Byagenda bite Trump akomeje kuremba cyangwa agapfa ?

Yanditswe na Dufitumukiza Salathiel
Kuya 6 Ukwakira 2020 saa 02:38
Yasuwe :
0 0

Mu gihe Perezida wa Leta zunze Ubumwe za Amerika, Donald Trump, ari kwitabwaho n’abaganga nyuma y’uko we n’umugore we Melania Trump basanzwemo icyorezo cya Coronavirus, haribazwa ibibazo bitandukanye by’uko byazagenda aramutse arembye cyane cyangwa agapfa mbere y’amatora y’Umukuru w’Igihugu.

Ibi biribazwa ku mpamvu z’uko umushinga w’Itegeko Nshinga wiswe ‘25thAmandement’ ugena icyakorwa mu gihe Perezida uriho yaba atakibasha kuzuza inshingano ze wagiye witabazwa mu bihe byashize, aho yasimburwaga na visi perezida, ariko ukaba udateganya uko byagenda mu gihe bombi baba badashoboye kuzuza izo nshingano. Ubundi se byagenda bite umukandida perezida arwaye cyangwa agapfa mbere y’amatora?

Mu gitondo cyo kuwa Gatanu tariki ya 2 Ukwakira 2020, ni bwo Perezida Donald Trump abinyujije ku rukuta rwe rwa Twitter yatangaje ko we n’umugore we basanganwe COVID-19.

Hashize amasaha make, umuganga we yemeje aya makuru anongeraho ko “bameze neza, ndetse ko Trump akomeza inshingano ze mu gihe ari kwitabwaho ngo akire”.

Kuba Trump ageze mu myaka 74 y’amavuko akaba anafite ibiro byinshi, bimwongerera ibyago byo kuba yazahazwa n’iki cyorezo nk’uko abashakashatsi batandukanye bakomeje kubigarukaho, ko ”abantu bari hejuru y’imyaka 60 y’amavuko coronavirus ibigirizaho nkana”.

Nubwo akomeje kutagaragaza ibimenyetso, Perezida Trump agomba kwiheza muri biro bya Perezida, White House, ndetse no kuba ahagaritse ibikorwa byo kwiyamamariza umwanya w’Umukuru w’Igihugu.

Byagenda bite Perezida Trump arembye?

Muri 25th Amandement hateganywa ibyakorwa mu gihe perezida uriho yaba apfuye bitunguranye, yeguye cyangwa adashoboye kuzuza inshingano ze kandi manda ye itararangira.

Iri tegeko ryatowe rinemezwa n’Inteko Ishinga Amategeko muri Leta Zunze Ubumwe za Amerika mu 1963, ubwo uwahoze ari perezida w’icyo gihugu John F Kennedy yicwaga amaze imyaka ibiri gusa abaye perezida.

Amategeko agena ko Perezida Trump abaye atakibasha kuzuza inshingano ze nk’umukuru w’igihugu zakwegurirwa Visi Perezida, Mike Pence; byazagaragara ko yakize agasaba gusubizwa mu mwanya we.

Mu kwegurira Visi Perezida ububasha n’inshingano, Trump yasabwa kwandikira abayobozi b’Inteko Ishinga Amategeko imitwe yombi, aribo Chuck Grassley wa Sena na Nancy Pelosi w’Abadepite; abamenyesha ko atagishoboye kuzuza inshingano ze mu Biro bya Perezida.

Ingingo ya kane y’iri tegeko ivuga ko Visi Perezida n’abenshi mu bagize Inteko Ishinga Amategeko iyo babonye perezida “adashoboye inshingano no gukoresha ububasha by’umukuru w’igihugu”; na bo bandikira abayobozi b’Inteko Ishinga Amategeko, imitwe yombi.

Bigenze bityo, Mike Pence yahita ahabwa ububasha bw’Umukuru w’Igihugu kugeza ubwo Trump yazandika avuga ko ashoboye kuzuza inshingano. Abaye yanditse, Visi Perezida n’Inteko Inshinga Amategeko cyangwa izindi nzego bireba baba bafite iminsi ine yo kumuha igisubizo.

Ese 25thAmandement yarakurikijwe ku baperezida ba Amerika mu bihe byashize?

Iri tegeko ryagendeweho n’abaperezida babiri inshuro eshatu gusa mu mateka ya Leta Zunze Ubumwe za Amerika, ndetse inshuro zose impamvu yari imwe, “ugucungira hafi ubutegetsi”.

Mu 1985, uwari Visi Perezida George Bush yeguriwe inshingano z’Umukuru w’Igihugu ubwo ubuzima bw’uwari Perezida Ronald Reagan bwari mu kaga.

Mu myaka yakurikiyeho, uwari Perezida w’iki gihugu, George W Bush yagendeye kuri iryo tegeko ubugira kabiri, mu 2002 na 2007, aha uwari Visi Perezida, Dick Cheney inshingano za perezida akongera akazimwambura.

Hakorwa iki Perezida na Visi Perezida badashoboye kuzuza inshingano z’umukuru w’igihugu?

Ntibikunze kubaho aho Perezida na Visi Perezida barwarira cyangwa bagapfira rimwe, gusa hari icyo itegeko nshinga riteganya mu gihe byabaho.

Ugendeye ku cyuho cyabaye mu biro bya perezida mu 1947 ubwo uwari Perezida Harry Truman wari warahawe izo nshingano nyuma y’urupfu rwa Franklin Roosevelt yari yungirije yavuze ko atakizishoboye, Donald Trump na Mike Pence bananiwe inshingano zo muri White House, zashyirwa mu maboko y’uhagararariye Abadepite, Nancy Pelosi.

Ku rundi ruhande ariko, impuguke zivuga ko ibi bibaye byazana umwuka mubi hagati y’aba- démocrate n’aba- Républicains, kuko Pelosi aba mu ishyaka ry’aba- démocrate kandi Trump na Pence ari aba- Républicains.

Mu ntangiriro z’uyu mwaka, White House yavuze ko ibyabaye mu 1947 “bidashobora kongera kubaho kuko ubuzima bwa Perezida na Visi perezida bwitabwaho uko bikwiye.”

Byagenda bite umukandida Perezida arwaye cyangwa agapfa mbere y’amatora ?

Perezida Trump akimara gusanganwa COVID-19 yahise ahagarika ibikorwa byo kwiyamamaza byari biteganyijwe mu byumweru bikurikiyeho.

Arasabwa kutajya ahateraniye abandi no kwiheza kugera bigaragaye ko ubuzima bwe bumeze neza, ibintu biteye inkeke mu gihe habura ukwezi ngo amatora yo ku wa 3 Ugushyingo abe.

Trump cyangwa undi mukandida Perezida apfuye mbere y’amatora, ishyaka rye ni ryo ryakwihitiramo undi mukandida ryizeye uzarihagararira.

Mu gihe umukandida uhabwa amahirwe menshi ko ashobora kuba yasimbura Trump agahagararira aba- Républicains mu matora ari Visi Perezida Mike Pence, ibyo nta kigoranye cyaba kibirimo, ndetse bafite n’andi mahitamo yo gutoranya undi uri mu ishyaka.
Mu bihe bitandukanye Leta Zunze Ubumwe za Amerika zagiye zipfusha abaperezida bakiri mu nshingano barimo, William Henry, Zachary Taylor, Warren G. Harding na Franklin D Roosevelt bazize uburwayi busanzwe na Abraham Lincoln, James A. Garfield, William McKinley ndetse na John F. Kennedy bishwe.

Trump arwaye Coronavirus ishobora kumuzahaza kuko ageze mu zabukuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .