00:00:00 IGIHE NETWORK KN KINYARWANDA EN ENGLISH FR FRANCAIS

Umubano w’u Rwanda na Uganda ukomeje kuzahuka nubwo hakiri imbogamizi

Yanditswe na Albert Rudatsimburwa
Kuya 21 May 2022 saa 03:46
Yasuwe :

Kuva umubano w’u Rwanda na Uganda wazamo agatotsi muri Kanama 2017, hari ibimenyetso bifatika byerekana ko uruzinduko Gen Muhoozi Kainerugaba yagiriye i Kigali rutangiye kubyara umusaruro kandi ibyifuzo by’u Rwanda bitangiye guhabwa agaciro.

U Rwanda na rwo rwumvise impungenge za Uganda rufungura Umupaka wa Gatuna. Nubwo hari ibyagezweho bishimishije, haracyari akazi gakenewe gukorwa kugira ngo ibihugu byombi bisubize imibanire yabyo ku murongo.

Ku ruhande rw’u Rwanda, impungenge zarwo zarimo iz’abayoboke ba Rwanda National Congress (RNC) bakoreraga muri Uganda bafite umugambi wo guhungabanya u Rwanda.

Icya kabiri cyari ihohoterwa, gufungwa n’iyicarubozo ryakorewe Abanyarwanda muri Uganda, icya gatatu kikaba kubangamira ubucuruzi bw’u Rwanda bwanyuraga muri Uganda bugana ku Cyambu cya Mombasa.

Ikindi cy’ingenzi ni uko hakoreshwaga icengezamatwara nk’uburyo bwo kwirengagiza ibyo birego, aho ryakoreshwaga mu rwego rwo gutuma abantu badaha umwanya impungenge zagaragajwe n’u Rwanda.

Ibyo byose byahindutse ubwo Gen. Muhoozi Kainerugaba yatangiraga kwinjira muri iki kibazo. Inama yakoranye na Perezida Kagame zigomba kuba zaramwemeje ko kuri iyi nshuro, Uganda yahaye agaciro ibijyanye no gusubiza umubano w’ibihugu byombi ku murongo.

Ntabwo ibi byari bijyanye gusa n’ingendo yagiriye i Kigali. Amagambo ya Gen. Muhoozi n’uburyo yumvaga impungenge z’u Rwanda byabaye igihamya cy’uko ibintu bishobora kuba bitandukanye na mbere.

Ku mugaragaro, Muhoozi yasabye abakozi ba RNC gushaka ahandi hantu bajya gukorera kandi ko ibikorwa byabo muri Uganda bitazongera kwihanganirwa. Yabwiye Kayumba Nyamwasa guhagarika ibikorwa bibangamira u Rwanda akorera muri Uganda, abikora inshuro zirenze imwe.

Ubutumwa yanyuzaga kuri Twitter na bwo ntabwo bwabaga ari amagambo gusa. Bwabaga bukurikiwe n’ibikorwa birimo kohereza abakozi ba RNC mu Burayi [byakozwe] ku itariki ya 2 Mata 2022. Ihohoterwa ry’Abanyarwanda b’inzirakarengana na ryo ryarahagaze.

Ibikorwa by’ubushotaranyi bigize icengezamatwara [ryo guharabika u Rwanda] na byo byaragabanutse mu buryo bufatika nubwo hakiri ababikora. Nk’urugero, urubuga RPF Gakwerere rukomeje ibikorwa byo kwibasira ubuyobozi bw’u Rwanda nubwo umwanditsi warwo Obed Katureebe, umukozi muri Leta ya Uganda, yatawe muri yombi.

Nubwo hatewe intambwe igaragara mu kuzahura umubano w’ibihugu byombi, haracyari ibintu bikeneye kwitabwaho.

Raporo zituruka muri Uganda zivuga ko hari abakozi benshi ba RNC basigaye bakorera mu bwihisho ariko bagakomeza gukora ibikorwa byo kwinjiza abanyamuryango [bashya muri RNC].

Ntabwo bagikorera ibikorwa byabo ku karubanda bafashijwe na Leta. Ku rundi ruhande, nubwo Abanyarwanda batagikorerwa iyicarubozo, hari za bariyeri mu gihugu zigamije gushaka Abanyarwanda bagafungwa ndetse bakanoherezwa mu Rwanda [hirengagijwe] amasezerano y’Umuryango wa Afurika y’Iburasirazuba ku rujya n’uruza rw’abantu. Hari kandi n’amasezerano agena ko indangamuntu ihagije kugira ngo abaturage bambukiranye imipaka mu buryo bworoshye.

Gen. Muhoozi ubwe yivugiye ko yavumbuye ‘Umugambi uteye ubwoba mu bakozi bo mu nzego z’umutekano [za Uganda] bifuzaga ko tujya mu ntambara n’abavandimwe bacu bo mu Rwanda.’ Abo bifuza ko ibihugu byombi bijya mu ntambara, ntabwo bifuza kubona ibihugu byombi byongera kubaka umubano mwiza, hashingiye ku buryo Gen Muhoozi abibona. Yarababuriye, ndetse ababwira ko azabafatira ingamba zikakaye.

Perezida Kagame agomba kuba yaranyuzwe n’imbaraga Muhoozi ari gukoresha kandi agashyira ibikorwa mu ngiro ku bijyanye n’impungenge zari zatanzwe n’u Rwanda. Iyi ishobora kuba ari yo mpamvu yategetse ko Umupaka wa Gatuna ufungurwa, dore ko Uganda yari yarawugaragaje nk’imbogamizi.

Ubushake bwe [Perezida Kagame] bwongeye kugaragazwa n’urugendo yagiriye i Kampala rwatangajwe mu itangazamakuru nk’uruzinduko rwo kwitabira ibirori by’isabukuru ya Muhoozi ariko rukubiyemo ibiganiro na Perezida Museveni [wa Uganda].

Ibi byakurikiwe [n’urugendo] rw’itsinda ry’Ingabo z’u Rwanda i Kampala, riyobowe na Brig Gen Vincent Nyakarundi, mu nama yayobowe na Gen Muhoozi.

Byasaba ko umuntu yirengagiza kugira ngo avuge ko nta cyakozwe mu kuzahura umubano wa Uganda n’u Rwanda. Ntabwo umuntu yavuga ko ibintu byose byakemuwe mu buryo bwuzuye ariko akazi kakozwe karashimishije kandi abaturage b’ibihugu byombi batangiye kwibonera umusaruro ndetse bazakomeza kuwubona mu gihe ibibazo bigihari bizakomeza gukemurwa. Mu gihe ubushake bwakomereza kuri uru rwego, icyizere kirahari.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .