENGLISH FR FRANCAIS

Ibihugu bikize byashyizweho igitutu ku bwo kwikubira inkingo za Covid 19

Yanditswe na Bukuru JC
Kuya 17 Gicurasi 2021 saa 08:39
Yasuwe :
0 0

Ubuyobozi bw’Ishami ry’Umuryango w’Abibumbye ryita ku Bana, UNICEF, bwahamagariye ibihugu byibumbiye mu muryango w’ibikize kurusha ibindi ku Isi, G7, gutanga inkingo zirenze ku zo bikeneye mu gushyigikira gahunda ya COVAX igamije kuziba icyuho cyatewe n’ihagarikwa ry’inkingo zari zitezwe ziturutse mu Buhinde.

U Buhinde bwari bwemeye ubufasha bw’inkingo za AstraZeneca zakozwe n’Ikigo cyabwo (Serum Institute) bwagombaga gutanga muri COVAX, ariko iyi gahunda iza kubangamirwa n’ubwiyongere bw’ubwandu bwa Covid 19 muri iki gihugu bwatumye ibicuruzwa byoherezwa mu mahanga bivuye muri iki gihugu bihagarikwa.

UNICEF nk’ishami rya Loni rishinzwe gukwirakwiza inkingo za Covid 19 binyuze muri gahunda ya COVAX, ivuga ko gutanga inkingo zo kuziba icyuho bizagera kuri dose miliyoni 140 kugeza mu mpera za Gicurasi na miliyoni 190 kugeza mu mpera za Kanama uyu mwaka.

Umuyobozi wayo Enrietta Fore, yagize ati “gusaranganya inkingo kugeza ubu ni ingenzi kandi birihutirwa mu rwego rwo kuziba icyuho gihari hagamijwe gufasha ibihugu bikennye kurusha ibindi kwirinda akaga ko mu gihe kiri imbere.”

Abayobozi b’ibihugu bikize, G7 biteganyijwe ko bazahurira mu nama izabera mu Bwongereza mu kwezi gutaha. Leta Zunze Ubumwe za Amerika na Canada nk’ibihugu binyamuryango biri mu byemeje ko abana bari mu kigero kuva ku myaka 12 bahabwa inkingo za Covid 19 mu byumweru bike bishize.

Mu Cyumweru gishize, Umuyobozi w’ishami ry’Umuryango w’Abibumbye ryita ku Buzima, OMS, yanenze imyitwarire idahwitse yo kwiharira inkingo, asaba ibihugu bikize gutanga inkingo kuruta kuzikoresha bikingira abana, mu gihe byagaragaye ko batagirwaho ubukana n’indwara zikomeye.

COVAX, ihanze amaso AstraZeneca mu mugambi wayo wo gutanga dose z’inkingo zigera kuri miliyari ebyiri uyu mwaka.

UNICEF ivuga ko izindi mbogamizi ku mikorere y’inganda hanze y’u Buhinde na zo zadindije itangwa ry’inkingo muri COVAX ariko biteganijwe ko icyo cyuho kizakemuka mu mpera za Kamena uyu mwaka.

Ikwirakwizwa ry'inkingo za Covid-19 ryakomwe mu nkokora n'ubwiyongere bw'ubwandu mu Buhinde

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .