Hahishuwe ko Trump agifite konti muri banki yo mu Bushinwa

Yanditswe na Uwimana Abraham
Kuya 21 Ukwakira 2020 saa 10:31
Yasuwe :
0 0

Perezida wa Leta Zunze Ubumwe za Amerika afite konti ya banki mu gihugu cy’u Bushinwa ndetse ayitangira imisoro mu gihe yakunze kunenga imikoranire y’ibihugu byombi mu by’ubucuruzi.

Iyi banki igenzurwa n’ikigo gishinzwe gukurikirana amahoteli mpuzamahanga ya sosiyete ya Trump, Trump International Hotels Management, ngo iyi konti ikaba yaranishyuye imisoro y’aho mu Bushinwa hagati y’umwaka wa 2013 na 2015.

Trump yakunze kwibasira ibigo by’Abanyamerika bikorera ku butaka bw’u Bushinwa, ibintu byagiye bikurura intambara y’ubucuruzi hagati y’ibihugu byombi.

Nko muri Kanama yavuze ko azorohereza imisoro ku bigo by’Abanyamerika byose bizavana ibikorwa byabyo mu Bushinwa, anatera ubwoba ko ashobora guhagarikira amasezerano ibyakomeza kuhakorera.

Iyi konti yo mu Bushinwa ya Trump isohotse nyuma y’uko mu minsi ishize hasohotse raporo igaragaza ko yagiye akwepa imisoro, yaba iyo yagombaga kwishyura we ubwe n’iy’ibindi bikorwa by’ishoramari bye.

Raporo yabyo yaherukaga gusohoka yagaragaje ko yishyuye amadolari 750 mu mwaka wa 2016 na 2017, mu gihe iyo konti yo mu Bushinwa yishyuye amadolari 188561 mu misoro yo mu Bushinwa.

Impapuro z’iyishyurwa ry’imisoro zabonwe, zerekana ko Trump yashoye agera ku madolari 192000, mu ma sosiyete mato yashinzwe by’umwihariko kugira ngo akorere ibikorwa mu Bushinwa mu myaka myinshi ishize.

Izo sosiyete zishyuye agera ku madolari 97400 mu bikorwa by’ubucuruzi zakoze kuva mu 2010, harimo imisoro iciriritse, hakaba haboneka ko yishyurwaga no kugeza mu 2018.
Umwavoka wa sosiyete ya Trump, Alan Garten, yavuze ko Trump International Hotel Management yafunguje konti muri banki yo mu Bushinwa binyuze mu biro byayo bikorera muri Leta Zunze Ubumwe za Amerika, mu rwego rwo kuyifashisha kwishyura imisoro.

Yagize ati “Nta mikoranire, ubucuruzi cyangwa ibindi bikorwa by’ishoramari byabayeho, ikindi kandi ni uko kuva mu 2015, iyo konti ntigikoreshwa, n’ubwo igifunguye ariko kuva ubwo ntiyigeze ikoreshwa mu mpamvu iyo ariyo yose.”

Trump afite ibikorwa by’ubucuruzi byinshi haba muri Leta Zunze Ubumwe za Amerika no hanze yazo, harimo ibibuga bya Golf biri muri Ecosse no muri Ireland, ndetse n’umurundo w’amahoteli y’inyenyeri eshanu hirya no hino.

Raporo zigaragaza ko uretse mu Bushinwa, Trump afite konti muri banki zo mu Bwongereza no muri Ireland.

Trump aracyafite konti muri banki yo mu Bushinwa ndetse akomeza kwishyura imisoro muri icyo gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .