Écosse mu nzira zo kwiyomora ku bwami bw’u Bwongereza nyuma ya Brexit

Yanditswe na Ntabareshya Jean de Dieu
Kuya 26 Ukuboza 2020 saa 10:02
Yasuwe :
0 0

Minisitiri w’Intebe wa Écosse, Nicola Sturgeon, yavuze ko amasezerano y’u Bwongereza yo kwikura mu muryango w’Ubumwe bw’u Burayi (EU), ari igihe kiza kuri Ecosse cyo guharanira ubwigenge.

Hashize iminsi mike u Bwongereza bwemeranyije na EU ku buryo bwiza icyo gihugu kizivana muri uwo muryango, nyuma y’uko mu 2016 abaturage batoye basaba kuwuvamo.

Nubwo u Bwongereza buvuyemo, hari byinshi byemeranyijweho kugira ngo ubukungu n’imibereho myiza y’Abongereza idahungabana birimo ubucuruzi, ibijyanye n’imirimo y’Abongereza basanzwe muri EU n’ibindi.

Icyakora Ecosse yagaragaje ko nubwo u Bwongereza hari ibyo bwemeranyije na EU, bitavanaho igihombo bizagira ku Bongereza bose.

Minisitiri Sturgeon abinyujije kuri Twitter, yibukije ko gahunda yo kwikura mu muryango w’Ubumwe bw’u Burayi ihabanye n’ibyo abatuye Ecosse bashakaga.

Yagize ati “Ni ngombwa kwibuka ko Brexit ihabanye n’ubushake bwa Ecosse. Nta bwumvikane na buke bwasubiranya ibyo Brexit izangiza. Ni igihe cyo kumvikana ku hazaza hacu nk’igihugu kigenga.”

Mu mwaka wa 2016 ubwo habaga amatora ya kamarampaka yo kuva muri EU, abo muri Ecosse bagera kuri 62 % batoye bifuza kuguma muri uwo muryango.

Umuyobozi w’ishyaka Scottish National Party mu Nteko Ishinga Amategeko y’u Bwongereza, Ian Blackford na we yavuze ko ibyakorwa byose bitazavanaho igihombo Ecosse izaterwa no kwivana muri EU.

Ati “U Bwongereza butuvanye mu masezerano meza y’akataraboneka. Dusezeye ku koroshya urujya n’uruza, batuvanye mu isoko rusange na gasutamo ihuriweho, tubuze amahirwe y’ubukungu, imibereho myiza n’umuco.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .