00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda 64,5% bamaze gutanga mituweli 100% mu kwezi kumwe, Nyaruguru ku isonga

Yanditswe na Prudence Kwizera
Kuya 30 Nyakanga 2021 saa 11:11
Yasuwe :
0 0

Imibare y’Ikigo cy’Ubwiteganyirize mu Rwanda, Rwanda Social Security Board (RSSB), igaragaza ko Abanyarwanda bari ku kigereranyo cya 64,54%, bamaze kwishyura umusanzu w’ubwisungane mu kwivuza mu kwezi kumwe mu mwaka wabwo wa 2021/22 utangiye kuko watangiye tariki ya 1 Nyakanga 2021.

Imibare y’Ikigo cy’Igihugu cy’Ibarurishamibare, NISR, yo mu 2021 yerekana abaturarwanda bose bangana na 12.955.766 muri bo 12.295.609 ni bo bakagombye kwivuza bakoresheje mituweli kuko abagera ku 660.157 bakoresha ubundi bwishingizi.

Kugeza ubu abaturarwanda 6.283.265 bari ku kigereranyo cya 64,54% ni bo bamaze kwishyura mituweli y’umwaka wa 2021/22 ku kigero cya 100%.

Uteranyije abamaze kwishyura 100% n’abishyushye 75% [nabo bemerewe kwivuza kugeza mu Ukuboza 2021] usanga bose hamwe ari 8.288.337 bari ku ijanisha rya 67,4% nk’uko imibare ya RSSB yo ku wa 28 Nyakanga 2021 ibigaragaza.

Urebye uturere dufite abaturage bishyuye 100% n’abishyuye 75% Nyaruguru ni yo iri ku isonga ku kigero cya 84,9% igakurikirwa na Gisagara igeze kuri 84,6% naho Gakenke ikaza ku mwanya wa gatatu na 83,5%.

Ubuyobozi bw’Akarere ka Nyaruguru butangaza ko “Abaturage b’utugari 16 bamaze kwishyura mituweri 100%, abatuye mu tugari 46 bakaba bamaze kwishyura ku kigero cya 90% naho abo mu tugari 10 bamaze kwitabira ku kigero gisaga 80% kandi ubukangurambaga bukomeje.”

Akagari ka Muhambara ko mu Murenge wa Cyahinda mu Karere ka Nyaruguru ni ko karangije kwishyura mituweli mbere y’utundi tariki 30 Mata 2021.

Umunyamabanga Nshingwabikorwa w’Akagari ka Muhambara, Muhimpundu Immaculée, avuga ko muri Mata 2021 abaturage bose basoje umuhigo wo kwishyura amafaranga ya mituweli ya 2021/22.

Avuga ko kuri ubu nta muturage wo muri ako kagari ukirembera mu rugo kuko ufashwe n’indwara ahita ajya kwa muganga kuri Poste de Santé iri hafi aho akavurwa hakiri kare.

Umurenge wa Kansi wo mu Karere ka Gisagara ni wo wabaye uwa mbere mu gihugu hose mu kurangiza kwishyura mituweli mbere y’iyindi yose.

Imirenge yo mu Karere ka Gisagara yamaze kwishyura 100% ni Kansi na Mugombwa, naho muri Nyaruguru ni Cyahinda.

Umunyamabanga Nshingwabikorwa w’Umurenge wa Kansi, Kimonyo Innocent, yabwiye IGIHE ko barangije kwishyura bose 100% tariki ya 7 Nyakanga 2021.

Yavuze ko uburyo bakoresha kugira ngo barangize kwishyura hakiri kare ari ubukangurambaga no kwibutsa abaturage ko bishyura buhoro buhoro binyuze mu bimina bijyanye n’ubushobozi bwa buri wese.

Ati “Mbere na mbere ni ugukorera hamwe mu bimina n’amatsinda ndetse n’amasibo abaturage bagatangira gutanga amafaranga make uko bifite hakiri kare. Ikindi ni ukumenya umuntu ufite ubushobozi buke udashobora kwishyurira mituweli icyarimwe, agatangira kwizigama hakiri kare.”

Yavuze ko ikindi gituma barangiza kwishyura mbere ari uko abaturage bo mu Murenge wa Kansi bigishijwe basobanukirwa neza ibyiza bya mituweli.

Ubwo hatangizwaga umwaka wa mituweli wa 2021/22 Umuyobozi Mukuru wa RSSB, Rugemanshuro Regis, yavuze ko bakoze amavugurura bagamije guha serivise nziza abanyamuryango.

Icya mbere ni uko umunyamuryango wa mituweli ashobora kwivuza kugeza mu kwezi k’Ukuboza igihe yamaze kwishyura 75% by’umusanzu agomba gutanga, ariko ukwezi kwa Ukuboza kukarangira yaramaze gutanga 25% asigaye kugira ngo akomeza kwivuza nta nkomyi.

Yagize ati “Ibyo ni byiza kuko hari igihe ubushobozi butabonekera rimwe.”

Icya kabiri cyahindutse ni uko umunyamuryango wishyuye mituweli 100% cyangwa uwishyuye 75% mbere y’ukwezi kwa Ukuboza ahita atangira kwivuza adategereje ko iminsi 30 ishira.

Yavuze ko iri vugurura ryatangiye gushyirwa mu bikorwa mu mwaka ushize kandi ryatumye abitabira gutanga umusanzu w’ubwisungane mu kwivuza biyongera.

Ati “Icyagaragaye ndetse ni uko unwaka ushize ubwitabire bwa mituweli abishyuye 100% bagera kuri 86% wabariramo abishyuye 75% by’umusanzu bagombaga gutanga bikagera kuri 88%, birusha umwaka wabanje tutarakora amavugurura aho byari 79%.”

Mu buhamya butangwa na bamwe mu baturage batuye mu mirenge yarangije kwishyura mituweli ya 2021/22 ku kigero cya 100, babwiye IGIHE ko basigaye bibwiriza kwishyura kuko bazi ibyiza byayo.

Bamurange Julienne wo mu Murenge wa Mugombwa mu Karere ka Gisagara ati “Ubu namenye ibyiza bya mituweli kuko nsigaye nyitanga mu ba mbere, nta mwana wanjye ushobora kurembera mu rugo”

Bizimana Joseph, wo mu Murenge wa Kansi yabwiye IGIHE ko yishyurira abantu batandatu bagize umuryango we kandi yamaze kumenya ibyiza by’ubwisungane mu kwivuza ari yo mpamvu yihutira kwishyura hakiri kare.

Ati “Mituweli ni nziza kuko iyo umuntu arwaye yivuza neza bitamuhenze. Twebwe mu kimina cyacu dukoreramo turi abantu 30 ku buryo n’utayafite tumugiriza ariko twese tukabanza kwishyura mituweli tugashinganisha ubuzima bwacu.”

Uturere 10 turi imbere mu gutanga mituweli y’umwaka wa 2021/22 uhereye ku kari ku isonga ni Nyaruguru, Gisagara, Gakenke, Kirehe, Ruhango, Gicumbi, Muhanga, Nyamagabe, Kamonyi na Nyanza.

Uturere 10 turi inyuma uhereye ku ka nyuma uza imbere ni Nyarugenge, Kicukiro, Gasabo, Rubavu, Musanze, Rusizi, Rutsiro, Karongi, Rwamagana na Rulindo.

Abanyarwanda 64,5% bamaze gutanga mituweli 100% mu kwezi kumwe, Nyaruguru ku isonga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .