Urubyiruko rwahawe umukoro kubera inkuru n’amafoto bivuga ku Rwanda bikiri iyanga kuri Wikipedia

Yanditswe na Nkurunziza Ferdinand
Kuya 16 Gashyantare 2020 saa 09:24
Yasuwe :
0 0

Abanyarwanda cyane cyane urubyiruko, bashishikarijwe kugira uruhare mu kwandika inkuru ku Rwanda zishyirwa ku rubuga nkoranyamakuru rwa Wikipedia, ariko nako bashyira ingufu mu gufata amafoto meza ajya kuri urwo rubuga.

Ku rubuga rwa Wikipedia, inyandiko zanditse mu Kinyarwanda zigera ku 1800, mu gihe izanditse mu cyongereza ari nacyo kiyoboye izindi, zo zigera kuri miliyoni zisaga esheshatu, bingana na 12% by’inyandiko zose ziri kuri uru rubuga nkoranyamakuru.

Kuba inkuru zanditse ku Rwanda ari nkeya byongeye n’izihari zikaba zanditse mu ndimi z’amahanga bituma amakuru abanyarwanda bamenya ku gihugu cyabo aba make cyangwa akaba yagorekwa kubera ko abayanditse badasobanukiwe u Rwanda.

Urubuga nkoranyamakuru rwa ‘Wikipedia’ rubinyujije mu kigega cyarwo ‘Wikimedia Foundation’ rwatangije gahunda y’amarushanwa ngarukamwaka yashyizweho, binyuze muri gahunda yiswe ‘Wiki Loves Africa’ igenewe kugaragaza ishusho nyayo y’umugabane wa Afurika mu ndimi gakondo no gukangurira abantu batandukanye kwandika inkuru no gufata amashusho ajyanye na Afurika.

Irushanwa ry’uyu mwaka rizibanda ku bikorwa bijyanye no gutwara abantu n’ibintu, aho abaryitabiriye bazajya bafata amafoto bakayashyira ku rubuga rwa ‘Wiki Commons’, abazaza mu myanya itatu ya mbere mu gufata amafoto meza bagahembwa.

Umuhuzabikorwa wa ‘Wiki Loves Africa’ mu Rwanda, Boris Bahire, yavuze ko aya marushanwa azafasha kuzamura umubare w’inkuru n’amafoto by’umwimerere bigaragaza Afurika, by’umwihariko ku Rwanda, aho kuri ubu imibare y’inkuru zanditse mu Kinyarwanda kuri uru rubuga nkoranyamakuru ukiri hasi cyane ugereranyije n’izindi ndimi.

Ati “Aya marushanwa ni ukugira ngo abantu bagire umuhate n’ubumenyi bwo kwandika kandi byongere n’umuco wo gukunda igihugu binyuze mu kuziba icyuho mu mibare hagati y’inyandiko zanditse mu ndimi zabo kavukire n’indimi mpuzamahanga.”

Bahire yongeyeho ko abanyarwanda nibashishikarira kwandika inkuru zireba u Rwanda bakanagaragaza amafoto ajyanye na zo, bizagabanya icyuho kiri mu nyandiko zandikwa n’abanyamahanga mu ndimi zabo ku Rwanda, rimwe na rimwe bakandika n’amakuru ashobora kuba atakijyanye n’aho u Rwanda rugeze.

N’ubwo kwandika inkuru no gufata amashuho bishyirwa kuri Wikipedia ari igikorwa cy’ubushake butagamije inyungu, abayobora gahunda ya Wiki Loves Africa bavuga ko bishobora kubyara inyungu ku muntu ubikora abikunze mu mwanya muto yajya abigenera, kuko byongera ubumenyi kuri nyir’ubwite kandi bikaba byamufungurira amarembo nk’umwanditsi ufite ubunararibonye.

Irushanwa ryo gufata amafoto meza ryatangiye kuri uyu wa 16 Gashyantare 2020 rizasozwa ku wa 31 Werurwe 2020, aho uzaba uwa mbere mu Rwanda mu kugira ifoto ihiga izindi azahabwa amadorari ya Amerika 200 ndetse binamuheshe amahirwe yo guhatana ku rwego rwa Afurika, aho ashobora kwegukana igihembo cy’amadorari ya Amerika 1000.

Bamwe mu bitabiriye gahunda yo gutangiza amarushanwa
Umuhuzabikorwa wa ‘Wiki Loves Africa’ mu Rwanda, Boris Bahire, yavuze ko aya marushanwa azafasha kuzamura umubare w’inkuru n’amafoto by’umwimerere bigaragaza Afurika, by’umwihariko ku Rwanda
Abanyarwanda cyane cyane urubyiruko, bashishiakrijwe kugira uruhare mu kwandika inkuru ku Rwanda zishyirwa kuri Wikipedia
Abitabiye gahunda yo gutangiza amarushanwa bari kumwe n'abayobozi ba Wiki Loves Africa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza