Umunyamakuru wa BBC yirukanywe azira ikiganiro yagiranye na Charles Onana upfobya Jenoside yakorewe Abatutsi

Yanditswe na Twarabanye Venuste
Kuya 9 Gashyantare 2020 saa 03:14
Yasuwe :
0 0

Umunyamakuru wa BBC ishami rya Afurika mu rurimi rw’Igifaransa, Jacques Matand Diyambi yirukanywe azira ikiganiro yagiranye na Charles Onana upfobya akanahakana Jenoside yakorewe Abatutsi.

Kuwa 7 Gashyantare, Umunyamakuru w’Umunye-Congo, Jacques Matand Diyambi ukorera muri Sénégal, yakiriye ibaruwa ivuye ku mwanditsi mukuru imuhagarika mu kazi ivuga ko yirukanywe kubera ’amakosa akomeye yakoze’.

Iyo baruwa yamubwiraga ko impamvu yo kwirukanwa, ari ikiganiro yakoze mu Ugushyingo 2019, akakigirana n’Umwanditsi w’ibitabo, Charles Onana uzwiho imvugo n’inyandiko zipfobya Janoside yakorewe Abatutsi.

Onana niwe wanditse igitabo ku Rwanda kivuga kuri Operation Turquoise yise “Rwanda, la vérité sur l’opération Turquoise: Quand les archives parlent”.

Uwo mwanditsi kuva mu 2002, yaranzwe no kwandika inyandiko zipfobya Jenoside yakorewe Abatusti, Charles Onana yigaragaje nk’umuhakanyi aho ashinja ingabo zabohoye u Rwanda ziyobowe na Perezida Kagame, gukora Jenoside ebyiri no kuba inyuma y’ihanurwa ry’indege ya Perezida Juvénal Habyarimana ku wa 6 Mata 1994 akavuga ko ariyo yabaye imbarutso ya Jenoside yakorewe abatutsi.

Uwo mwanditsi w’umunya-Cameroun ufite ubwenegihugu bw’u Bufaransa, mu gitabo giheruka yasaga n’ukura icyasha ku bategetsi b’u Bufaransa ku ruhare rwabwo muri Jenoside, akibasira Perezida w’u Rwanda, amushinja uruhare muri Jenoside yakorewe Abatutsi.

Jeune Afrique dukesha iyi nkuru yanditse ko, umwanditsi mukuru wa BBC Afrique, Anne Look Thiam, ashinja umunyamakuru Diyambi kwica amahame y’umwuga, akabogamira ku ruhande rumwe mu kiganiro yagiranye na Onana, ntavugishe uruhande rwa Leta y’u Rwanda kandi ariyo bavugagaho.

Ati “Twasanze ibikorwa byawe bihabanye n’umurongo wa Politiki BBC igenderaho, kandi wafashe icyemezo cyo kuzana ikiganiro ku ngingo itavugwaho rumwe udakurikije amabwriza kandi utabajije ababishinzwe.”

Jeune Afrique itangaza ko igendeye ku ibaruwa yirukana uwo munyamakuru yabonye, icyo cyemezo gifashwe kubera Abayobozi b’u Rwanda bagaragaje ko batishimiye ibyo uwo munyamakuru yakoze.

Muri iyo baruwa handitse ngo, “Kugusaba ibisobanuro, biturutse ku kiganiro wakoranye na Charles Onana, kitakiriwe neza na Guverinoma y’u Rwanda. Guverinoma y’u Rwanda ishinja BBC kubogama kandi ifite uburenganzira bwo gufatira BBC ibihano.”

Guverinoma y’u Rwanda itangaza ko kuvuga ko uwo munyamakuru yahanwe biturutse ku byo yagaragaje atari byo. Minisitiri w’Ububanyi n’Amahanga, Vincent Biruta, yavuze ko atazi iby’icyo kibazo nkuko Jeune Afrique yabitangaje.

Ambasaderi w’u Rwanda mu Bwongereza, Yamina Karitanyi na we yahakanye ibyo kuba yaba yarandikiye ubuyobozi BBC ku byerekeye ikiganiro cya Charles Onana, avuga ko ibiganiro aheruka kugirana n’umwanditsi mukuru, Solomon Mugera uhagarariye BBC Africa i Londres byibanze ku kubogama mu byo batangaza muri rusange atari ku kiganiro runaka.

Umunyamakuru Jacques Matand Diyambi yavuze ko atigeze yerekwa ikibazo u Rwanda rwagize ku kiganiro yagiranye na Onana, ngo ahubwo yatunguwe no guhabwa amasaha 72 yo kuba yasobanuye iby’iyo myitwarire mibi yamugaragayeho.

Yavuze ko ikiganiro yagikoze bijyanye n’amahame muri BBC bagenderaho, ngo kandi yari yabanje kubigaragariza bagenzi be mu nama zitegura amakuru.

Icyakora Diyambi avuga ko yaje kumenya ko iyo ngingo yigeze kuganirwaho mu biganiro bitegura amakuru, bamwe mu banyamakuru bakihanangirizwa kugira ibyo bayitangazaho.

Kuva BBC yatangaza filime yiswe Rwanda Untold Story mu Ukwakira 2014 yavuzweho gupfobya Jenoside yakorewe Abatutsi, ntabwo yigeze isaba imbabazi. Byatumye imirongo yumvikaniragaho mu biganiro by’Ikinyarwanda ihagarikwa.

Charles Onana (uri ku ifoto) niwe ntandaro y'ikiganiro cyatumye Diyambi yirukanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza