Abavugabutumwa bo muri Afurika bari gusengera Trump ngo azatsinde amatora

Yanditswe na Ishimwe Deborah
Kuya 14 Ukwakira 2020 saa 03:11
Yasuwe :
0 0

Nubwo Perezida wa Leta Zunze Ubumwe za Amerika, Donald Trump, akunze kugaragara avuga amagambo atari meza kuri Afurika n’abayituye, hari bamwe bamukunda ndetse batifuza ko yatsindwa amatora azaba mu Ugushyingo, biganjemo abavugabutumwa bo muri Nigeria.

Ubushakashatsi bwiswe “Pew research poll” bwakozwe ku nsengero, bugashyirwa ahagaragara muri Mutarama uyu mwaka, bwagaragaje ko Donald Trump akunzwe cyane ku mugabane wa Afurika cyane muri Nigeria na Kenya, aho bamufata nk’umuntu Imana yishyiriye ku buyobozi.

Umuvugabutumwa uzwi uri mu bihangange mu iyobokamana muri Nigeria, Pasiteri Chris Oyakhilome, yashishikarije abakirisitu gusengera Trump, akazatsinda amatora, avuga ko impamvu aba-démocrate batamushyigikira ari uko ashyigikira abakirisitu.

Ati “Iyo Imana yishyiriye umuntu wayo mu mwanya w’ubuyobozi, satani akora igishoboka cyose ngo amurimbure.”

Yakomeje agira ati “ Barakarira Trump kubera ko ashyigikira abakirisitu namwe murabizi, ku bw’ibyo rero urwango bafite barufitiye mwebwe abakirisitu.”

Amadini menshi yo muri Afurika arwanya amategeko yo gukuramo inda ndetse n’uburenganzira buhabwa abatinganyi, akaba kandi ashyigikira igihugu cya Israël kuko na cyo kitabyemera, aho atemera umu-démocrate, Barack Obama, ubishyigikira, unafite inkomoko muri Kenya.

Umuvugabutumwa wo muri Kenya, Richard Chogo, na we yanenze ubuyobozi bwa Obama ashimagiza ubwa Trump, avuga ko kandi atemera itegeko ryemerera abagore gukuramo inda ku bushake.

Yagize ati “ Ubuyobozi bwa Obama bwazanye gahunda irwanya abakirisitu muri Afurika kugeza ubwo Trump yagereye ku ntebe, ni yo mpamvu agomba kuguma kuri iriya ntebe.”

Yongeraho ati “Nemeranya n’itegeko rya Kenya kuko ritemerera abagore gukuramo inda kuko bishyira ubuzima bwabo mu kaga kandi ni icyaha.”

Abavugabutumwa batandukanye bo muri Afurika bakomeje kugaragaza ko bashyigikiye intsinzi ya Donald Trump ndetse abenshi muri bo batangarije BBC ko Trump yagiye ku buyobozi mu mugambi w’Imana kandi akaba yaratoranyijwe na yo.

Bamwe muri bo bavuga ko Imana yatangaje intsinzi ye mbere ya 2016 kuko yavuze ko ikeneye umunyapolitiki urwanirira ibyayo.

Iryo tsinda ry’abavugabutumwa ririmo Emeka Ezeji wo mu itorero ry’Abangilikani; umuhanga mu by’iyobokamana wo muri Nigeria; Binti Benitie, Pasiteri Richard Chogo wo muri Kenya, Chris Oyakhilome n’abandi batandukanye.

Perezida wa Leta Zunze Ubumwe za Amerika, Donald Trump, ari gusengerwa n'abavugabutumwa b'Abanyafurika kugira ngo azatsinde amatora azaba mu Ugushyingo uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .