Alaska: Joe Biden yatsinze amatora yo guhagararira aba- Démocrates mu matora ya Perezida

Yanditswe na Twarabanye Venuste
Kuya 12 Mata 2020 saa 11:00
Yasuwe :
0 0

Ishyaka ry’aba- Démocrates muri Leta ya Alaska, muri Leta Zunze Ubumwe za Amerika ryatangaje ko Joe Biden yatsindiye kurihagararira mu matora y’umukuru w’igihugu ateganyijwe mu Ugushyingo 2020.

Joe Biden wabaye Visi Perezida wa Leta Zunze Ubumwe za Amerika, yaje imbere muri Alaska atsinze Bernie Sanders bahanganye ku majwi 55.3 kuri 44.7%.

Ni mu matora yari ateganyijwe ku itariki 4 ariko aza kwimurirwa ku itariki 10 Mata ndetse hahindurwa uburyo yagombaga gukorwamo abantu batora bakoresheje email mu rwego rwo kwirinda Coronavirus.

Iryo shyaka ryohereje impapuro zo gutoreraho zirenga 71000 ariko buri mu Démocrate akemererwa kumanura (download) rumwe. Mu gutora hakoreshejwe gusubiza ibibazo byo guhitamo buri wese yagombaga kugira amahitamo atanu. Abarenga 19000 basubirije igihe cyari giteganyijwe ku wa Gatanu.

Umuyobozi w’Ishyaka ry’aba-Démocrate muri leta ya Alaska, Casey Steinau, yavuze ko ibyo babikoze kugira ngo bahindure uburyo batoraga kugira ngo abarwanashyaka benshi babashe kugira uruhare mu matora cyane cyane abo mu cyaro batabashaga kugera ku biro by’itora.

Yavuze ko abatoye bikubye kabiri agereranyije no mu 2016, ‘byerekena ko gutora hakoreshejwe email bikora’. Yavuze ko bishimiye uko ubwo buryo bwagenze avuga ko byaba urugero mu gihugu hose.

Bernie Sanders yivanye mu matora ku wa Gatatu ushize , bikaba biharurira Biden inzira zo kuba umukandida uzahatana na Perezida Donald Trump.

Joe Biden yatsinze amatora muri Alaska, bikaba bimuha amahirwe yo guhagararira ishyaka rye mu matora ya Perezida

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .