00:00:00 IGIHE NETWORK KN KINYARWANDA EN ENGLISH FR FRANCAIS

Umwihariko wa ’Ellen DeGeneres Campus’ izateza imbere ubushakashatsi ku ngagi (Amafoto)

Yanditswe na Ndahayo Emmanuel
Kuya 7 June 2022 saa 05:44
Yasuwe :

Ushobora kuyita Bitoveni cyangwa irindi zina, ukumva ko ari inyamaswa zo hejuru iyo mu misozi mudafitanye isano, ariko ingagi niyo nyamaswa y’inyamabere ifitanye isano ya hafi n’umuntu, aho duhuje uturemangingo (DNA) ku kigero cya 98%.

Nk’uko upfusha ukababara, wagira ibyishimo ugaseka, wabona umufasha mukabana ubuziraherezo, ndetse ugakora imibonano mpuzabitsina ugamije kwishimisha, ingagi zo mu misozi miremire ya Pariki y’Ibirunga, nazo zifite iyo myifatire.

Ni inyamaswa zitangaje ariko zitorohewe n’abantu bazishe hafi yo kuzimara ku Isi, kugeza ubwo zisigara mu bihugu bitatu gusa, ari byo u Rwanda, Uganda na Repubulika Iharanira Demokarasi ya Congo.

Aha naho ntabwo hahoze ari ubuturo bw’amahoro, mu myaka 30 ishize, kuko ingagi zo mu misozi zari zisigaye ku Isi zari 240 gusa, ibyazishyiraga mu cyiciro cy’inyamaswa zifite ibyago byinshi byo kuzimira.

Iki ni cyo cyatumye Umunyamerika Dian Fossey agira ishyaka ryo gutangira gukurikirana izi nyamaswa, imirimo yatangiriye mu Rwanda bimugoye mu 1967. Kubera uruhare yagize, kuri ubu ingagi zo mu misozi zirenga 1000, ibituma icyizere cy’uko zitazarimbuka ku Isi cyiyongera.

Umusaruro w’urugendo rwo gusigasira ingagi

Dian Fossey yashinze Umuryango yise Dian Fossey Gorilla Fund wari ugamije kwita ku buzima bw’inyamaswa. Uyu Muryango uri kwizihiza imyaka 55 umaze ubayeho, wagize uruhare mu bikorwa by’ubushakashatsi bwashoboje Leta n’abandi bafatanyabikorwa kurushaho kurengera ingagi.

Ibikorwa byo gukorana n’abaturage nabyo byagize uruhare mu kugabanya imitego yategwaga ingagi, yavuye hejuru ya 1000 ikajya munsi ya 200 ku mwaka, uretse ko hari ubwo n’ingagi zagiye zimenya kuyitegurira.

Icyakora nubwo uyu Muryango wagize uruhare rukomeye mu guteza imbere ubuzima bw’ingagi, wari umaze igihe ufite ikibazo cyo gukorera kure y’Ibirunga bituyemo ingagi ushinzwe, ibyatumaga ibikorwa byawo bidindira.

Mu 2017, ubwo wizihizaga isabukuru y’imyaka 50 wari umaze ushinzwe, Inama y’Ubutegetsi yawo yafashe icyemezo cyo gushyiraho Ikigo cy’ubushakashatsi cyagombaga kugira uruhare mu kurengera ingagi muri rusange, umushinga wari warahawe imyaka 20, bivuze ko wari kuzarangira mu 2037.

Nyuma gato nibwo ubuyobozi bw’uyu Muryango bwakiriye ubusabe bw’uruhande rwa Ellen DeGeneres, rwifuzaga kugira ubufatanye nawo mu kubaka cya kigo cy’ubushakashatsi.

Igitekerezo cyo gufatanya na Dian Fossey Gorilla Fund cyagizwe na Portia de Rossi, umufasha wa Ellen DeGeneres, wifuzaga kumuha impano y’ikintu akunda, dore ko Ellen yakuze akunda inyamaswa, by’umwihariko akaba yarafataga Dian Fossey nk’icyitegererezo.

Kuri uyu wa Kabiri, aba bombi bari mu Majyaruguru mu Karere ka Musanze, aho bari baje gutaha iki Kigo cya Ellen DeGeneres Campus cy’Umuryango Dian Fossey Gorilla Fund wita ku ngagi zo mu Birunga.

Ni Ikigo cyubatswe n’abakozi barenga 2400, kigatwara miliyoni 15$.

Ni ikigo kigezweho kigizwe n’inyubako eshatu z’ingenzi zirimo ’The Sandy and Harold Price Research Center’ izajya ikorerwamo ubushakashatsi ku ngagi bwibanda ku turemangingo twazo, imiterere yazo, imibanire yazo n’ibindi.

Hari kandi inyubako ya ’Cindy Broder Conservation Gallery’ izajya yakira abashyitsi bifuza kumenya byinshi ku ngagi, ikaba igizwe n’amafoto ndetse n’ibindi bisobanura imibereho y’ingagi.

Indi nyubako ni ’Bob and Melani Walton Education Center’ izagira uruhare mu gukorana na kaminuza zo mu Rwanda no hanze yarwo. Izajya yifashishwa kandi mu kwakira inama ndetse inakorerwemo amahugurwa.

Izaba irimo amashuri, isomero ry’ibijyanye na siyansi ndetse na ’Computer Lab’ yubatswe bigizwemo uruhare n’impirimbanyi mu kurengera ibidukikije, akaba n’umukinnyi wa filime, Leonardo DiCaprio (ushobora kuba umuzi nka Jack wo muri Titanic).

Mu kiganiro n’abanyamakuru, Ellen DeGeneres yasobanuye uburyo urugendo rwo gukunda ingagi rwatangiye ubwo yari afite imyaka 12, akabona ifoto mu kinyamakuru National Geographic Magazine y’umukobwa wari uteruye umwana w’ingagi, uwo akaba yari Dian Fossey wari yaratangiye kwita ku ngagi zo mu Rwanda kuva mu 1967.

Kuva ubwo yiyumvisemo urukundo rw’ingagi, ati "Numvise naterura umwana w’ingagi."

Yongeyeho ati "Uko nakomeje gukura, ni ibintu nahoze nifuza gukora. Ubwo nazaga mu Rwanda, nifuzaga kureba akazi kakozwe na Fossey mu kurengera ingagi."

Mu kiniga cyinshi, Ellen yabwiye abitabiriye uyu muhango ko ari iby’agaciro kuba izina rye riri iruhande rw’izina ry’umuntu afata nk’icyitegererezo.

Ellen DeGeneres yavuze ko ari gushaka inzu mu Rwanda kuko yifuza kujya ahamara igihe kinini nyuma y’uko Ikiganiro Ellen DeGeneres Show yari asanzwe akora muri Amerika kirangiye.

Minisitiri Ngirente, Dr. Edouard Ngirente, waje ahagarariye Perezida Kagame, yatanze ubutumwa bw’Umukuru w’Igihugu washimiye abagize uruhare mu kubaka Ikigo Ellen DeGeneres Campus.

Yashimangiye ko kizatanga umusanzu ukomeye muri gahunda y’u Rwanda yo kurengera ibidukikije, asaba abaturage kumva ko ari icyabo, bakakirinda kugira ngo inyungu kizazana zizagere kuri benshi.

Ati “Kuva iki Kigo cyatangira, twabonye impinduka nyinshi ku miryango igituriye muri aka gace. Mu izina rya Leta y’u Rwanda n’Abanyarwanda, turabashimira Ellen na Portio ku buryo mukunda u Rwanda n’umuhate wanyu wo kurengera ingagi zo mu misozi ndetse no gukomeza gushyigikira akazi gakomeye ka Dian Fossey.”

Umuyobozi Mukuru w’Urwego rw’Iterambere, RDB, Clare Akamanzi, yavuze ko Ellen DeGeneres Campus “Iki ari igikorwa kizatuma abashakashatsi benshi baza hano, kandi n’abakerarugendo bazajya baza kureba iki Kigo, ni ibintu bizatugirira akamaro cyane mu rwego rw’ubukerarugendo.”

Umuyobozi Mukuru wa Dian Fossey Gorilla Fund, Dr. Tara Stoinsk, yavuze akamaro k’iki Kigo gishya bazajya bakoreramo.

Yavuze ko bahoze bakorera mu kigo gito, kiri kure y’ingagi kandi kidafite ibyangombwa bihagije, ibyo bikaba bitaratumaga Abanyarwanda bakisanzuraho.

Kuri ubu ariko ibintu byarahindutse, kuko kuva muri Gashyantare ubwo iki Kigo cyafunguraga imiryango, Abanyarwanda bakigana barenga 5000, barimo n’abana 2000 biga mu mashuri abanza n’ayisumbuye.

Yashimangiye ko urugendo rw’ubushakashatsi rukomeje, avuga ko laboratwari esheshatu ziri muri iki Kigo, zizababashisha kwiga byinshi ku mibereho y’ingagi.

Byitezwe ko iki kigo kizajya kiberamo ubushakashatsi bw’izindi nyamaswa ziri mu Muryango umwe n’ingagi, ku buryo kizakurura abandi bashakashatsi baturutse hirya no hino ku Isi.

Inyubako zose za Ellen DeGeneres Campus zifite umwihariko wo kurengera ibidukikije, aho zubatswe n’ibikoresho byaturutse mu Rwanda kandi bitangiza ibidukikije. Izi nyubako kandi zifite uburyo bwo gufata amazi y’imvura azajya akoreshwa mu bwiherero n’ibindi nko kuhira ubusitani.

Hari kandi igishanga cy’igikorano, cyagenewe kuzajya kiyungurura amazi yakoreshejwe muri iki kigo, kugira ngo asubire mu migezi n’ibiyaga afite isuku, ibi byose bikaba bigamije kurengera ibidukikije.

Abakozi 2400 bahawe akazi mu gihe cyo kubaka iki Kigo
Mu busitani bw'iki Kigo harimo inzira zubatswe mu makoro
Ellen DeGeneres Campus yubatswe ku kiguzi cya miliyoni 15$
Ikigo cya Ellen DeGeneres Campus cyubatswe hafi y'ingagi gishinzwe gukoraho ubushakashatsi
Minisitiri w'Intebe, Dr. Edouard Ngirente, yakiriwe n'abayobozi batandukanye
Michael Murphy ukuriye Ikigo cya Mass Design Group cyagize uruhare mu gushushanya no kubaka inyubako za Ellen DeGeneres Campus, yasobanuriye Minisitiri w'Intebe, Dr. Edouard Ngirente, uburyo iki Kigo cyubatswe
Itorero 'Intayoberana' ryakiriye abashyitsi
Ababyinnyi b'Intayoberana bitakumye karahava
Ababyinnyi b'Intayoberana basusurukije abashyitsi bifashishije imbyino gakondo
Itorero Intayoberana rimaze kubaka izina rikomeye mu Rwanda
Abasore b'Itorero Intayoberana bitegura kwakira abashyitsi
Abakozi ba Ellen DeGeneres Campus barenga 250 bishimiye kwimukira mu Kigo cyisanzuye bazakomerezamo ubushakashatsi bwabo
Abakozi ba Ellen DeGeneres Campus bafashe ifoto y'urwibutso
Ubwo Minisitiri w'Intebe, Dr. Edouard Ngirente yari ageze mu Kigo Ellen DeGeneres Campus
Hafashwe ifoto y'urwibutso nyuma yo gufungura iki Kigo ku mugaragaro
Abakaraza b'Itorero 'Intayoberana' bashimishije abitabiriye iki gikorwa
Uhereye ibumoso, Michael Murphy, Umuyobozi Mukuru wa Mass Design Group, Umuyobozi Mukuru wa Dian Fossey Gorilla Fund, Dr. Tara Stoinski, Ellen DeGeneres n'umufasha we, Portia de Rossi
Ellen DeGeneres yavuze ko yatangiye gukunda Dian Fossey ku myaka 12
Portia de Rossi, umufasha wa Ellen DeGeneres, yasobanuye uburyo yahaye umufasha we impano yo kubaka Ikigo cya Ellen DeGeneres Campus nyuma yo kubona uburyo akunda inyamaswa
Abayobozi batandukanye batambagijwe ibice bigize iki kigo
Minisitiri w'Ibidukikije, Dr. Mujawamariya Jeanne d'Arc, yari yaje gutaha iki Kigo, kizagira uruhare mu kurengera ibidukikije
Minisitiri w'Intebe, Dr. Edouard Ngirente, yatemberejwe ibice bigize Ikigo cya Ellen DeGeneres Campus
Mu mitako iri imbere muri iki Kigo, ifoto ya Dian Fossey wagitangije irimo
Ellen n'umufasha banyuzagamo bakaganira
Ellen DeGeneres yari afite akanyamuneza mu maso
Minisitiri w'Intebe Dr. Ngirente Edouard yaganiraga na Ellen DeGeneres
Minisitiri w'Intebe Dr. Ngirente Edouard yishimiraga video yerekanwe igaragaza intambwe yatewe mu kurinda ingagi
Ambasaderi wa Israel mu Rwanda, Dr. Ron Adam, yari yitabiriye iki gikorwa
Umuyobozi w'Urwego rw'Iterambere, RDB, Clare Akamanzi, ubwo yari akurikiye video yerekana uruhare rwa Dian Fossey Gorilla Fund mu kurinda ingagi
Inzego z'umutekano zitabiriye iki gikorwa
Umuyobozi Mukuru wa RDB, Clare Akamanzi, yashimye abafatanyabikorwa bose bagize uruhare kugira ngo Ikigo Ellen DeGeneres Campus kibeho
Umuyobozi Mukuru wa Mass Design Group yagize uruhare mu kubaka iki Kigo, yasobanuye ko cyubatswe hibanzwe ku kurengera ibidukikije
Ellen DeGeneres yafashwe n'ikiniga ubwo yasobanuraga ibyishimo yagize bwa mbere akigera mu Kigo cyamwitiriwe
Minisitiri w'Intebe Dr. Ngirente Edouard wari uhagarariye Perezida Kagame, yatanze impanuro z'Umukuru w'Igihugu washimye abagize uruhare mu kubaka Ikigo cya Ellen DeGeneres Campus

Amafoto: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .